Maj

Otkeda o Jovan dikhlja jekhe nebesno grupa, ov akana dikhela jekhe bare mnoštvo kole so nikoj našti te gejnel le. So džanaja baši akaja grupa? E Jovaneske sine vakerdo: „Ola tane adala so avena tari bari nevolja, so thovgje ple šeja hem parnargje len ko rat e Bakhreskoro“ (Otk. 7:14). Otkeda ka preživinen i bari nevolja, akava baro mnoštvo manuša ka živinel ki phuv hem ka uživinel ko but šuže blagoslovija (Ps. 37:9-11, 27-29; Izr. 2:21, 22; Otk. 7:16, 17). Bizi razlika dali siem birime te dža ko nebo ili te ačhova ki phuv, dali dikhaja amen ko adava soj pišimo ko 7 poglavje taro Otkrovenie? Bi valjani te dikha amen. Adava ka ovel vozbudlivo vreme e Devleskere slugenge taro solduj grupe! Ka ova but radosna so biringjem te poddržina e Jehova sar vladeteli (w22.05 16, pas. 6-7).

Keda valjangjan te ane nesavi važno odluka tu sigurno molingjan tut baši mudrost, soske džanljan kaj valjangja tuke adava (Jak. 1:5). O cari o Solomon pišingja: „I mudrost tani najvažno“ (Izr. 4:7). Džangjola pe, o Solomon na kergja lafi baši bilo savi mudrost. Ov kergja lafi baši mudrost koja so avela taro Jehova. Ama šaj li e Devleskiri mudrost te pomožinel amenge te ikljova ko krajo e problemencar so isi amen avdive? Oja šaj. Jekh način sar šaj te ova čače mudra tano agjaar so ka proučina hem ka primenina o sovetija taro duj manuša so sine but mudra. Prvo razmislin bašo e Solomoneskoro primer. I Biblija vakerela: „O Devel dengja e Solomoneske but bari mudrost hem proniklivost“ (1. Car. 4:29). Dujto, razmislin bašo e Isuseskoro primer kova so sine o najmudro manuš so dži akana živingja ki phuv (Mat. 12:42). Baši leske sine prorokujmo: „E Jehovaskoro duho ka ovel upri leste. Adaleske ov ka ovel mudro, but šukar ka haljovel o bukja“ (Isa. 11:2; w22.05 20, pas. 1-2).

Nikoj nane doborom phuro so našti te čhivel peske duhovna celija hem te ispolninel len. Razmislin baši jekh phen so vikinela pe Beverli so isi la 75 berš. La sine la jekh pharo nasvalipa kolestar so na sine lake lokho te phirel. Ama oj but mangela sine te učestvujnel ki akcija baši Spomen-svečenost kobor so šaj poviše. Adaleske čhivgja peske konkretna celija. Keda uspejngja te ispolninel ple celija, sine but radosno. Taro lakoro primer o javera da ko sobranie sine pottiknime te keren poviše ki služba. O Jehova but ceninela o trudo e pophure phralengoro hem e phenjengoro, čak keda lengere okolnostija na dozvolinena lenge te keren doborom kobor so bi mangena (Ps. 71:17). Čhiv tuke celija kola so šaj te ispolnine len. Razvin osobine kolencar so ka kere radosno e Jehova. Sikljov veštine kola so ka pomožinen tuke te ove pokorisno e Jehovaske hem leskere organizacijake. Rode načinija sar šaj ki panda pobari mera te služine tle phralenge hem phenjenge. Isto sar e Timoteeske, o Jehova ka del tuke da blagoslov hem tlo napredok ka dikhen le sarine (1. Tim. 4:15; w22.04 27, pas. 18-19).

So ako jekh taro tle čhave vakerela kaj na mangela te služinel e Jehovaske, iako tu but trudingjan tut? Ma mislin kaj tu sian krivo. Sar sarinenge, o Jehova dengja tle čhavenge da slobodno volja — i sposobnost te birinen dali ka služinen leske ili na. Ma našav tli nadež, šaj jekh dive ka iranel pe. Setin tut ki sporedba bašo buntovno čhavo (Luka 15:11-19, 22-24). Adava terno manuš kergja but lošna bukja, ama ko krajo irangja pe. Tumenge e roditelenge tani dendi jekh but bari prednost — te bajraren neve sluge e Jehovaske (Ps. 78:4-6). Adava nane lokho, hem adaleske mangaja iskreno te pofalina tumen bašo tumaro baro trudo te pomožinen tumare čhavenge te zamangen e Jehova hem te sikaven len te oven leske poslušna. Šaj te oven sigurna kaj amaro nebesno Dad ka ovel radosno (Ef. 6:4; w22.05 30-31, pas. 16-18).

