Dekemvri

Dali o etiopsko službeniko sine čače spremno te krstinel pe? Razmislin: O Etiopjani gelo ko Erusalim te obožavinel e Devle (Apo. 8:27). Znači najverojatno ov sine jekh prozeliti kova so prifatingja i evrejsko religija. Sigurno ov doznajngja bašo Jehova taro Hebrejska sveta spisija. Sepak manglja te doznajnel poviše. Ustvari, keda o Filip arakhlja le, akava Etiopjani čitinela sine o svitok taro Isaija (Apo. 8:28). Ov manglja te doznajnel nešto poviše. Ov patujngja tari Etiopija dži ko Erusalim te šaj ko hrami te obožavinel e Jehova. O Etiopjani doznajngja taro Filip nesave neve važna čačipa, sar soj kaj o Isus tano o Mesija (Apo. 8:34, 35). Leskoro mangipe sprema o Jehova hem leskoro Čhavo barilo panda poviše. Adava pottikningja le te anel i najvažno odluka ko plo životo — te krstinel pe hem te ovel sledbeniko e Isuseskoro. O Filip dikhlja kaj akava manuš sine spremno, hem adaleske krstingja le (w23.03 8-9, pas. 3-6).

Našti te ugodina e Jehovaske ako na vakeraja o čačipe (Izr. 6:16, 17). Iako avdive bute manušenge tano normalno te hovaven, amen ko hovajbe dikhaja sar o Jehova so dikhela (Ps. 15:1, 2). Džangjola pe, amen na samo so na mangaja te hovava nego isto agjaar namerno na vakeraja nesave informacie samo te šaj o javera te aven ko pogrešno zaklučok. Isto agjaar na smejnaja te ogovorina (Izr. 25:23; 2. Sol. 3:11). Ako primetinea kaj nekoj počminela te ogovorinel, trudin tut te kere lafi bašo nešto pozitivno. Adaleske so živinaja ko sveto kote so o manuša pogrešno koristinena pli sposobnost te keren lafi mora te da amendar sa te šaj amare lafencar te kera e Jehova bahtalo. Ov ka del amen bereketi ako akava poklon koristinaja le ko ispravno način ki služba, ko amare sostanokija hem keda keraja lafi e javerencar. Keda akava lošno sveto ka ovel uništimo, ka ovel amenge but polokho te slavina e Jehova amare lafencar (Juda 15; w22.04 9, pas. 18-20).

Keda razmislinaja bašo adava kobor but mangena amen o Jehova hem o Isus pottiknime siem amen da te manga len (1. Jov. 4:10). Amen mangaja len panda poviše keda haljovaja kaj o Isus mulo amenge lično. O apostol Pavle sine svesno bašo adava hem sikavgja pli blagodarnost keda pišingja e phralenge tari Galatija: „E Devleskoro Čhavo... manglja man hem dengja plo životo mange“ (Gal. 2:20). Adaleske so o Isus dengja plo životo sar otkupnina, o Jehova privlečingja tut ki peste te šaj te ove leskoro amal (Jovan 6:44). Na radujnea tut li bašo adava so džanea kaj o Jehova dikhlja nešto šukar ki tute hem kaj platingja tuke i najbari cena te šaj te ove leskoro amal? Na bajrarela li akava tlo mangipe sprema o Jehova hem o Isus? Adaleske ka ovel šukar te puča amen: „So pottikninela man akava mangipe te kerav?“ Amaro mangipe sprema o Devel hem o Hristos pottikninela amen te manga e javeren (2. Kor. 5:14, 15; 6:1, 2; w23.01 28, pas. 6-7).

