О СВЕТО КО ХАОС

4 | Ма нашав надеж

СОСКЕ ТАНО ВАЖНО

Кеда о мануша бут секиринена пе, адава шај те влијајнел упро ленгоро састипе. Бут џене со доживинена лошна буќа, на дикхена нисави надеж. Сар реагиринена?

Несаве чак на мангена ни те размислинен баши иднина.
Јавера родена решение ко алкохол хем ки дрога.
А несаве мислинена кај о мерибе тано решение. Ленге о живото нане ле нисави смисла.

Со ваљани те џане

Несаве проблемија со иси тут шај тане само привремена хем бизо те очекујне о буќа шај те менинен пе ко пошукар.
Ама чак те на менинен пе да, шај те кере нешто те шај пошукар те икљове ко крајо е ситуацијаја.
И Библија дела чачутни надеж — ка овен решиме о проблемија е манушенгере засекогаш.

Со шај те кере панда акана

Ки Библија пишинела: „Никогаш ма секиринен тумен башо тајсутно диве, соске о тајсутно диве иси ле пле секирацие. Доволно тано со секова диве иси ле пле проблемија“ (Матеј 6:34).

Ма секирин тут башо адава со ка овел или нане те овел. Ако бут секиринеа тут башо адава со шај те овел тајса ка нашти те кере тле одговорностија со иси тут секова диве.

Само адава со ка размислине саве лошна буќа шај те овен ка бајраре о стрес хем ка нашаве и надеж баши пошукар иднина.

СО ШАЈ ТЕ КЕРЕ — Корисна советија

КОНЦЕНТРИРИН ТУТ КО АДАВА СОЈ ПОЗИТИВНО

Ки Библија пишинела: „Е манушеске со иси ле бут неволје са о диве тане лошна, а окова сој тано радосно секова диве тано ко хајбе-пијбе“ (Изреки 15:15). Ако бут негативно дикхеа ко буќа нане те дикхе о решение со шај тано англи туте. Ама ако сиан позитивно, полокхо ка аракхе начинија те шај те икљове ко крајо е ситуацијаја.

Ма дикх бут вести.
Ко крајо таро секова диве размислин башо дуј или трин буќа коленге со сиан благодарно.
Кер туке списако башо адава со ваљани ко адава диве. Ако ваљани те завршине несави побари бути делин ла ко потикне делија те шај ко крајо таро диве те радујне тут башо адава со керѓан.

РОДЕ ПОМОШ

Ки Библија пишинела: „Окова со цидела пе таро јавера... одбинела секоја мудрост“ (Изреки 18:1). Тари хор дупка нашти коркори те икљове, ама ако некој дела тут пло вас ка шај те икљове.

Роде помош тари фамилија хем таро амала.
Исто аѓаар, роде начинија сар шај ту да те поможине ленге. Адава со ка поможине е јаверенге, ка поможинел туке те овел тут исправно стави башо тле проблемија.
Ако нашавѓан секоја надеж хем мислинеа кај више на врединела те живине роде медицинско помош. Понекогаш адала чувствија тане знако башо несаво проблеми састипаја, сар сој и депресија. Буте манушенге поможинѓа адава со добинѓе помош таро докторија.a

a О Џангавѓовен! на вакерела конкретно кова начин лечибаске тано најшукар.

Ки Библија иси чачутни надеж

Панда таро пурано време јекх псалмисти ки молитва вакерѓа е Девлеске: „Тло лафи тано сар лампа со водинела мле чекорија хем светло башо мло друмо“ (Псалм 119:105). Те дикха соске шај те вакера кај и Библија — е Девлескоро Лафи — тани баш адава.

Ки темно рат јекхе лампаја шај те дикха кај ваљани те џа. Слично, ки Библија иси бут практична советија кола со шај те сикавен аменге ко кова друмо те џа кеда ваљани те ана несави пхари одлука.

Ако ко амаро друмо иси појако светло шај те дикха подур со иси ки лесте. Слично, и Библија шај те поможинел аменге јасно те дикха кај англи аменде иси светло иднина.

И Библија тани свето лил која со сикавела аменге и манушикани историја хем исто аѓаар дела амен чачутни надеж баши иднина. Ки лате аракхаја о одговор башо акала пучиба:

Сар почминѓе о муке?

Ки Библија пишинела: „Сар со преку јекх мануш о грево кхувѓа ко свето хем преку о грево о мерибе, хем аѓаар о мерибе ширинѓа пе ко са о мануша, соске сарине грешинѓе“ (Римјања 5:12).

Соске о манушикане владе на успејнѓе те решинен амаре проблемија?

Ки Библија пишинела: „О мануш кова со пхирела нашти те управинел пле чекорија“ (Еремија 10:23). И ситуација ко свето сикавела кај акала лафија тане чаче.

Со ка керел о Девел те шај те решинел и ситуација?

Ки Библија пишинела: „Ов [о Девел] ка косел секоја асвин таро ленгере јакхја, хем мерибе нане те овел више, ни жалибе, ни ројбе, ни дукха“ (Откровение 21:4).