Te šaj te ovel mir hem jekhipe ko sobranie, sekova jekh amendar valjani te del plo najšukar. Razmislin bašo hristijanja taro prvo veko. Len sine len različna poklonija taro sveti duh hem različna zadače (1. Kor. 12:4, 7-11). Ama akava na sine pričina te natprevarinen pe jekh jekhea ili te keren podelbe maškar peste. Namesto adava, o Pavle pottikningja sekole jekhe lendar te keren adava soj potrebno te šaj „te izgradinen e Hristoseskoro telo“. Ov pišingja e Efešanenge: „Keda sekova jekh delo kerela pli uloga, adava pomožinela o telo te bajrol, kova so korkori peste izgradinela ko mangipe“ (Ef. 4:1-3, 11, 12). Okola hristijanja so kerena sine akava pomožinena sine te ovel mir hem jekhipe — nešto so avdive da dikhaja le ko amare sobranija. Ov odlučno te na sporedine tut e javerencar. Namesto adava, sikljov taro Isus hem trudin tut te sikave leskere osobine. Ov uverimo kaj o Jehova „nane nepravedno pa te bistrel adava so kergjan“ (Evr. 6:10). Ov tano radosno keda dikhela kaj dea tlo najšukar te šaj te kere leskiri volja (w22.04 14, pas. 15-16).

Kobor kerela amenge polokho adava so džanaja kaj na valjani te odlučina dali o Jehova ka prostinel jekhe grešnikoske ili na. Sepak, isi nešto so valjani te odlučina. Soj adava? Ko nesavo slučaj, šaj nekoj but grešingja amenge ama tegani šaj halilo kaj grešingja hem rodingja te prostina leske, a ko javer slučaj šaj na kergja adava. Čak tegani da šaj te birina te prostina leske agjaar so ko amaro vilo ka odlučina te na ikera holi sprema leste. Ama te ova iskrena, bašo adava valjani vreme hem trudo posebno ako siem sine but dukhavde taro adava. I Stražarsko kula taro 15 septemvri 1994 berš vakerela: „Ako prostinea jekhe grešnikoske, adava na značinela kaj odobrinea i greška. Jekh hristijani kova so prostinela isi le doverba ko Jehova hem adaleske mukhela adaja buti e Jehovaske ko vasta. Ov tano pravedno Sudija taro celo univerzum hem ka anel pravda ko ispravno vreme“ (w22.06 9, pas. 6-7).

O Jehova vetingja kaj ko amaro vreme ka khedel narodo tari sekoja nacija, pleme hem čhib te šaj te obožavinen le ko jekhipe. Avdive akaja posebno grupa manuša tani pendžardi sar „baro mnoštvo“ (Otk. 7:9, 10). Iako ki akaja grupa isi murša, džuvlja hem čhave taro celo sveto, sepak ola tane sar jekh familija koja so živinela ko mir (Ps. 133:1; Jovan 10:16). Sekogaš tane spremna te keren lafi sekasaja baši pumari nadež (Mat. 28:19, 20; Otk. 14:6, 7; 22:17). Ako tu da sian delo taro baro mnoštvo, sigurno i nadež kaj ka avel pošukar vreme tuke tani but skapoceno. O Satana mangela te našave tli nadež. Leskiri cel tani te čhivel tut te verujne kaj o Jehova nane te ispolninel ple vetuvanja. Ako o Satana uspejnela ko adava te našava amari nadež tegani ka našava amari hrabrost hem šaj čak te čhinava te služina e Jehovaske (w22.06 20-21, pas. 2-3).

Amari cvrsto nadež pomožinela amenge te nakha preku bare nevolje soske siem uverime kaj avena pomirna vremija. Na valjani te bistra kaj o Isus predupredingja amen kaj ka ova progonime (Jovan 15:20). Znači, adava so razmislinaja baši amari nadež pomožinela amenge ponadari da verno te služina e Jehovaske. I nadež pomožingja e Isuseske te ačhovel verno iako džanlja kaj ka ovel but mučimo hem ko krajo ka merel. Ko Pentakost 33 a.e., o apostol Petar citiringja jekh proroštvo taro psalmija kova so but šukar opišinela kobor smirimo hem uverimo sine o Isus: „A me ka živinav ki nadež soske džanava kaj nane te mukhe man ko grobo nane ni te dozvoline o telo tle verno slugaskoro te kirnjol... ka phere man bari radost keda ka tergjovav angli tute“ (Apo. 2:25-28; Ps. 16:8-11). E Isuse sine le cvrsto nadež kaj o Devel ka voskresninel le hem kaj ka ovel lea palem zaedno ko nebo (Evr. 12:2, 3; w22.10 25, pas. 4-5).