E Biblija isi la važno uloga ki e Jehovaskiri namera te pomožinel ple slugenge „te služinen leske složno“. O Jehova mukhlja poviše delija tari Biblija te oven pišime ko način so šaj te haljoven len samo o ponizna manuša (Luka 10:21). O manuša ko celo sveto čitinena i Biblija. Ama samo o ponizna manuša čače haljovena so pišinela ki late hem primeninena adava (2. Kor. 3:15, 16). Tari Biblija sikljovaja baši e Jehovaskiri mudrost. O Jehova na koristinela i Biblija te sikavel amen samo sar grupa, nego isto agjaar te šaj sekole jekhe lično te sikavel hem te utešinel. Keda čitinaja e Jehovaskoro Lafi šaj te dikha kaj ov interesinela pe sekole jekheske lično (Isa. 30:21). Kobor puti slučingja pe tuke te le i Biblija hem te čitine jekh stiho kova so ka phene sine pišimo baš tuke? Ama i Biblija tani dendi milionja manušenge, tegani sar šaj ki late te oven pišime bukja kola so baš tuke valjanena? Isi samo jekh odgovor bašo adava — i Biblija tani pišimi taro najmudro Avtori (2. Tim. 3:16, 17; w23.02 4-5, pas. 8-10).

Sar čačutne hristijanja, amen but mangaja e Jehova hem mangaja te služina leske ko najšukar način. Te šaj te uspejna ko adava valjani te čhiva amenge duhovna celija sar na primer, te razvina hristijanska osobine, te sikljova korisna veštine hem te roda načinija sar šaj te služina e javerenge. Soske valjani te manga duhovno te napredujna? I najvažno pričina tani, adaleske so mangaja te kera amare nebesno Dadeskiri volja. O Jehova tano radosno keda dikhela kaj koristinaja amare talentija hem sposobnostija najšukar so šaj ki leskiri služba. Osven adava, mangaja duhovno te napredujna te šaj ki pobari mera te pomožina amare phralenge hem phenjenge (1. Sol. 4:9, 10). Bizi razlika kobor vreme siem ko čačipe, sarine amen šaj duhovno te napredujna (w22.04 22, pas. 1-2).

O političko sistem panda hari ka napadinel e Bare Vavilone — o svetsko carstvo tari hovavni religija. Tegani ka počminel i bari nevolja. Ama, dali tegani but manuša ka počminen te služinen e Jehovaske? Na! Namesto adava, o 6 poglavje taro lil Otkrovenie vakerela amenge kaj ko adava vreme o manuša so na služinena e Jehovaske ka roden zaštita taro političko hem trgovsko sistem taro akava sveto kola soj tane sporedime planinencar. Adaleske so adala manuša nane te poddržinen e Devleskere Carstvo, o Jehova ki lende ka dikhel sar protivnikija (Luka 11:23; Otk. 6:15-17). E Jehovaskere verna sluge ka razlikujnen pe javerendar ko adava but pharo vreme keda ka ovel i nevolja. Ola ponadari da ka oven i edinstveno grupa manuša ki phuv kola so ka služinen e Jehovaske hem nane te mangen te poddržinen „e zvero“ (Otk. 13:14-17; w22.05 16-17, pas. 8-9).

Osven „o šukar haberi bašo Carstvo“, e Devleskoro narodo valjani te objavinel javer da haberi (Mat. 24:14). Ola isto agjaar valjani te poddržinen e angelengiri zadača koja soj tani opišimi taro 8 dži ko 10 poglavje ko lil Otkrovenie. Akala angelija objavinena poviše nevolje protiv okola so otfrlinena e Devleskere Carstvo. Adaleske, e Jehovaskere svedokija objavinena jekh haberi baši osuda, kova soj sporedimo sar „kukudik hem jag“ hem akava haberi otkrinela e Devleskiri osuda protiv o različna delija taro e Satanaskoro lošno sveto (Otk. 8:7, 13). O manuša valjani te džanen kaj o krajo tano paše te šaj te keren bare promene ko plo životo hem te preživinen o dive tari e Jehovaskiri holi (Sof. 2:2, 3). Ama akava haberi na svidžinela pe bute dženenge, adaleske valjani te ovel amen hrabrost te šaj te objavina le. Ki bari nevolja, o posledno haberi baši osuda ka ovel panda podirektno (Otk. 16:21; w22.05 7, pas. 18-19).

