Дали шај о владе заедно те чхинавен те овел климатско катастрофа? — Со вакерела и Библија?

Недела, 20 ноември 2022 берш, завршинѓа и конференција таро Обединета нацие башо климатска промене „COP27“. Иако керѓе важно договор те обезбединел пе финансиско помош башо почороле пхувја те шај те икљон ко крајо е климатска катастрофенцар, бут џене мислинена кај адава нане те решинел о проблеми.

• „Среќно сиум со шај те чхива ки страна паре те шај те поможина околенге сој погодиме таро климатска промене“, вакерѓа о Антонио Гутереш, о генерално секретари ко Обединета нацие, ко 19 ноември 2022 берш. „Сепак, џанаја кај адава нане доволно... Амаре планетаке потребно тани итно помош. “

• „Ко свето панда хари шај те овел бари климатско катастрофа“ (Мери Робинсон, и бившо претседателка ки Ирска хем бившо застапничка башо манушикане правија ко ОН, ко 20 ноември 2022 берш).

Посебно о терне секиринена пе со ка овел амаре планетаја. Шај ли о владе адалеа со заедно соработинена те исполнинен пумаро ветување кај ка решинен о проблеми е климатско промененцар? Со вакерела и Библија?

Дали о владе ка овен заедно хем ка решинен о проблеми?

Тари Библија дознајнаја кај, иако о владе трудинена пе џи негде те решинен и климатско криза, сепак ола нашти целосно те решинен о проблеми. Те дикха дуј причине соске нашти те керен адава:

• „Адава сој тано банго, нашти те испрајнел пе“ (Проповедник 1:15).

  Со значинела акава: Е владен иси лен ограничими моќ, соске о мануша нане керде те владинен јекх упро јекх (Еремија 10:23). Чак о владе те овен заедно, ола сепак ка нашти те решинен о проблемија е светоскере, бизи разлика кобор трудинена пе.

• „О мануша ка манген коркори пес, ка манген о паре... нане те овен спремна башо било саво договор“ (2. Тимотеј 3:2, 3).

  Со значинела акава: И Библија точно пророкујнѓа, кај бут џене ко амаро време ка манген коркори пес хем нане те овен спремна те соработинен е јаверенцар те шај те керен пошукар о живото сариненгоро.

Причина баши надеж

Ама, со ка овел амаре планетаја, на зависинела таро адава со ветинѓе о манушикане владе. О Девел биринѓа јекх способно Владетели, о Исус Христос, кова со ка владинел цело пхувјаја. Баши лесте и Библија вакерела:

• „[Е Исусеске] ка овел денди власт. О анав лескоро ка овел Мудро Советнико, Моќно Девел, Вечно Дад, Принцо е Мирескоро“ (Исаија 9:6).

О Исус тано Цари ко е Девлескоро Царство, влада сој тани ко небо (Матеј 6:10). Ле иси ле са со ваљани — моќ, мудрост хем желба — те шај те грижинел пе амаре планетаке хем сариненге со живинена ки лате (Псалм 72:12, 16). Кеда ов ка владинел, и небесно влада ка уништинел „околен со уништинена и пхув“ хем ка поправинел и штета со сине керди ки пхув (Откровение 11:18; Исаија 35:1, 7).

Те шај те дознајне повише кова тано о најшукар решение башо катастрофална последице со анѓе лен о климатска промене, читин и статија е насловеа „Во чии раце е иднината на Земјата?“