Ki jekh prilika, duj taro apostolija, o Jakov hem o Jovan, bičhalgje pumare daja te vakerel e Isuseske te čhivel len ko važna thana ko Carstvo (Mat. 20:20, 21). Akale postapkaja o Jakov hem o Jovan sikavgje kaj tane gorda hem mangle te oven považna taro javera (Izr. 16:18). Ki adaja prilika na sikavgje samo o Jakov hem o Jovan lošna osobine. Primetin sar reagiringje o javera apostolija: „Keda šungje adava, o javera deš džene holjangje e duje phralenge“ (Mat. 20:24). Šaj te zamislina amenge sar o javera apostolija rasprajngje pe e Jakovea hem e Jovanea. So kergja o Isus ki adaja situacija? Ov na holjangja. Na vakergja kaj ka rodel peske pošukar apostolija, nesave soj poponizna hem kola so sekogaš ka sikaven mangipe maškar peste. Namesto adava, strplivo kergja lencar lafi soske džanlja kaj ola mangena te postapinen ispravno (Mat. 20:25-28). O Isus sekogaš ponašingja pe ljubezno e apostolencar (w23.03 28-29, pas. 10-13).

Tu postigningjan but agjaar so redovno proučingjan i Biblija, šaj čak nekobor berša. Adava so sikliljan uveringja tut kaj i Biblija tani e Devleskoro Lafi. Ama na samo adava, tu zapoznajngjan hem zamangljan okole kastar so avela i Biblija. Tlo mangipe sprema o Jehova doborom barilo so odlučingjan te de lafi kaj ka služine leske hem te krstine tut. Adalea angjan jekh but šukar odluka! Angleder te krstine tut verojatno tli vera sine ispitimi ko različna načinija. Ama sar so nakhena o berša ka oven tut javera da ispitija. O Satana ka mangel te šudrarel tut taro Jehova hem te cidel tut lestar (Ef. 4:14). Na smejnea te mukhe te slučinel pe adava. So šaj te pomožinel tuke te ačhove verno e Jehovaske hem te ikere tut ko tlo zavet? Valjani ponadari da te de tutar sa te šaj te napredujne dži ki zrelost (Evr. 6:1; w22.08 2, pas. 1-2).

Ki familija sekole jekhe isi le odgovornost te na širinel e javerenge nesave privatna familijarna bukja. Na primer, e romnja šaj isi la nesavi navika baši koja so o rom asala. Dali ka vakerel adava e javerenge ako tano svesno kaj ka ladžakerel la? Sigurno kaj na! Ov mangela ple romnja hem nikogaš na bi kerela nešto kolea so ka povredinel la (Ef. 5:33). O roditelija na valjani te bistren kaj e tinejdžerenge da valjani te sikavel pe poštovanje. Na bi ovela šukar te ponižinen pumare čhaven agjaar so ka vakeren e javerenge lengere greške (Kol. 3:21). O čhave valjani te sikljoven te čutinen ko odredena situacie, agjaar so nane te vakeren e javerenge bukja kola so šaj te ladžakeren e javeren tari familija. Ako sarine tari familija ikerena nesave kherutne bukja maškar peste tegani i familija ka ovel popaše (w22.09 10, pas. 9).

O Jehova kergja lafi e Jovea hem potsetinkergja le baši pli bari mudrost hem kaj grižinela pe sa e bukjenge so stvoringja len. Ov spomningja leske but životne soj čudesna (Jov 38:1, 2; 39:9, 13, 19, 27; 40:15; 41:1, 2). O Jehova isto agjaar koristingja jekhe verno terne sluga kova so vikinela pe Eliu te šaj te utešinel le hem te ohrabrinel le. Ov uveringja e Jove kaj o Jehova sekogaš nagradinela ple slugen baši lengiri istrajnost. Ama o Jehova isto agjaar pottikningja le te del e Jove jekh ljubezno sovet. O Eliu pomožingja e Joveske te na koncentririnel pe ki peste nego te dikhel i celo slika agjaar so setinkergja le kaj amen siem but tikne ki sporedba e Jehovaja, o Stvoriteli taro univerzum. O Jehova dengja e Jove isto agjaar zadača — valjangja te molinel pe ple trine amalenge kola so grešingje (Jov 42:8-10). Sar o Jehova pomožinela amen avdive keda doživinaja nevolje? O Jehova avdive na kerela amencar direktno lafi sar so kergja e Jovea, ama ov kerela amencar lafi preku i Biblija (Rim. 15:4; w22.08 11, pas. 10-11).