Razmislin keda jekh bračno pari taro amare phralja ovena roditelija. Beršencar šaj šungje but govorija bašo adava sar te bajrarel pe čhaven. Ama akana o načelija so šunena len počmingje te oven lenge panda považna. Akana ola ka valjani te bajraren pumare čhaven. Adaja tani jekh bari odgovornost! Džangjola pe, keda meninena pe amare okolnostija, nesave bibliska načelija ovena amenge považna. Adaja tani jekh pričina soske e Jehovaskere sluge čitinena i Biblija hem hor razmislinena bašo adava „sekova dive“ taro pumaro životo, sar so sine vakerdo e Izraelsko carenge te keren adava (5. Moj. 17:19). Tumen o roditelija, isi tumen bari čest te sikaven tumare čhaven bašo Jehova. Ama nane dovolno te vakeren lenge samo nesave informacie bašo Devel, nego valjani te pomožinen lenge te mangen le taro vilo (w22.05 26, pas. 2-3).

Nane dovolno te ovel amenge žal bašo greške so kergjem len. Amen mora te kera nešto. Važno buti so lela ko predvid o Jehova keda odlučinela te prostinel tani dali nekoj čhinavgja te kerel lošna bukja hem počmingja te živinel ko način sar so mangela o Jehova (Isa. 55:7). Ov mora te meninel o način sar razmislinela te šaj e Jehovaskoro razmisluvanje te vlijajnel upri leste (Rim. 12:2; Ef. 4:23). Mora odlučno te čhinavel te razmislinel hem te postapinel ko lošno način (Kol. 3:7-9). Džangjola pe, glavno pričina soske o Jehova prostinela amenge hem cidela amendar o grevo tano adava so isi amen vera ki otkupnina. Keda o Jehova dikhela kaj iskreno trudinaja amen te kera promene, tegani preku i otkupnina prostinela amenge (1. Jov. 1:7; w22.06 6, pas. 16-17).

Panda taro vreme keda o Adam hem i Eva buningje pe protiv o Jehova o manuša ponašinena pe lošno jekh jekhea (Prop. 8:9). Na primer, okolen so isi len avtoriteti koristinena le te šaj te ponašinen pe lošno e javerencar. O kriminalcija postapinena nasilno, nesave čhave ki škola maltretirinena ple součenikon hem nesave manuša čak ponašinena pe grubo ple familijaja. Adaleske ni hari na iznenadinela amen kaj o manuša darana jekh jekhestar! Sar koristinela o Satana akaja dar te šaj te peravel amen? O Satana koristinela i dar taro manuš te šaj te čhinavel amen te propovedina hem te kera adava so rodela amendar o Jehova. Ov vlijajngja upro but vlade te šaj te zabraninen amare aktivnostija hem te progoninen amen (Luka 21:12). Ko e Satanaskoro sveto but manuša namerno širinena pogrešna informacie hem hovajba bašo e Jehovaskere svedokija. Okola so verujnena ko asavke hovajba šaj te asan amenge ili čak fizički te napadinen amen (Mat. 10:36). Dali valjani te ova iznenadime taro e Satanaskere taktike? Ni hari. Ov kerela sine više o ista bukja ko prvo veko (Apo. 5:27, 28, 40; w22.06 16, pas. 10-11).

Koj ka oven maškar o adala „but džene“ kola so ka oven ande dži ki pravednost? Ki adaja grupa ka oven okola so ka voskresninen hem isto agjaar okola so ka preživinen o Armagedon zaedno e čhavencar so ka bijangjoven ko nevo sveto. Dži ko krajo taro milja berša sa okola so ka oven dživde ki phuv ka oven sovršena. Na valjani te bistra kaj ako nekoj tano sovršeno na značinela kaj avtomatski ka dobinel večno životo. Razmislin bašo Adam hem i Eva. Iako ola sine sovršena sepak valjani sine te sikaven kaj tane poslušna e Jehovaske te šaj te dobinen večno životo. Ama žalno tano adava so ola na sine leske poslušna (Rim. 5:12). Adaleske so ko krajo taro milja berša sarine ka oven sovršena, dali adava značinela kaj sa adala sovršena manuša ka poddržinen e Jehova ki celo večnost? Ili nesave lendar ka oven sar o Adam hem i Eva kola so iako sine sovršena na ačhile verna? Valjani te odgovorinel pe ko akala pučiba (w22.09 22-23, pas. 12-14).

