Пучиба таро читателија

Со ка чхивел о Девел ко вило е народонгоро те керен панда хари?

Башо почеток тари бари неволја, ко Откровение 17:16, 17 пишинела: „О 10 шинга со дикхљан хем о ѕверо ка мрзинен е неморално џувља, ка лен латар са о буќа со иси ла хем ка мукхен ла нанги. Ка хан лакоро мас хем ка тхарен ла ки јаг. Соске, о Девел чхивѓа ленге ко вило те керен адава со ов мангела, уствари те исполнинен пумари заедничко цел, те ден пло царство е ѕвероске“. Англедер, ко амаре публикацие пишинела сине кај адава со о Јехова ка чхивел е народонге ко вило тано те уништинен и ховавни религија.

Ама, ваљани те кера промена ко акава хаљојбе. Адава со о Јехова ка чхивел е народонге ко вило тано „те ден пло царство е ѕвероске“. Те шај те хаљова сар ка исполнинел пе акава, те дикха акала пучиба.

Кој тане спомниме ко акава пророштво? И „неморално џувли“ исто аѓаар иси ла о анав „Баро Вавилон“. Ој претставинела са е ховавне религиен. О „лоло ѕверо“ претставинела е Обединета нациен. Акаја организација сине керди ко 1919 берш те шај те икерел о мир ко свето хем англедер викинела пе сине Лига е народонгири (Отк. 17:3-5). „О 10 шинга“ претставинена са е владен со поддржинена е ѕверо.

Сар тане поврзиме и неморално џувли хем о лоло ѕверо? И неморално џувли бешела упро лоло ѕверо, адава значинела кај поддржинела ле хем пробинела те влијајнел упри лесте, па чак хем те контролиринел ле.

Со ка овел е неморално џувљаја? О ѕверо хем о 10 шинга кола со поддржинена ле, добором бут „ка мрзинен е неморално џувља“ со ка лен латар са со иси ла хем сариненге ка сикавен кобор тани лошно. Ола ка извршинен е Јеховаскири осуда упро лате, јавере лафенцар целосно ка уништинен ла (Отк. 17:1; 18:8). Адава ка овел о крајо башо ховавне религие. Сепак, англедер те овел адава, о Јехова ка чхивел е народон те керен нешто со на случинѓа пе никогаш англедер.

Со ка чхивел о Јехова е народон те керен? Ов ко виле е 10 шингенгере ка чхивел „те керен адава со ов мангела“, адава значинела пли моќ хем власт те ден е лоле ѕвероске — е Обединета нациенге (Отк. 17:13). Размислин со значинела акава. Дали о манушикане владе едноставно коркори ка одлучинен те ден и власт хем и моќ е ѕвероске? На! О пророштво сикавела кај о Девел ка чхивел лен те керен адава (Изр. 21:1; споредин Исаија 44:28). Акаја промена нане те овел хари по хари. Јасно тано кај адава ка овел таро јекх пути. Пало адава, адалеске со о ѕверо ка добинел и моќ ка уништинел е ховавне религиен јекх пути засекогаш.

Тегани со шај те аџикера кај ка случинел пе? На ваљани те аџикера кај ко вестија ка шуна кај о владе хари по хари са повише ка поддржинен е Обединета нациен. Шај те аџикера акава: Таро јекх пути, о Јехова ка чхивел ко виле е народонгере те ден пумари власт е ѕвероске. Кеда ка овел адава, ка џана кај и бари неволја само со на почминѓа. Џикоте на авела адава време, „те ачхова џангавде хем те размислина трезвено“ соске панда хари ка случинен пе промене таро јекх пути! (1. Сол. 5:6).