O SVETO KO HAOS

4 | Ma našav nadež

SOSKE TANO VAŽNO

Keda o manuša but sekirinena pe, adava šaj te vlijajnel upro lengoro sastipe. But džene so doživinena lošna bukja, na dikhena nisavi nadež. Sar reagirinena?

Nesave čak na mangena ni te razmislinen baši idnina.
Javera rodena rešenie ko alkohol hem ki droga.
A nesave mislinena kaj o meribe tano rešenie. Lenge o životo nane le nisavi smisla.

So valjani te džane

Nesave problemija so isi tut šaj tane samo privremena hem bizo te očekujne o bukja šaj te meninen pe ko pošukar.
Ama čak te na meninen pe da, šaj te kere nešto te šaj pošukar te ikljove ko krajo e situacijaja.
I Biblija dela čačutni nadež — ka oven rešime o problemija e manušengere zasekogaš.

So šaj te kere panda akana

Ki Biblija pišinela: „Nikogaš ma sekirinen tumen bašo tajsutno dive, soske o tajsutno dive isi le ple sekiracie. Dovolno tano so sekova dive isi le ple problemija“ (Matej 6:34).

Ma sekirin tut bašo adava so ka ovel ili nane te ovel. Ako but sekirinea tut bašo adava so šaj te ovel tajsa ka našti te kere tle odgovornostija so isi tut sekova dive.

Samo adava so ka razmisline save lošna bukja šaj te oven ka bajrare o stres hem ka našave i nadež baši pošukar idnina.

SO ŠAJ TE KERE — Korisna sovetija

KONCENTRIRIN TUT KO ADAVA SOJ POZITIVNO

Ki Biblija pišinela: „E manušeske so isi le but nevolje sa o dive tane lošna, a okova soj tano radosno sekova dive tano ko hajbe-pijbe“ (Izreki 15:15). Ako but negativno dikhea ko bukja nane te dikhe o rešenie so šaj tano angli tute. Ama ako sian pozitivno, polokho ka arakhe načinija te šaj te ikljove ko krajo e situacijaja.

Ma dikh but vesti.
Ko krajo taro sekova dive razmislin bašo duj ili trin bukja kolenge so sian blagodarno.
Ker tuke spisako bašo adava so valjani ko adava dive. Ako valjani te završine nesavi pobari buti delin la ko potikne delija te šaj ko krajo taro dive te radujne tut bašo adava so kergjan.

RODE POMOŠ

Ki Biblija pišinela: „Okova so cidela pe taro javera... odbinela sekoja mudrost“ (Izreki 18:1). Tari hor dupka našti korkori te ikljove, ama ako nekoj dela tut plo vas ka šaj te ikljove.

Rode pomoš tari familija hem taro amala.
Isto agjaar, rode načinija sar šaj tu da te pomožine lenge. Adava so ka pomožine e javerenge, ka pomožinel tuke te ovel tut ispravno stavi bašo tle problemija.
Ako našavgjan sekoja nadež hem mislinea kaj više na vredinela te živine rode medicinsko pomoš. Ponekogaš adala čuvstvija tane znako bašo nesavo problemi sastipaja, sar soj i depresija. Bute manušenge pomožingja adava so dobingje pomoš taro doktorija.a

a O Džangavgjoven! na vakerela konkretno kova način lečibaske tano najšukar.

Ki Biblija isi čačutni nadež

Panda taro purano vreme jekh psalmisti ki molitva vakergja e Devleske: „Tlo lafi tano sar lampa so vodinela mle čekorija hem svetlo bašo mlo drumo“ (Psalm 119:105). Te dikha soske šaj te vakera kaj i Biblija — e Devleskoro Lafi — tani baš adava.

Ki temno rat jekhe lampaja šaj te dikha kaj valjani te dža. Slično, ki Biblija isi but praktična sovetija kola so šaj te sikaven amenge ko kova drumo te dža keda valjani te ana nesavi phari odluka.

Ako ko amaro drumo isi pojako svetlo šaj te dikha podur so isi ki leste. Slično, i Biblija šaj te pomožinel amenge jasno te dikha kaj angli amende isi svetlo idnina.

I Biblija tani sveto lil koja so sikavela amenge i manušikani istorija hem isto agjaar dela amen čačutni nadež baši idnina. Ki late arakhaja o odgovor bašo akala pučiba:

Sar počmingje o muke?

Ki Biblija pišinela: „Sar so preku jekh manuš o grevo khuvgja ko sveto hem preku o grevo o meribe, hem agjaar o meribe širingja pe ko sa o manuša, soske sarine grešingje“ (Rimjanja 5:12).

Soske o manušikane vlade na uspejngje te rešinen amare problemija?

Ki Biblija pišinela: „O manuš kova so phirela našti te upravinel ple čekorija“ (Eremija 10:23). I situacija ko sveto sikavela kaj akala lafija tane čače.

So ka kerel o Devel te šaj te rešinel i situacija?

Ki Biblija pišinela: „Ov [o Devel] ka kosel sekoja asvin taro lengere jakhja, hem meribe nane te ovel više, ni žalibe, ni rojbe, ni dukha“ (Otkrovenie 21:4).