Ка авел ли џи ки светско војна? — Со вакерела и Библија?

Ко последна 30 берш, бут мануша мислинена кај о односија машкар о пхувја тане стабилна, па чак овена са пошукар. Сепак, о буќа со случинѓе пе сигенде, сикавѓе кај адава шај нане баш аѓаар.

„О Израел хем о Хезболах боринена пе ки граница таро Либан џикоте о мануша тане секириме кај и војна ки Газа ка влијајнел упро јавера пхувја таро адава региони“ (Reuters, 6 јануари 2024).
„Групе контролириме таро Иран нападинена различна тхана. Освен адава, о Иран палем почминѓа те развинел пли нуклеарно програма, а и Русија хем и Кина поддржинена ле. Са акава тани неви опасност башо западна пхувја“ (The New York Times, 7 јануари 2024).
„О нападија тари Русија понадари да керена бари штета ки Украина“ (UN News, 11 јануари 2024).
„И Кина тани са повише моќно ко економско хем воено поглед, о Тајван тано са погордо баши пли националност, хем о односија машкар и Кина хем о САД тане напната. Са акава локхе шај те анел џи ко конфликт“ (The Japan Times, 9 јануари 2024).

Дали и Библија вакерела нешто баши нестабилно ситуација со иси ко свето авдиве? Ка овел ли светско војна?

О буќа со случинена пе авдиве тане пророкујме ки Библија

Ки Библија нане пророштво баши несави конкретно војна со случинела пе авдиве. Сепак, ој пророкујнела башо неконтролирана војне кола сој тане бут честа авдиве хем кола со лена о мир тари пхув (Откровение 6:4).

Ко лил Даниел тано пророкујмо кај „ко време е крајоскоро“, о светска силе ка натпреваринен пе јекх јекхаја баши моќ хем власт. Јекх начин сар керена адава тано аѓаар со сикавена кобор иси лен бари воено моќ хем трошинена бут паре (Даниел 11:40, 42, 43).

Војна која со ваљани те авел

Тари Библија дознајнаја кај англедер и ситуација ко свето те овел пошукар, прво мора те овел полошно. О Исус пророкујнѓа кај „ка овел бари неволја сави со на сине таро почеток е светоскоро џи акана, а ни нане те овел више“ (Матеј 24:21). Адаја „бари неволја“ ка анел џи ки војна со викинела пе Армагедон, баши која со ки Библија пишинела кај тани „војна со ка овел ко баро диве е Семоќно Девлескоро“ (Откровение 16:14, 16).

Ама, о Армагедон нане те уништинел е манушен, него ка спасинел лен. Преку адаја војна, о Девел ка чхивел крајо е манушикане владибаске, кова со анѓа џи ко бут војне. Те шај те дознајне сар о Армагедон ка анел вечно мир, читин акала статие: