E Pavleskoro unuko sine hrabro

Ajde te dikha bašo jekh terno manuš so spasingja pe vujko. Leskoro vujko sine o apostol Pavle. Na džanaja sar sine o anav akale terne manušeskoro, ama džanaja kaj sikavgja kaj tano but hrabro. Mangea li te džane so kergja?—

O Pavle sine ko zatvor ko Erusalim. Ov sine phanlo soske vakerela sine e manušenge bašo Isus. Nesave lošna manuša mrzinena sine e Pavle, hem mangle te keren jekh lošno buti. Ola vakerge: ,Te roda taro glavno vojniko te anen e Pavle ko sudo. Amen ka garava amen negde ko drumo hem keda ka nakhel o Pavle, ka mudara le!‘

E Pavleskoro unuko šungja bašo adava. So kergja ov? Gelo ko zatvor hem vakergja sa e Pavleske. O Pavle vakergja leske te džal ko glavno vojniko hem te vakerel leske sa so šungja. Mislinea li kaj sine lokho e Pavleskere unukoske te kerel lafi e glavno vojnikoja?— Na, soske o glavno vojniko sine važno manuš. Ama e Pavleskoro unuko sine hrabro hem gelo te kerel lea lafi.

O glavno vojniko džanlja so te kerel. Čhivgja 500 vojnikija te arakhen e Pavle! Vakergja adaja rat te legaren le ki diz Cezareja. Spasinge li e Pavle?— Oja, o lošna manuša našti sine te mudaren le! Adava so mangle našti kerge.

So sikljovea taro akava?— Tu da šaj te ove hrabro sar e Pavleskoro unuko. Amen valjani te ova hrabra keda vakeraja e manušenge bašo Jehova. Ka ove li hrabro sekogaš te kere lafi bašo Jehova?— Ako kerea agjaar, togaš šaj ka spasine nekaskoro životo.