Keda dikhea o problemija ko sveto šaj tuke pharo te verujne kaj o bukja ka oven pošukar. Ki familija o mangipe šudrola, o manuša ovena sa ponasilna hem posebična hem bute dženenge tano pharo te verujnen okolenge soj ki vlast. Ama sa akava šaj te uverinel tut kaj o bukja ka oven pošukar. Soske? Adaleske so o manuša tane baš asavke sar so sine vakerdo ko proroštvo bašo „posledna dive“ (2. Tim. 3:1-5). Nijekh iskreno manuš našti te vakerel kaj akava proroštvo na ispolninela pe. A adava sikavela kaj o Isus više vladinela sar cari ko e Devleskoro Carstvo. Ama akava tano samo jekh taro but proroštvija bašo Carstvo. Sa akala proroštvija odgovorinena jekh jekhea sar delija tari složuvalka te šaj te den amen jasno slika ko kova vreme živinaja (w22.07 2, pas. 1-2).

Keda počmingja i pandemija KOVID-19, dobingjem upatstvija sar te ikera amare sostanokija hem sar te kera amari služba. But sigate počmingjem te ikera amare sostanokija hem kongresija preku internet. Isto agjaar počmingjem te svedočina preku pismija hem telefonija. O Jehova nagradingja amaro trudo. Ko but podružnice barilo o broj e objavitelengoro. Ustvari, bute dženen sine len ohrabruvačka iskustvija. Ko adava periodi nesave šaj mislinena sine kaj i organizacija dela amen previše upatstvija povrzime e pandemijaja. Ama sar nakhela sine o vreme sa pojasno sine kaj o upatstvija so dobingjem len sine mudra. Hem džikote razmislinaja bašo način sar o Isus vodinela ple narodo, uverime siem kaj bizi razlika so ka slučinel pe ki idnina, o Jehova hem leskoro manglo Čhavo ka oven amencar (Evr. 13:5, 6; w22.07 13, pas. 15-16).

Osven so valjani te falina e Jehova ko amare molitve, amen siem isto agjaar pottiknime te blagodarina leske bašo but šuže bukja so dela amen. Na primer, šaj te blagodarina leske bašo šuže boe so dikhaja len ko lulugja, bašo različno vkusno hajbe hem bašo amare paše amala kola so kerena amen radosna. Amaro Dad dela amen sa akava hem panda but javera bukja te šaj te ova radosna (Ps. 104:12-15, 24). A soj najvažno, blagodarna siem e Jehovaske so dela amen barvali duhovno hrana hem baši but šuži nadež. Šaj but lokheste te bistra te blagodarina e Jehovaske bašo sa so kerela amenge. So šaj te pomožinel amen te na bistra te kera adava? Šaj te kere jekh spisako taro bukja bašo kolende so molingjan tut hem palo nesavo vreme proverin so pišingjan te šaj te dikhe sar o Jehova odgovoringja ko tle molitve. Tegani blagodarin tut baši leskiri pomoš (Kol. 3:15; w22.07 22, pas. 8-9).

Amen džanaja kaj nane dovolno samo te proučina bašo čačipe. Te šaj te ovel amen celosno korist mora te živina sprema o čačipe, javere lafencar te primenina ko amaro životo adava so sikljovaja. Samo tegani ka šaj o čačipe te kerel amen radosna (Jak. 1:25). Sar šaj te džana kaj živinaja sprema o čačipe? Jekh phral vakerela kaj tano šukar lično te ispitina amen, te dikha dali primeninaja adava so sikljovaja hem kote šaj panda te podobrina amen. O apostol Pavle vakergja: „Bizi razlika kobor napredujngjem dži akana, valjani ponadari da te napredujna, te dža ko akava isto drumo“ (Fil. 3:16). Razmislin samo sar pomožinela amenge adava so daja amendar sa te živina sprema o čačipe. Na samo so ovela amen pošukar životo, nego isto agjaar keraja e Jehova radosno hem amare phralen hem phenjen (Izr. 27:11; 3. Jov. 4). Akala tane o najbare pričine te manga o čačipe hem te živina sprema o čačipe (w22.08 18-19, pas. 16-18).