Ko sobranie ko Rim sine hem Evreija hem javera hristijanja kola so na sine Evreija. Keda na važinela sine više e Mojseeskoro zakoni o sluge e Devleskere na valjani sine više te ikeren pe ko zakoni bašo adava so te han, a so na (Mar. 7:19). Ottegani nesave Evreenge na sine problemi te han o bukja so sine angle zabranime, a javera Evreija na mangena sine te han adala bukja. Akava kergja o sobranie te delinel pe. O apostol Pavle istakningja kobor tano važno te kerel pe mir. Ov pomožingja e phralenge te dikhen kobor lošno vlijajnena asavke raspravie upro sekova jekh objaviteli hem upro celo sobranie (Rim. 14:19, 20). Ov isto agjaar sine spremno te meninel ple postapke te šaj te na sopkinkerel e javeren (1. Kor. 9:19-22). Amen da šaj te ohrabrina e javeren hem te kera mir agjaar so nane te rasprajna amen keda kerela pe lafi bašo lično vkus (w22.08 22, pas. 7).

Ako čhivaja amenge konkretno cel ki služba bašo Jehova, amen daja amendar sa te šaj te ispolnina la. O isto važinela keda čhivaja amenge cel te dža pali pravednost. O Jehova strplivo ka pomožinel amenge te napredujna ko adava (Ps. 84:5, 7). O Jehova ljubezno vakerela amenge kaj i pravednost nane tovar (1. Jov. 5:3). Ustvari, adaja tani zaštita koja so valjani amenge sekova dive. Setin tut ki duhovno voeno oprema koja so opišingja la o apostol Pavle (Ef. 6:14-18). Kova delo tari adaja oprema zaštitinela sine e vojnikoskoro vilo? Adava sine o oklop kova so pretstavinela e Jehovaskere pravedna merilija. Isto sar o oklop so zaštitinela o doslovno vilo, agjaar šaj e Jehovaskere merilija te zaštitinen tlo simbolično vilo, javere lafencar i ličnost so sian andral. Adaleske but tano važno ki tli duhovno voeno oprema te ovel isto agjaar o oklop tari pravednost (Izr. 4:23; w22.08 29, pas. 13-14).

E Devleskoro Lafi nekobor milja berša dela mudro vodstvo e verna muršenge hem džuvlenge. Ama sar šaj te ovel adava? O Jehova vodingja manušen te prepišinen o sveta spisija. Iako akala prepišuvačija sine nesovršena, ola sine but vnimatelna. Na primer, bašo Hebrejska spisija jekh izučuvači pišingja: „Sigurna siem kaj nijekh purano lil na sine doborom točno prepišimo sar o Hebrejska spisija“. Znači, šaj te ova sigurna kaj o lafija so čitinaja ki amari Biblija prenesinena o misle e Avtoreskere, e Jehovaskere. O Jehova dela amen „sekova šukar hem sovršeno poklon“ (Jak. 1:17). I Biblija tani jekh taro najšukar poklonija so dengja amen o Jehova. Taro jekh poklon doznajnaja nešto poviše bašo okova so dengja amen adava poklon. Na primer, doznajnaja kobor šukar džanela amen hem kaj džanela so valjani amenge. O isto važinela bašo okova so dengja amen i Biblija. Keda istražinaja akava poklon, amen sikljovaja but bašo Jehova. Sikljovaja kobor šukar džanela amen hem kaj džanela so valjani amenge (w23.02 2-3, pas. 3-4).

