Соске те џав ко состанокија ки дворана е Јеховаскере сведоконгири?

Дуј пути ко курко, е Јеховаскере сведокија икерена состанокија ко ленгере дворане. Сар изглединена акала состанокија, хем сар ка користинел туке адава со ка присуствујне ки ленде?

• Со случинела пе ко е Јеховаскере сведоконгере состанокија?

• Соске те ове присутно

• Со вакерена о јавера терне

Со случинела пе ко е Јеховаскере сведоконгере состанокија?

Ко амаре дворане проучинаја и Библија хем сикљоваја сар те применина лакере практична советија. О состанокија со икерена пе адари шај те поможинен туке:

• те дознајне о чачипе башо Девел

• те хаљове соске случинена пе несаве настанија ко свето

• те ове пошукар мануш

• те аракхе чачутне амала

Дали џанљан? Јекх таро теме баши која со најчесто керела пе лафи ки дворана тани е Девлескоро Царство (Матеј 6:9, 10; 24:14; Лука 4:43).

Соске те ове присутно

Адава со ка шуне адари ка поможинел туке. О библиска начелија башо кола со керела пе лафи ко состанокија ка поможинен туке те ове мудро (Изреки 4:5). Адава значинела кај и Библија шај те поможинел туке те ане шукар одлуке ко тло живото. Исто аѓаар, ој шај те поможинел туке те добине одговор ко најважна пучиба башо живото. Несаве лендар тане:

• Која тани и смисла е животоскири?

• Дали о Девел тано криво башо амаре муке?

• Со овела пало мерибе?

Аке некобор насловија таро библиска говорија со икерена пе ко состанокија ко викенд:

• Соске те водинел амен и Библија?

• Кој шај те поможинел туке кеда сиан ки неволја?

• Со керела е Девлескоро Царство аменге панда авдиве?

„Јекх мло соученико ало ко јекх таро амаре состанокија. Бешља заедно мле фамилијаја, хем дикхела сине таро амаре лила. Пало состанок вакерѓа манге кај сине бут воодушевимо таро коментарија со дена сине о пхраља ко состанок. Исто аѓаар вакерѓа кај ки лескири црква нане лила проучибаске сар со иси аменде“ (Бренда).

Дали џанљан? На ваљани те платине те шај те кхуве ко амаре состанокија, хем никастар на очекујнела пе те дел прилог ако на мангела.

Адатхе ка запознајне манушен со ка охрабринен тут. Ки Библија пишинела кај јекх таро причине соске о христијања ваљани те кхеден пе заедно тани те шај те охрабринен пе јекх јекхеа (Евреите 10:24, 25). Авдиве, повише мануша дикхена само песке. Ама, ко собрание ка аракхе мануша коленге сој поважна о Девел хем о јавера. О дружибе ленцар чаче ка охрабринел тут.

„Ко крајо таро диве, понекогаш осетинава ман тажно хем бут уморно. Ама, кеда сиум е манушенцар ки дворана, секогаш осетинава ман пошукар. Кеда џава манге кхере пало состанокија, сиум бахтали хем спремно башо панда јекх нево диве“ (Елиза).

Дали џанљан? Ко цело свето иси повише таро 120 000 собранија е Јеховаскере сведоконгере. Ола кхедена пе ко повише таро 60 000 тхана. Адалеске со о број бут бајрола, секова берш градинена пе ко просек околу 1. 500 дворане башо состанокијаa