Sar šaj o starešine te sikaven kaj mangena e Jehova hem e Isuse? Jekh važno način tano agjaar so grižinena pe bašo potrebe e Isuseskere bakhrengere (1. Pet. 5:1, 2). Hem baš adava o Isus jasno istakningja e Petareske. Otkeda trin puti vakergja kaj na pendžarela e Isuse, e Petare sine le bari želba te sikavel e Isuseske kaj mangela le. Otkeda voskresningja, o Isus pučlja e Petare: „Simon, čhavo e Jovaneskoro, dali mangea man?“ Šaj te ova sigurna kaj o Petar sa bi kerela sine samo te šaj te dokažinel kaj mangela ple Gospodare. O Isus vakergja e Petareske: „Arakh mle tikne bakhren“ (Jovan 21:15-17). Hem celo plo životo o Petar grižingja pe leskere bakhrenge hem agjaar sikavgja kaj mangela e Isuse. Tumen o starešine, sar šaj te sikaven kaj tumenge važna o lafija so vakergja len o Isus e Petareske? Šaj te sikaven kobor mangena e Jehova hem e Isuse agjaar so redovno ka keren pastirska posete hem ka trudinen tumen te pomožinen okolenge so nane aktivna te iranen pe ko Jehova (Ezek. 34:11, 12; w23.01 29, pas. 10-11).

Opasno tano te mislina kaj nikoj našti te haljovel amari slabost kolaja so borinaja amen. Akava šaj te kerel te mislina kaj ki amari situacija našti ništo te kera hem kaj nane amen sila te borina amen protiv akala lošna želbe. Ama i Biblija vakerela amenge nešto javer: „Nego ka pomožinel tumenge keda isi tumen iskušenie te šaj te izdržinen le“. Znači, čak keda amari želba tani silno, amen šaj uspešno te borina amen. Adaleske so pomožinela amen o Jehova šaj te izbegina te kera adava soj pogrešno. Nikogaš ma bistre, adaleske so siem nesovršena ka pojavinen pe amenge pogrešna želbe. Ama keda ka pojavinen pe šaj odlučno te otfrline len, sar so kergja adava o Josif keda odma našlja tari e Petefrieskiri romni (1. Moj. 39:12). Tle pogrešna želbe našti te kontrolirinen tle postapke! (w23.01 12-13, pas. 16-17).

Jekh osobina e Jehovaskiri tani i pravda (5. Moj. 32:4). Nekoj soj tano pravedno često tano isto agjaar nepristrasno, hem o Jehova tano baš asavko (Apo. 10:34, 35). Leskiri nepristrasnost šaj te dikha la taro adava ko save čhibja sine pišimi i Biblija. O Jehova vetingja kaj ko posledna dive „o čačutno pendžaribe“ so arakhljola ki Biblija „ka bajrol“. But džene ka haljon adava čačipe (Dan. 12:4). Jekh način sar o pendžaribe barilo tano agjaar so prevedingja pe, izdajngja pe hem dengja pe Biblie hem biblisko literatura. Ama e Jehovaskoro narodo dži akana prevedingja e Devleskoro Lafi, celosno ili nesave delija lestar, ko poviše taro 240 čhibja hem sekoj šaj besplatno te dobinel i Biblija. Adaleske o manuša taro sa o nacie ka šunen „o šukar haberi bašo Carstvo“ angleder te avel o krajo (Mat. 24:14). Amaro Devel soj pravedno mangela te del so poviše manušenge i prilika te pendžaren le agjaar so ka čitinen leskoro Lafi. Ov kerela adava soske but mangela amen (w23.02 5, pas. 11-12).

