Кој тано криво башо муке со цидаја лен?

Ако о муке нане казна таро Девел, тегани соске иси бокхалипе, чоролипе, војне, насвалипа хем природна катастрофе? Е Девлескоро Лафи и Библија, вакерела аменге трин главна буќа соске о мануша цидена муке:

1. О мануша мангена само пес, тане бичале јакхјакере хем мрзинена пе машкар песте. „О мануш владинела упро мануш ки лескири штета“ (Проповедник 8:9). Бут мануша цидена муке адалеске со упро ленде владинена мануша кола сој тане несовршена, тане лошна хем мангена само пес.

2. О време хем о буќа со нашти те предвидинен пе. О мануша бут пути цидена муке адалеске со „о време хем о буќа со нашти те предвидинен пе аракхена секоле мануше“ (Проповедник 9:11). Адава значинела кај едноставно аракхлиле ко погрешно тхан ко погрешно време, случинѓа пе несреќа, на пазинѓе или керѓе несави грешка.

3. О лошно Владетели акале светоскоро. И Библија јасно вакерела која тани и најбари причина соске о мануша цидена муке. Ој вакерела: „Цело свето тано е Бенгеске ко васта“ (1. Јованескоро 5:19). О Бенг, о Сатана, тано јекх моќно духовно суштество кова сој лошно. Ко почеток ов сине е Девлескоро ангели ама пало адава бунинѓа пе против о Девел (Јован 8:44). Јавера да духовна суштествија поддржинѓе е Сатана кеда бунинѓа пе против о Девел те шај те задоволинен пумаре себична желбе хем аѓаар уле демонија (1. Мојсеева 6:1-5). Оттегани, о Сатана хем лескере демонија ко јекх моќно хем лошно начин влијајнена упро буќа ко акава свето. Акава посебно дикхјола пе ко амаро време. Акана, о Бенг тано бут хољамо хем „ховавела цело свето“ хем адалеске о мануша доживинена бут лошна буќа (Откровение 12:9, 12). Ов тано лошно владетели кова со уживинела те дикхел сар о мануша цидена муке. О Сатана тано адава со керела те овен муке, а на о Девел.

РАЗМИСЛИН: Само јекх личност која сој лошно хем нане ла чувствија шај те керел о мануша кола со нане крива те циден муке. Ама о Девел нане асавко. И Библија вакерела кај „о Девел тано мангипе“ (1. Јованескоро 4:8). Адалеске со са со керела тано таро мангипе, „нашти о чачутно Девел те керел лошнипе, о Семоќно те на овел праведно“ (Јов 34:10).

Ама, шај пучеа тут: „Панда кобор време о Семоќно Девел ка мукхел е Бенгеске те владинел?“ Сар со дикхлем, о Девел мрзинела о лошнипе хем бут дукхала ле кеда иси амен муке. Исто аѓаар, лескоро Лафи вакерела аменге: „Са тумаре секирацие фрден леске, соске ов грижинела пе туменге“ (1. Петарескоро 5:7). О Девел мангела амен хем иси ле моќ те цидел са о муке хем о неправде, акава ка дикха ки јавер статија.a