И осаменост тани са побаро проблеми — Со вакерела и Библија?

Спрема јекх глобално извештајa кова со керѓа пе сигенде, секова штарто мануш осетинела пе осамено.

• „Сарине, бизи разлика кобор берш иси лен или коте живинена шај те на овел лен контакт јавере манушенцар“ (Чидо Мпемба, ко-претседатели ки Комисија башо социјална врске ки Светско здравствено организација).

Несаве мислинена кај само о попхуре хем окола сој коркори осетинена пе осамено. Ама, шај те осетинен пе осамено окола да сој терне, састе, успешна хем сој ко брако. Кеда некој нане ко контакт јавере манушенцар хем осетинела пе осамено шај бут те влијајнел упро физичко хем емоционално састипе е манушенгоро.

• „И осаменост тани бут повише таро адава те осетине тут лошно“, вакерѓа о д-р Вивек Мурти, генерално хирурго ко САД. Ов понадари вакерела: „И осаменост шај те анел мерибе исто кобор со шај те анел о пушибе 15 цигаре ко диве“.

Со вакерела и Библија

Амаро Створители на мангела те цида амен дур таро мануша. Е Девлескири намера секогаш сине о мануша те уживинен кеда тане заедно.

• Начело тари Библија: „О Девел вакерѓа: ’Нане шукар о мануш те овел коркори‘“ (1. Мојсеева 2:18).

О Девел мангела те ова амала леа. Ов ветинела кај ка овел паше аменцар ако амен трудинаја амен те ова паше леа (Јаков 4:8).

• Начело тари Библија: „Среќна тане окола сој свесна кај ваљани ленге о Девел, соске о небесно Царство тано ленгоро“ (Матеј 5:3).

О Девел мангела те обожавина ле заедно е јаверенцар. Кеда кераја адава, сием посреќна.

• Начело тари Библија: „Те размислина јекх јекхеске те шај те поттикнина амен те сикава мангипе хем те кера шукарипе, хем ма те мукха амаре состанокија... него те охрабрина амен јекх јекхеа“ (Евреија 10:24, 25).

Нешто повише башо адава те борина амен против и осаменост, шај те читине ки статија „Усамљеност у свету масовне комуникације“.