Kobor šužo vreme ka ovel keda ka počminel o voskresenie ki phuv džikote trajnena o milja berša. Sarine kastar so mulo nekoj, edvaj adžikerena palem te dikhen le. O Jehova da edvaj adžikerela te dikhel len (Jov 14:15). Šaj te zamislina amenge kobor ka ova sarine radosna keda palem ka dikha amare manglen. O pravedna ka „voskresninen životoske“ soske lengere anava tane pišime „ko lil e životoskoro“ (Apo. 24:15; Jovan 5:29). Šaj but džene taro amare mangle ka oven maškar o prva so ka voskresninen. A o nepravedna — okola so na sine len šukar prilika te zapoznajnen e Jehova hem te služinen leske angleder te meren — „ka voskresninen sudibaske“. Sa o voskresnime ka valjani te oven sikavde (Isa. 26:9; 61:11). Znači, ka valjani te organizirinel pe i najbari obrazovno programa ki celo manušikani istorija (Isa. 11:10; w22.09 20, pas. 1-2).

O Jehova sikavgja kaj isi le avtoriteti upro poviše vladetelija. Ov boringja pe e izraelconge hem pomožingja lenge te osvojnen bare delija tari Vetimi phuv (Is. Nav. 11:4-6, 20; 12:1, 7, 24). O Jehova sekogaš sikavgja kaj tano Sevišno. Ki jekh prilika o vavilonsko cari o Navuhodonosor falingja pe kaj tano baro, mokjno hem slavno. Adaleske so na sine ponizno hem na priznajngja kaj samo o Devel zaslužinela i slava, o Jehova kergja te delingjovel. Otkeda sastilo, o Navuhodonosor „slavingja e Sevišno“ hem priznajngja kaj „e Jehovaskiri vlast tani večno vlast“. Isto agjaar vakergja: „Nane nikoj so šaj te čhinavel le“ (Dan. 4:30, 33-35). O psalmisti pišingja: „Radosno tano o narodo kaskoro Devel tano o Jehova, o manuša kola so ov biringja len te oven leskiri sopstvenost“ (Ps. 33: 12). Akaja tani but šukar pričina te ačhova besprekorna e Jehovaske! (w22.10 15-16, pas. 13-15).

Adaleske so but bibliska proroštvija više ispolningje pe, isi amen doverba kaj e Devleskere vetuvanja baši idnina isto agjaar ka ispolninen pe. Osetinaja amen isto sar o psalmisti kova so ki molitva vakergja e Jehovaske: „Edvaj adžikerava te spasine man, soske ko tlo lafi nadinava man“ (Ps. 119:81). Preku i Biblija o Jehova dela amen idnina hem nadež (Erem. 29:11). Amari nadež baši idnina na zavisinela taro manuša, nego taro e Jehovaskere vetuvanja. Adaleske ponadari da te bajrara amari doverba ko e Devleskoro Lafi agjaar so hor ka proučina o bibliska proroštvija. Jekh javer pričina soske šaj te ovel amen doverba ki Biblija tani adaja so pomožinela e manušenge keda šunena lakoro sovet (Ps. 119:66, 138). Na primer, o bračna parija kola so mangle te razvedinen pe akana tane radosna so primeningje o biblisko sovet. Lengere čhave radujnena pe so isi len hristijanska roditelija kola so grižinena pe lenge hem mangena len (Ef. 5:22-29; w23.01 5, pas. 12-13).

Razmislin bašo adava so kergja o Jehova baši tute. Razmislin bašo vetuvanja taro e Devleskoro Lafi kola so ispolningje pe ko tlo životo. Na primer, o Isus vetingja kaj leskoro Dad ka del tut o osnovna bukja so valjani tuke (Mat. 6:32, 33). O Isus isto agjaar uveringja tut kaj o Jehova ka del tut plo sveti duh ako molinea le bašo adava (Luka 11:13). O Jehova ikergja pe ko plo lafi. Verojatno šaj te setine tut ko javera da vetuvanja kola so ispolningja len tuke lično. Na primer, ov vetingja kaj ka prostinel tuke, kaj ka utešinel tut hem kaj ka del tut duhovno hrana (Mat. 6:14; 24:45; 2. Kor. 1:3). Keda razmislinea bašo adava so o Jehova kergja baši tute dži akana, tegani tli nadež ka ovel pocvrsto bašo adava so ka kerel baši tute ki idnina. Baš sar so vakergja o psalmisti: „Srekjno tano o manuš so nadinela pe ko Jehova, plo Devel, okova so sekogaš ačhovela verno“ (Ps. 146:5, 6; w22.10 27, pas. 15; 28 pas. 17).

