O SVETO KO HAOS

1 | Arakh tlo sastipe

SOSKE TANO VAŽNO

Keda ka ovel nesavi phari situacija ili ka slučinel pe nesavi nesrekja, adava šaj te vlijajnel upro sastipe e manušengoro.

O phare situacie kerena e manušenge stres, a keda o stres trajnela poviše vreme adava šaj te kerel problemija ko sastipe.
Ko krizna situacie, o zdravstvo šaj te ovel but optovarimo hem adaleske šaj te ovel popharo te lečine tut.
Keda isi kriza, e manušenge šaj te ovel pharo te kinen o osnovna bukja sar soj o hajbe hem o iljačija.

So valjani te džane

O seriozna nasvalipa hem o stres šaj te kerel te ane lošna odluke kola so ka vlijajnen štetno ko tlo sastipe.
Ako na pazinea ko tlo sastipe šaj te ovel pološno, pa čak tlo životo te ovel ki opasnost.
Kobor pošukar sastipe isi tut doborom polokheste ka ovel tuke te ane šukar odluke keda ka oven phare situacie.
Bizi razlika dali sian čorolo ili barvalo, tu šaj te kere nešto te šaj te arakhe tlo sastipe.

So šaj te kere panda akana

Sekogaš keda šaj jekh mudro manuš razmislinela bašo opasnostija so šaj te oven hem kerela nešto te šaj te izbeginel len. Akava važinela bašo sastipe da. Obično isi potikne šanse te zarazine tut ili barem te oven tut polokhe simptomija ako ikerea šukar higiena. Ustvari, pošukar te sprečine nego te lečine.

„Adalea so ikeraja šukar lično higiena hem amaro kher tano čisto, daja pohari pare doktorenge hem iljačenge“ (Andreas).a

a Nesave anava ko akava spisanie tane menime.

SO ŠAJ TE KERE — Korisna sovetija

Akala sovetija šaj te pomožinen tut te arakhe tlo sastipe

IKER ŠUKAR HIGIENA

Iker šukar higiena

Ki Biblija pišinela: „O gogjaver manuš dikhela o lošnipe hem cidela pe“ (Izreki 22:3). Trudin tut angleder te razmisline so šaj te kerel tlo sastipe pološno hem cide tut taro adava.

Često thov tle vasta sapunea hem panjea, posebno angleder te pipine hajbe ili otkeda ka dža ko vece.
Redovno čistin hem ker dezinfekcija ko kher, posebno o površine hem o predmetija so često pipinena pe.
Kobor so šaj ma te ovel tut paše kontakt e manušencar so isi len nesavo zarazno nasvalipe.

HRANIN TUT ZDRAVO

Hranin tut zdravo

Ki Biblija pišinela: „Nikoj na mrzinela korkori pes, nego arakhela pes hem ceninela pes“ (Efešanja 5:29). Sikavaja kaj grižinaja amen amenge agjaar so pazinaja so vnesinaja ko amaro telo.

Pi but pani.
Ha razno ovošje hem zelenčuk.
Ma ha but mrsno, londalo hem gudlo.
Ma pušin, ma pi previše alkohol ili ma koristin droga.

„Te šaj ma te nasvaljova trudinaja amen te hranina amen zdravo. Ako na keraja adava celo plata ka džal ko iljačija. Adala pare pošukar te koristina len baši zdravo hrana“ (Karlos).

VEŽBIN HEM ODMORIN TUT DOVOLNO

Vežbin

Ki Biblija pišinela: „Pošukar tano jekh šaka odmor, nego duj šake trud hem prastajba pali bavlal“ (Propovednik 4:6). Valjani te kera buti, ama isto agjaar valjani dovolno te odmorina amen da.

Ov fizički aktivno. Ko početok šaj te počmine redovno te phire. Ako sian fizički aktivno, šaj te kere pošukar tlo sastipe čak ako sian ko berša, ako isi tut nesavo invaliditeti ili nesavo hronično nasvalipe.
Odmorin tut dovolno

Odmorin tut dovolno. Ako nesavo vreme na sovea dovolno adava šaj te kerel te ovel tut poviše stres hem pohari koncentracija. A ako adava trajnela poviše vreme šaj te anel dži ko poseriozna problemija e sastipaja.
Birin tuke vreme keda ka čhive tut te sove hem iker tut ko adava. Trudin tut te sove hem te ušte ko isto vreme sekova dive.
Trudin tut te na dikhe televizija hem te na koristine elektronska uredija džikote sian ko kreveti.
Izbegin phari hrana, kofein ili alkohol angleder te sove.

„Haliljum kaj o sojbe vlijajnela ko mlo sastipe. Ako na sovava dovolno ponekogaš dukhala man mo šero hem sium sar mudardo. Ama keda sium šukar suto isi man čuvstvo kaj šaj te kerav sa. Isi man but energija ama hem poretko nasvaljovava“ (Džastin).