Dali mangea i pravednost? Sigurno kaj oja. Ama adaleske so siem nesovršena, e svetoskoro stavi baši pravednost šaj lokhe te vlijajnel upri amende (Isa. 5:20). But manuša mislinena kaj tane pravedna iako tane gorda, kritikujnena e javeren ili mislinena kaj tane pošukar e javerendar. Ama o Devel ni hari na mangela akala osobine. Keda o Isus sine ki phuv, ov osudingja e religiozna vodačen taro adava vreme soske čhivena sine pumare merilija baši pravednost (Prop. 7:16; Luka 16:15). Okova so čače tano pravedno ni hari na mangela te ovel prepravedno. I pravednost tani jekh but šuži osobina. Te ovel pe pravedno značinela te kerel pe adava soj ispravno anglo e Jehovaskere jakhja. Ki Biblija, keda kerela pe lafi baši „pravednost“ mislinela pe ko adava te živinel pe sprema e Jehovaskere uče merilija (w22.08 27, pas. 3-5).

E Isuse sine le doverba ko ple učenikija iako sine len maane (Jovan 15:16). Keda o Jakov hem o Jovan rodingje lestar te čhivel len ko jekh posebno than ko Carstvo, ov na vakergja lenge kaj taro pogrešna motivija služinena e Jehovaske hem na vakergja kaj našti više te oven apostolija (Mar. 10:35-40). Palo nesavo vreme sa e Isuseskere učenikija mukhle le i rat keda astargje le (Mat. 26:56). Ama o Isus na čhinavgja te verujnel lenge. Ov šukar džanela sine lengere slabostija ama manglja len dži ko krajo (Jovan 13:1). Otkeda voskresningja, ov čak dengja ple 11 apostolenge jekh bari odgovornost, te predvodinen ko propovedibe hem te grižinen pe bašo leskere skapocena bakhre (Mat. 28:19, 20; Jovan 21:15-17). Le sine le šukar pričine te verujnel akale nesovršena manušenge. Sarine ola ačhile verna dži ko krajo taro plo životo. O Isus sikavgje amenge kaj šaj te ovel amen doverba ko nesovršena manuša (w22.09 6, pas. 12).

Keda siem uverime kaj o Jehova mangela amen hem poddržinela amen, o Satana našti te daravkerel amen. Na primer, o pisateli taro 118-to Psalm nakhlja taro but phare situacie. Le sine le but dušmanja, a nesave lendar sine but važna manuša (stihija 9 hem 10). Ponekogaš sine le baro pritisok taro javera (stiho 13). Hem dobingja strogo ukor taro Jehova (stiho 18). Sepak, adava psalmisti sine pottiknimo te vakerel: „Nane te darav“. Ov džanlja kaj iako o Jehova ukoringja le, sepak ov mangela le sine. O psalmisti sine uverimo kaj bizi razlika tari koja situacija nakhela, leskoro Devel so but mangela le sekogaš tano spremno te pomožinel leske (Ps. 118:29). Valjani te uverina amen kaj o Jehova mangela sekole jekhe amendar. Akava ka pomožinel amenge te pobedina i dar ko trin situacie: 1) keda daraja kaj našti te grižina amen amare familijake, 2) keda daraja taro manuša hem 3) keda daraja taro meribe (w22.06 15, pas. 3-4).

