Matej

12 Ki jekh prilika, ko sabat,* o Isus nakhela sine taro nive kote so sine giv. Leskere učenikija sine bokhale pa počmingje te čhinen o giv hem te han. 2 Keda o fariseija* dikhle adava, vakergje leske: „Tle učenikija kerena adava so na smejnena te keren ko sabat“. 3 A o Isus vakergja lenge: „Na čitingjen li so kergja o David hem leskere manuša keda sine bokhale? 4 Ov khuvgja e Devleske ko kher hem ola hale o mare so sine dende sar žrtva anglo Devel, kola so na smejnena sine te han ni ov ni leskere manuša, nego samo o sveštenikija. 5 Ili, na čitingjen li ko Zakoni kaj o sveštenikija ko sabat kerena buti ko hrami, a sepak nane kriva kaj phagjena o Zakoni? 6 Ama vakerava tumenge, akate tano nekoj soj pobaro taro hrami. 7 Te haljoven sine so značinela akava: ’Milost mangava, a na žrtva‘, nane sine te sudinen okolen so na kergje nisavi greška. 8 Soske o manušikano Čhavo* tano Gospodari kova so isi le avtoriteti upro sabat“.

9 Keda gelo peske adathar, khuvgja ki lengiri sinagoga.* 10 Adathe sine jekh manuš so sine le paralizirimo vas.* Tegani o fariseija, te šaj te arakhen pričina te obvininen e Isuse, pučle le: „Smejnela pe li te sasljarel pe nekas ko sabat?“ 11 A ov vakergja lenge: „Ako nekoj tumendar isi le samo jekh bakhro hem adava bakhro ko sabat perela ki dupka, koj tumendar nane te astarel hem te ikalel e bakhre tari dupka? 12 A kobor poviše vredinela o manuš taro jekh bakhro! Adaleske, šaj te kerel pe šukaripe ko sabat“. 13 Tegani vakergja e manušeske: „Pružin tlo vas“. O manuš pružingja plo vas hem o vas leskoro sastilo hem ulo isto sar o javer vas. 14 A o fariseija iklile hem počmingje te dogovorinen pe sar te mudaren le. 15 Keda o Isus šungja bašo adava, gelo peske taro adava than. But manuša gele pali leste hem o Isus sasljargja sarinen so sine nasvale, 16 ama zabraningja lenge te vakeren e javerenge baši leste, 17 te šaj te ispolninel pe adava so sine vakerdo preku o proroko o Isaija:

18 „Ake mlo sluga kas so biringjum, mlo manglo kova so kerela mli volja! Ka dav le mli sila hem ov ka sikavel sa e narodonge soj pravda. 19 Ov nane te košel pe, nane te vikinel hem leskoro glaso nane te šungjol ko ulice. 20 I gazimi trska nane te phagjel hem i momoli* so pohari thabljola nane te ačhavel, sa džikote na kerela i pravda te pobedinel. 21 Čače, leskoro anav ka del nadež e manušenge ko celo sveto“.

22 Tegani ki leste angje jekhe manuše so sine korolo, laloro hem sine le demoni. O Isus sasljargja le hem o manuš počmingja te kerel lafi hem te dikhel. 23 Sa o manuša sine vooduševime hem vakergje: „Te nane akava o Čhavo e Davideskoro?“ 24 Keda šungje adava o fariseija, vakergje: „Akava manuš našti te paldel e demonen ako na pomožinela le o Velzevul,* o vladeteli e demonengoro“. 25 O Isus džanlja so mislinena hem vakergja lenge: „Sekova carstvo kote so nane sloga, propadinela. Hem sekoja diz ili sekova kher kote so nane sloga, ka propadinel. 26 Znači, ako o Satana paldela e Satana, ov ovela protiv peste hem leskoro carstvo nane te ačhol. 27 A ako me paldava e demonen adaleske so pomožinela man o Velzevul, tegani koj pomožinela tumare učenikon keda paldena e demonen? Adaleske tumare učenikija ka sikaven kaj na sien ko pravo. 28 Ama ako me paldava e demonen e Devleskere silaja,* tegani e Devleskoro Carstvo više alo, a tumen na sien svesna bašo adava. 29 Ili, sar šaj nekoj te khuvel ko kher jekhe zorale manušeskoro te šaj te čorel lestar ako angleder na phandela adale zorale manuše? Samo tegani šaj te čorel lestar sa so isi le ko kher. 30 Koj nane mancar, ov tano protiv mande hem koj na khedela e manušen mancar, ov rasturinela len.

