LEKCIJA 11
Ola pišinge bašo Isus
Dikhea li e manušen ki slika?— Ola tane o Matej, Marko, Luka, Jovan, Petar, Jakov, Juda hem o Pavle. Akala manuša živinena sine ko isto vreme e Isusea hem pišinge baši leste. Te sikljova pobuter baši lende.
So džanea bašo akala manuša?
Trin lendar sine apostolija hem džana sine e Isusea te vakeren e manušenge bašo Jehova. Džanea li koj sine ola?— O Matej, o Jovan hem o Petar. O apostolija o Matej hem o Jovan but šukar džanena sine e Isuse hem solduj džene pišinge po jekh lil bašo leskoro životo. O apostol Jovan pišingja panda štar lila, adala tane: Otkrovenie, Prvo lil e Jovaneskoro, Dujto lil e Jovaneskoro hem Trinto lil e Jovaneskoro. O apostol Petar pišingja duj lila so i tane ki Biblija. Ola tane o Prvo lil e Petareskoro hem o Dujto lil e Petareskoro. Ko dujto lil o Petar pišingja bašo adava keda šundilo e Jehovaskoro glaso taro nebo sar vakerela: ,Akava tano mo manglo čhavo, kova so radujnela man‘.
O javera da manuša tari slika pišinge lila so sikavena amen bašo Isus. Jekh lendar tano o Marko. Keda ale te phanden e Isuse, ov šaj sine adathe hem dikhlja sa so ulo. Javer lendar tano o Luka. Ov sine doktori hem šaj palo e Isuseskoro meriba ov ulo hristijani, ili leskoro učeniko.
Javera duj džene so dikhea len ki slika so pišinge lila tari Biblija tane e Isuseskere potikne phralja. Džanea li lengere anava?— Lengere anava tane Jakov hem Juda. Ola odma na verujnge ko Isus, čak mislinena sine kaj delindilo. Ama palo nesavo vreme, ola verujnge ko Isus hem ule hristijanija.
Panda jekh manuš ki slika so pišingja lila tari Biblija tano o Pavle. Angleder te ovel hristijani, leskoro anav sine Savle. Ov mrzinela sine e hristijanen hem sine but lošno lencar. Džanea li sar o Pavle ulo hristijani?— Jekh dive, o Pavle džala sine ko drumo hem taro jekh puti šungja glaso taro nebo. Adava glaso sine e Isuseskoro! Ov pučlja e Pavle: ,Soske sian lošno adalencar so verujnena ki mande?‘ Palo adava, o Pavle ulo šukar manuš hem ov da ulo hristijani. O Pavle pišingja 14 lila tari Biblija.
Amen čitinaja i Biblija sekova dive. Keda čitinaja la, sikljovaja but bukja bašo Isus. Mangea li te džane pobuter bašo Isus?—