O Petar vakergja kaj na pendžarela e Isuse

Keda o Isus sine ple apostolencar ki upruni soba, ov vakergja lenge: „Sarine tumen ka mukhen man erat“. O Petar vakergja: „Me nane te mukhav tut! Čak sarine te džan peske, me nikogaš nane te kerav adava“. Ama o Isus vakergja leske: „Angleder o bašno te giljavel, tu trin puti ka vakere kaj na pendžarea man“.

Palo adava, keda o vojnikija ingargje e Isuse ko e Kajafaskoro kher, poviše taro apostolija našle. Ama, duj džene lendar sledinena le sine zaedno e javere manušencar tari grupa. Jekh lendar sine o Petar. Ov gelo ko e Kajafaskoro kher hem takjola sine uzi jag. Ama, jekh sluginka dikhlja le hem vakergja: „Džanava koj sian tu! Tu sian sine e Isusea!“

O Petar odgovoringja: „Nane agjaar! Na džanava bašo so kerea lafi!“ Palo adava cidingja pe kaj i porta. Ama, jekh javer sluginka vakergja e manušenge: „Akava manuš sine e Isusea!“ O Petar vakergja: „Me ni na pendžarava e Isuse!“ Tegani jekh manuš vakergja: „Tu da sian lencar! Taro adava sar kerea lafi dikhjola pe kaj sian tari Galileja, sar o Isus“. Ama, o Petar palem vakergja: „Na, na pendžarava le!“

Ko adava momenti giljavgja o bašno. O Isus irangja pe hem dikhlja e Petare ko jakhja. Tegani o Petar setingja pe ko lafija e Isuseskere, iklilo avri hem silno rungja.

Ko adava momenti, o členija taro Sudsko sovet khedingje pe ko e Kajafaskoro kher te sudinen e Isuseske. Ola više sine rešime te mudaren e Isuse, ama valjani sine te arakhen nešto kolea ka keren le krivo. Adaleske so našti sine te arakhen ništo protiv leste, o Kajafa pučlja le: „Dali sian e Devleskoro Čhavo?“ O Isus odgovoringja leske: „Oja“. Tegani o Kajafa vakergja: „Na valjani amenge javera dokazija. Korkori šungjen, navredingja e Devle!“ O členija taro sudo soglasingje pe: „Akava manuš mora te merel“. Ola počmingje te khuven le šamarkencar hem te čhungaren le. Na samo adava, phanle o jakhja leskere, khuvena le sine hem phenena sine: „Ako sian proroko, vaker koj khuvgja tut!“

Keda phravdilo o dive, ingargje e Isuse ki sala ko Sudsko sovet hem palem pučle le: „Dali sian e Devleskoro Čhavo?“ O Isus phengja lenge: „Tumen korkori phenena kaj sium“. Tegani vakergje kaj tano krivo soske navredingja e Devle hem ingargje le ki palata e rimsko upraviteleskiri o Pontij Pilat. So ulo palo adava? Ajde te dikha.