Valjani te ova sigurna kaj i služba bašo Jehova tani amenge ko prvo than. Adaleske so o Jehova stvoringja amen ov zaslužinela te obožavina le (Otk. 4:11; 14:6, 7). Znači, i najvažno buti ko amaro životo valjani te ovel te obožavina e Jehova ko način ov sar so mangela, „duhoja hem čačipaja“ (Jovan 4:23, 24). Amen dozvolinaja o sveti duh te vodinel amen te šaj amaro obožavibe te ovel sprema o čačipe so arakhljola ko e Devleskoro Lafi. O obožavibe valjani te ovel amenge ko prvo than čak ako živinaja ki phuv kote so amare aktivnostija tane ograničime ili zabranime. Ko akava momenti poviše taro 100 phralja hem phenja tane phanle ko zatvor adaleske soj tane e Jehovaskere svedokija. Čak ko asavke okolnostija tane radosna hem kerena sa so šaj te molinen pe, te proučinen hem te vakeren e javerenge bašo e Devleskoro Carstvo. Keda o manuša kritikujnena amen ili progoninena amen šaj te ova radosna soske džanaja kaj o Jehova tano amencar hem kaj ov ka nagradinel amen (1. Pet. 4:14; w22.10 9, pas. 13).

Ko lil Izreki o Jehova dela praktična sovetija kola so ako primeninaja len ka ovel amen pošukar životo. Te dikha duj asavke sovetija. Prvo, ov zadovolno adalea so isi tut. Ko Izreki 23:4, 5 isi akava sovet: „Ma trudin tut te khede barvalipe... soske phravela pe paka sar orlo hem letinela upre ko nebo“. Sepak, hem o barvale hem o čorole tane preokupirime te zarabotinen pare. Adaleske ola but puti kerena bukja kolencar so ruminena pumaro anav, pumaro amalipe hem kerena šteta pumare sastipaske (Izr. 28:20; 1. Tim. 6:9, 10). Dujto, razmislin angleder te kere lafi. Ako na pazinaja šaj te kera bari šteta amare lafencar. Ko Izreki 12:18 pišinela: „O lafija soj vakerde bizo te mislinel pe posavena sar mači, ama i čhib e mudro manušengiri sasljarela“. Keda na keraja lafi javerencar bašo nekaskere maane, amen ačhovaja ko mir e phralencar (Izr. 20:19; w22.10 21, pas. 14; 22, pas. 16-17).

O Ezekiel valjani sine celosno te haljol o haberi kova so valjani sine te objavinel le. Valjani sine te ovel delo lestar te šaj te vlijajnel ko leskere najhor čuvstvija, hem adava te pottikninel le te propovedinel. Tegani slučingja pe nešto so na očekujngja, ov halilo kaj o svitok „sine gudlo sar avgin“ (Ezek. 3:3). Soske? I čest te pretstavinel e Jehova sine leske gudli, ili but šužo iskustvo (Ps. 19:8-11). Ov sine blagodarno so o Jehova biringja le te služinel sar leskoro proroko. Pokasno, o Jehova vakergja e Ezekieleske: „Sa o lafija so vakerava len čhiv len tuke ko vilo hem šun šukar“ (Ezek. 3:10). O Jehova vakergja leske adava te šaj te trudinel pe te pamtinel o lafija taro svitok hem hor te razmislinel baši lende. Keda o Ezekiel kergja adava leskiri vera uli pozorali. Isto agjaar, ko adava svitok sine jekh silno haberi kova so valjani sine te vakerel pe e manušenge (Ezek. 3:11). Keda o Ezekiel celosno halilo e Devleskoro haberi hem verujngja ki leste, ov sine spremno te počminel ple zadačaja hem te završinel la (w22.11 6, pas. 12-14).

Ako o promene so ovena ki organizacija čhivena ko ispit tli vernost, so valjani te kere? Celosno poddržin o promene ki organizacija. Džikote patujnena sine ki pustina, nesave so avena sine tari familija taro Kat phiravena sine o kovčeg (4. Moj. 3:29, 31; 10:33; Is. Nav. 3:2-4). Adaja sine but bari prednost! Ama o bukja meningje pe keda o Izraelcija khuvgje ki Vetimi phuv. O kovčeg na valjani sine više te premestinel pe taro jekh ko javer than. Adaleske, nesave lendar dobingje nesave javera zadače (1. Let. 6:31-33; 26:1, 24). Nigde na pišinela kaj ola žalingje pe ili kaj rodingje považno zadača. So šaj te sikljova taro akava? Valjani celosno te poddržina o promene so kerela len e Jehovaskiri organizacija, čak okola promene so vlijajnena upro amare zadače. Radujn tut baši bilo koja zadača so isi tut. Ma bistre, o Jehova ceninela amen bašo adava save siem sar ličnost, a na bašo amare zadače. E Jehovaske tano but považno tli poslušnost tari bilo koja zadača so isi tut (w22.11 23, pas. 10-11).

