O Isus ulo Mesija

O Jovan propovedinela sine: „Avela nekoj soj tano pobaro mandar“. Keda e Isuse sine le okolu 30 berš, tari Galileja gelo ki reka Jordan, kote so o Jovan krstinela sine e manušen. O Isus manglja o Jovan te krstinel le, ama o Jovan vakergja leske: „Me našti te krstinav tut. Tu valjani mande te krstine“. O Isus vakergja e Jovaneske: „O Jehova mangela tu te krstine man“. Agjaar ola khuvgje ki reka Jordan hem o Jovan celosno potopingja e Isuse ko pani.

Otkeda krstingja pe o Isus, ov molingja pe. Ko isto momenti, o nebo phravdilo hem e Devleskoro duho hulilo sar gulubi. Tegani o Jehova vakergja taro nebo: „Tu sian mlo manglo Čhavo, kova so radujnela man“.

Keda e Jehovaskoro duho hulilo upro Isus, ov ulo Hristos, ili Mesija. Ottegani o Isus počmingja te kerel pli zadača baši koja so o Jehova bičhalgja le ki Phuv.

Odma palo plo krstibe, o Isus gelo ki pustina hem ačhilo adari 40 dive. Keda irangja pe, gelo ko Jovan te dikhel le. Keda o Jovan dikhlja sar avela o Isus ki leste vakergja: „Ake tano e Devleskoro Bakhro! Preku leste ka oven prostime o grevija e manušengere“. Akale lafencar o Jovan sikavgja e manušenge kaj o Isus tano o Mesija. Dali džanea so ulo e Isusea džikote sine ki pustina? Ajde te dikha.