31 Adaleske vakerava tumenge, sekova grevo hem sekova navredlivo lafi so ka vakeren o manuša ka ovel lenge prostimo, ama ako nekoj vakerela navredliva lafija baši e Devleskiri sila,* nane te ovel leske prostimo. 32 Na primer, koj ka kerel lafi protiv o manušikano Čhavo* ka ovel leske prostimo, ama koj ka kerel lafi protiv e Devleskiri sila,* leske nane te ovel prostimo, ni ko akava a ni ko nevo sveto* so ka avel.

33 Ako sien šukar kaš tegani tumare plodija ka oven šuže, a ako sien kirno kaš tegani tumare plodija ka oven rumime, soske taro plodija šaj te dikhe savo tano o kaš. 34 Tumen sien sar sapa! Sar šaj te vakeren šukar bukja keda sien lošna? Soske, o muj vakerela adava solea tano pherdo o vilo. 35 O šukar manuš vakerela šukar bukja adaleske so ko vilo isi le šukar bukja, a o lošno manuš vakerela lošna bukja adaleske so ko vilo isi le lošna bukja. 36 Vakerava tumenge kaj o manuša bašo sekova bezvredno lafi so ka vakeren, ka odgovorinen ko dive keda o Devel ka sudinel e manušenge. 37 Soske, sprema tle lafija ka vakerel pe kaj sian pravedno hem sprema tle lafija ka ove osudimo“.

38 Tegani nesave učenikija e zakoneskere hem o fariseija* vakergje leske: „Učitele, mangaja te dikha znako tutar so ka sikavel kaj sian bičhaldo taro Devel“. 39 A o Isus vakergja lenge: „Tumen sien generacija soj lošno hem so nane verno e Devleske,* tumen stalno rodena znako, ama nane te del pe tumenge javer znako osven o znako taro proroko o Jona. 40 Soske, sar o Jona so sine ko vogi e bare mačheske trin dive hem trin rakja, agjaar o manušikano Čhavo ka ovel hor ki phuv trin dive hem trin rakja. 41 O manuša tari Ninevija ka voskresninen zaedno akale generacijaja ko dive keda o Devel ka sudinel e manušenge, hem ola ka osudinen akale generacija soske keda o Jona propovedingja lenge, ola kaingje pe. Ama ake, akate tano nekoj soj pobaro taro Jona. 42 I carica taro jug ka voskresninel zaedno akale generacijaja ko dive keda o Devel ka sudinel e manušenge hem oj ka osudinel akale generacija, soske ali taro dur than te šaj te šunel i mudrost taro Solomon. Ama ake, akate tano nekoj soj pobaro taro Solomon.

43 Keda o demoni* ka ikljol taro manuš, nakhela tari pustina hem rodela than kote te odmorinel, ama na arakhela. 44 Tegani vakerela peske: ’Ka iranav man ko mlo kher kotar so ikliljum‘. Hem keda iranela pe arakhela o kher čučo, čisto hem sredimo. 45 Palo adava džala hem anela javere efta demonen soj panda pološna lestar hem keda khuvena ko kher, ačhona te živinen adathe. Tegani akale manušeske ovela panda pološno nego so sine ko početok. Agjaar ka ovel hem akale lošno generacijaja“.

46 Džikote panda kerela sine lafi, leskiri daj hem leskere phralja ale hem ačhile avrijal, pa rodingje le te keren lea lafi. 47 Hem nekoj vakergja leske: „Ake ti daj hem te phralja tane avrijal hem rodena tut te keren tuja lafi“. 48 A o Isus vakergja akale manušeske: „Koj tani mi daj hem koj tane me phralja?“ 49 Tegani, vastea sikavgja ko ple učenikija hem vakergja: „Ake mi daj hem me phralja. 50 Soske sekoj so kerela i volja me Dadeskiri soj ko nebo, ov tano mo phral, mi phen hem mi daj“.