Dali o proroštvo bašo obnovibe o čisto obožavibe ispolninela pe ko amaro da vreme? Oja! Ko savo način? Taro 1919 berš a.e., milionja manuša tane oslobodime taro ropstvo taro Baro Vavilon — o svetsko carstvo e hovavne religijakoro. Ola tane vodime ko jekh but pošukar than tari Vetimi phuv. Vodime tane ko jekh duhovno raj (Isa. 51:3; 66:8). Taro 1919 berš a.e., e pomazanikon isi len i čest te živinen ko jekh duhovno raj. Hem sar nakhela sine o vreme, okolen so isi len nadež te živinen ki phuv, „o javera bakhre“, isto agjaar khuvgje ki akaja duhovno phuv hem uživinena ko but blagoslovija so dela len o Jehova (Jovan 10:16; Isa. 25:6; 65:13). O duhovno raj arakhljola ki celi phuv. Adaleske, bizi razlika kote živinaja, amen šaj te ova delo taro duhovno raj sa džikote aktivno poddržinaja o čačutno obožavibe (w22.11 11-12, pas. 12-15).

Dali tuke pharo te haljove kaj o Jehova postojngja „otsekogaš“? (Isa. 40:28). Bute dženenge tano pharo te haljoven akava. O Eliu bašo Devel vakergja: „O broj taro leskere berša našti te haljovel pe“ (Jov 36:26). Ama, samo adaleske so na haljovaja nešto na značinela kaj nane agjaar. Na primer, iako šaj na haljovaja šukar sar funkcionirinela i struja, dali adava značinela kaj oj na postojnela? Na. Slično, amen šaj nikogaš nane te haljova celosno sar o Jehova otsekogaš postojnela sine hem ka postojnel zasekogaš. Ama akava na značinela kaj nane agjaar. O čačipe bašo Stvoriteli na zavisinela taro adava so šaj te haljova, a so na (Rim. 11:33-36). Ov postojngja angleder sa soj ko univerzum, kote soj vklučimo o kham hem o zvezde. Hem ov postojngja angleder „te širinel o nebo“ (Erem. 51:15; w22.12 2-3, pas. 3-4).

Ponekogaš šaj ka valjani te molina amen anglo javera. Na primer, jekh phen koja so vodinela jekh biblisko kursi šaj ka vakerel e phenjake soj laja ki služba te molinel pe. Ama i phen soj laja ki služba šaj na džanela šukar e interesentka hem adaleske šaj ka mangel te molinel pe ko krajo taro kursi. Agjaar ka džanel pošukar so te vakerel baši interesentka keda ka molinel pe. Jekh phral šaj ka valjani te molinel pe ko sostanok službake ili ko sobranisko sostanok. E phralen so isi len i prednost te molinen pe na valjani te bistren koja tani i cel e sostanokoskiri. Na valjani preku i molitva te del pe sovet e sobranieske ili izvestuvanje. Obično, ko sostanokija tane odvime pandž minutija baši gili hem baši molitva. Adaleske, o phral so ka molinel pe na valjani te koristinel „but lafija“, posebno ko početok taro sostanok (Mat. 6:7; w22.07 24, pas. 17-18).

O Isus prorokujngja kaj ko posledna dive ko „razna thana“ ka oven zarazna nasvalipa (Luka 21:11). Sar adava so džanaja akava dela amen mir? Keda počminela te širinel pe nesavo nasvalipe, tegani amen na siem iznenadime. Haljovaja kaj akala bukja slučinena pe soske o Isus prorokujngja kaj ka oven asavke bukja. Adaleske mangaja te šuna e Isuseskoro sovet so dengja le okolenge so živinena ko posledna dive. Ov vakergja: „Pazinen te na daravel tumen adava“. Džikote trajnela nesavo zarazno nasvalipe, najverojatno ka našti te kera sa o bukja so keraja len sine angleder. Ama ma dozvolin adava te čhinavel tut redovno te proučine i Biblija hem te dža ko sostanokija. O iskustvija taro amare publikacie hem o videoklipija ka pomožinen tuke te na bistre kaj tle phralja hem phenja služinena e Jehovaske ponadari da iako isi len slična predizvikija (w22.12 17, pas. 4, 6).

