Astargje e Isuse

O Isus hem o apostolija nakhle tari dolina Kedron hem gele ki Maslinsko Gora. Nakhlja ekvaš i rat, hem ko nebo sine pherdi mesečina. Keda resle ki gradina Getsimanija, o Isus vakergja lenge: „Oven akate hem ačhoven džangavde“. Palo adava, gelo hari podur ki gradina hem bešlja ko kočaka. Sine leske but pharo hem molingja pe. Ki molitva vakergja e Jehovaske: „Neka ovel sar so mangea tu“. Tegani o Jehova bičhalgja jekhe angele te ohrabrinel le. Keda o Isus irangja pe ko apostolija, dikhlja len sar sovena. Ov vakergja: „Ušten! Akana nane o vreme sojbaske! Alo o vreme te ovav predajmo ko vasta mle dušmanengere“.

Palo kratko vreme alo o Juda, hem lea sine but manuša kola so sine len mačija hem kašta. O Juda džanlja kaj o Isus tano ki gradina soske ov hem o javera apostolija stalno avena sine lea adathe. O Juda vakergja e vojnikonge kaj ov ka sikavel lenge koj tano o Isus. Adaleske gelo dži leste hem vakergja: „Zdravo, učitele“, hem palo adava čumingja le. O Isus vakergja leske: „Juda, predajnea man li jekhe čumibaja?“

O Isus iklilo anglal hem pučlja e manušen: „Kas rodena?“ Ola odgovoringje: „E Isuse taro Nazaret“. Tegani o Isus vakergja: „Me sium adava“. Tegani o manuša cidingje pe napalal hem pele tele. O Isus palem pučlja len: „Kas rodena?“ Ola odgovoringje isto lafencar: „E Isuse taro Nazaret“. Tegani vakergja lenge: „Vakergjum tumenge kaj me sium adava. Mukhen me učenikon te džan peske“.

Keda halilo o Petar so ovela, ikalgja o mači hem čhingja o kan jekhe manušeskoro kova so sine sluga e prvosveštenikoske. Ama, o Isus astargja o kan leskoro hem sasljargja le. Palo adava, vakergja e Petareske: „Mukh o mači. Ako borinea tut mačea, taro mači ka mere“. O vojnikija astargje e Isuse hem phanle o vasta leskere, a o apostolija našle. Palo adava, o manuša ingargje e Isuse ko glavno svešteniko, ko Ana. Otkeda o Ana ispitingja le, bičhalgja le ko kher e prvosveštenikoskoro o Kajafa. Ama, so ulo e apostolencar?