O Jakov jasno sikavgja kaj but mangela sine ple čhave e Josife (1. Moj. 37:3, 4). Adaleske e Jakoveskere javera čhave sine ljubomorna pumare phraleske. Keda sine len prilika, ola bikingje e Josife e Madijamconge. Akala trgovcija ingargje e Josife dži ko Egipet, kote so panda jekh puti bikingje e Josife e Petefriaske, o glavno čuvari e Faraoneskoro. E Josifeskoro životo taro jekh puti meningja pe, taro najmanglo čhavo pe dadeskoro akana ulo robo ko Egipet (1. Moj. 39:1). Ponekogaš isi amen problemija so isi sa e manušen (1. Kor. 10:13). Ili šaj isi amen nevolje adaleske so siem učenikija e Isuseskere. Na primer šaj vredžinena amen, protivinena pe amenge ili čak progoninena amen baši amari vera (2. Tim. 3:12). Bizi razlika save problemea soočinaja amen, o Jehova šaj te kerel te ova uspešna (w23.01 14-15, pas. 3-4).

Ponekogaš šaj mislinaja kaj mora te kera lafi nekasaja so povredingja amen. Ama, angleder te kera adava ka ovel šukar te puča amen: „Dali džanava sa so slučingja pe?“ (Izr. 18:13). „Dali namerno manglja te povredinel man?“ (Prop. 7:20). „Dali me nekogaš kergjum nešto slično?“ (Prop. 7:21, 22). „Dali ka rešinav nešto ako kerava lea lafi ili ka kerav pobari šteta?“ Keda ka odvojna amenge vreme te razmislina bašo akala pučiba, šaj ka haljova kaj valjani te sikava mangipe amare phraleske hem te bistra adava so kergja. Hem sekova jekh lično amendar šaj te dokažinel kaj tano e Isuseskoro sledbeniko keda sikavela nesebično mangipe e javerenge iako tane nesovršena. Agjaar šaj te pomožina e javerenge te pendžaren i čačutni religija hem zaedno amencar te služinen e Jehovaske. Adaleske, te ova odlučna ponadari da te sikava mangipe palo koleste soj pendžarde o čačutne hristijanja (w23.03 31, pas. 18-19).

I Biblija pomožinela amenge te haljova kaj e Jehovaskiri najbari osobina tani o mangipe Sepak, adaleske so mangela amen, ov na phergja amen bute informaciencar kola so na valjani amenge (Jovan 21:25). O Jehova isto agjaar sikavela amenge mangipe adalea so na ponižinela amen keda komunicirinela amencar. Ov na dela amen baro spisako praviloncar hem na vakerela amenge so te kera a so na ko sekova delo taro amaro životo. Namesto adava, pottikninela amen korkori te razmislina agjaar so koristinela iskustvija, proroštvija hem korisna sovetija te šaj te pomožinel amen te ana šukar odluke. Ko asavko način e Devleskoro Lafi pottikninela amen te manga le hem taro vilo te ova leske poslušna. I Biblija sikavela kaj o Jehova but grižinela pe amenge. Sar? Ki late isi but izveštaija kote soj opišime e manušengere čuvstvija. Amen šaj te haljova akale manušen soske len da sine len „čuvstvija isto sar amare“ (Jak. 5:17). A soj panda považno keda dikhaja sar o Jehova ponašingja pe e manušencar soj slična sar amende, amen panda poviše šaj te haljova kaj „o Jehova tano pherdo sočuvstvo hem milost“ (Jak. 5:11; w23.02 6, pas. 13-15).

O posledno lil tari Biblija počminela e lafencar: „Otkrovenie taro Isus Hristos, kova so dengja le o Devel, te sikavel ple robonge o bukja so ka slučinen pe panda hari“ (Otk. 1:1). Adaleske interesinaja amen bašo nastanija so slučinena pe ko sveto hem mangaja te džana sar ola šaj te ispolninen nesavo biblisko proroštvo. Hem šaj but mangaja te kera lafi bašo asavke nastanija jekh jekhea. Keda keraja lafi bašo nesavo biblisko proroštvo na valjani te širina amaro lično mislenje bašo adava sar ka ispolninel pe. Soske? Adaleske so na mangaja te vakera nešto so ka anel podelbe ko sobranie. Na primer, šaj ka šuna sar o svetska vodačija kerena lafi bašo adava sar ka rešinen nesavo problemi hem ka anen mir hem sigurnost. Namesto te pretpostavina kaj asavke izjavaja ispolninela pe o proroštvo taro 1. Solunjanja 5:3, amen valjani te džana o najneve informacie soj ko amare publikacie. Keda keraja lafi bašo bukja so temelinena pe ko amare publikacie tegani pomožinaja e phralenge te ačhon ko jekhipe agjaar so ka razmislinen ko isto način (1. Kor. 1:10; 4:6; w23.02 16, pas. 4-5).

Soske mangea e Isuse? O Isus mangela o čačipe, i poniznost hem i pravednost. Ako mangea o čačipe hem i pravednost logično tano te mange hem e Isuse. Ov hrabro braningja o čačipe hem i pravda (Jovan 18:37). Ama sar o Isus sikavela amen te ova ponizna? O Isus ple primerea sikavgja amen sar te ova ponizna. Na primer, ov sekogaš dela sine i slava ple Dadeske, nikogaš peske (Mar. 10:17, 18; Jovan 5:19). So mislinea baši asavki poniznost? Na pottikninela tut li te mange e Devleskere Čhave hem te dža palo leskoro primer? Sigurno kaj oja. Soske o Isus tano ponizno? Adaleske so mangela ple Dade kova soj ponizno hem džala palo leskoro primer (Ps. 18:35; Evr. 1:3). Na privlečinela tut li akava ko Isus, kova so sovršeno sikavela e Jehovaskere osobine? (w23.03 3-4, pas. 6-7).

I Biblija kerela lafi bašo duj grupe manuša kola so ka voskresninen, adala tane o pravedna hem o nepravedna, kaske so ka ovel dendi prilika večno te živinen ki phuv. O pravedna tane okola so verno služingje e Jehovaske džikote sine dživde. A o nepravedna na služingje e Jehovaske. Adaleske so o solduj grupe ka voskresninen, šaj li te vakerel pe kaj lengere anava tane pišime ko lil e životoskoro? O anava taro pravedna sine pišime ko lil e životoskoro džikote sine dživde. Dali lengere anava sine cidime taro adava lil keda mule? Na, soske ola ponadari da tane dživde anglo Jehova. O Jehova „nane Devel e mulengoro nego e dživdengoro, soske leske ola sarine tane dživde“ (Luka 20:38). Akava značinela kaj keda o pravedna ka voskresninen ki phuv lengere anava ponadari da ka oven pišime ko lil e životoskoro, iako samo molivea (Luka 14:14; w22.09 16, pas. 9-10).

O Jehova stvoringja but bukja hem ov manglja o prvo manuš te uživinel ki lende. O Devel čhivgja e Adame te živinel ko jekh but šužo raj hem dengja le i zadača te grižinel pe baši leste hem hari po hari te kerel o javer da delo tari phuv raj (1. Moj. 2:8, 9). Šaj te zamislina amenge kobor o Adam sine vooduševimo džikote dikhela sine sar o rastenija pohari ikljona tari phuv hem sar o lulugja phravgjona. Koja bari prednost sine e Adame te grižinel pe baši Edensko gradina. O Jehova isto agjaar dengja e Adameske zadača te čhivel anava e životnenge (1. Moj. 2:19, 20). Ov šaj sine korkori te čhivel anava e životnenge, ama namesto adava ov dengja adaja zadača e Adameske. Angleder te čhivel nesave životnoske anav, o Adam sigurno ispitinela sine hem vnimatelno dikhela sine sar izgledinela hem so kerela adava životno. Ov verojatno but uživinela sine ko adava. Akava sigurno pomožingja leske te haljovel kobor tano mudro o Jehova hem kobor tane interesna hem šuže o bukja so stvoringja len (w23.03 15, pas. 3).

I Anglo-Amerika koja soj pretstavimi e prencar taro baro kipi tani i posledno svetsko sila koja soj prorokujmi ki Biblija (Dan. 2:31-33). Pali late nane te postojnel javer svetsko sila. Namesto adava, e Devleskoro Carstvo ka uništinel la ko Armagedon zaedno e javere vladencar (Otk. 16:13, 14, 16; 19:19, 20). Sar koristinela amenge akava proroštvo? E Danieleskoro proroštvo dela amen javer da dokaz kaj živinaja ko vreme e krajoskoro. Poviše taro 2.500 berša angleder, o Daniel prorokujngja kaj palo o Vavilon ka oven javera štar svetska sile kolen so ka ovel baro vlijanie upro e Devleskoro narodo. Osven adava, ov vakergja kaj i anglo-amerikansko svetsko sila, ka ovel i posledno lendar. Akava utešinela amen hem dela amen nadež kaj panda hari e Devleskoro Carstvo ka uništinel sa e manušikane vladen hem ka vladinel upri celi phuv (w22.07 4, pas. 9; 5, pas. 11-12).