O Onisifor rodingja e apostol Pavle, hem keda arakhlja le pomožingja leske ko praktično način. Adalea, o Onisifor rizikujngja plo životo. So sikljovaja taro akava? Na smejnaja te dozvolina i dar taro manuš te čhinavel amen te poddržina amare phralen kola soj progonime. Namesto adava valjani te kera sa so šaj te pomožina lenge (Izr. 17:17). Valjani te sikava lenge mangipe hem te poddržina len. Razmislin bašo phralja hem o phenja tari Rusija kola so pomožingje pumare phralenge soj phanle. Keda nesave phraleske ili phenjake sudinela pe, but phralja hem phenja avena ko sudo te šaj te poddržinen len. So sikljovaja taro akava? Na valjani te dara keda amare odgovorna phralja tane pogrešno obvinime, phanle ili progonime. Namesto adava molin tut lenge, grižin tut lengere familijake hem razmislin sar šaj praktično te pomožine lenge (Apo. 12:5; 2. Kor. 1:10, 11; w22.11 17, pas. 11-12).

E starešinen isi len odgovornost te pomožinen e objavitelenge ko duhovno hem ko emocionalno pogled (1. Pet. 5:2). Odma pali katastrofa o starešine pomožinena e phralenge te oven bezbedna, te ovel len hajbaske, šeja hem than kote so šaj te garaven pe. Ama e phralenge ka valjanel masekoncar palo adava duhovno hem emocionalno poddrška (Jovan 21:15). O Harold, kova so služinela ko Odbor e podružnicakoro hem kova so kergja lafi bute phralencar hem phenjencar so doživingje prirodno katastrofa, vakerela: „Valjani te nakhel vreme te šaj te osetinen pe pošukar. Ola šaj ka počminen te živinen sar angleder ama našti lokhe te bistren ako mulo lendar nekoj, ako našavgje nešto skapoceno so sine len ili ako lengoro životo sine ki opasnost. Sekogaš keda ka setinen pe ko akala bukja šaj te osetinen bari dukh. Asavke čuvstvija tane normalna hem na značinela kaj nane len dovolno vera“. O starešine primeninena o sovet „te roven okolencar so rovena“ (Rim. 12:15; w22.12 22, pas. 1; 24-25, pas. 10-11).

Te šaj te pomožinel amenge te kera adava soj ispravno, o Jehova darežlivo dela amenge plo sveti duh. Keda proučinaja i Biblija, tegani dozvolinaja e Devleskoro duho te vlijajnel upri amende. Isto agjaar dobinaja sveti duh keda siem prisutna ko sostanokija. Ko asavke prilike siem amare phralencar hem phenjencar kola so isto sar amende but trudinena pe te keren adava soj ispravno hem adava ohrabrinela amen (Evr. 10:24, 25; 13:7). Hem keda taro vilo molinaja amen e Jehovaske hem rodaja lestar pomoš baši nesavi slabost, ov ka del amen sila preku plo sveti duh te šaj ponadari da te borina amen. Iako akala aktivnostija verojatno nane celosno te ciden amendar o pogrešna želbe, ama ola šaj te pomožinen amenge te ovel amen sila te borina amen protiv lende. Otkeda razvingjem jekh šukar duhovno rutina, but tano važno te održina la hem ponadari da te razvina ispravna želbe (w23.01 11, pas. 13-14).

Iako i Biblija nane priračniko bašo sastipe hem ishrana, sepak vakerela amenge sar o Jehova razmislinela bašo akala bukja. Na primer, o Jehova predupredinela amen te cida amen taro lošna bukja so šaj te keren šteta amare teloske (Prop. 11:10). I Biblija vakerela te na preterina hajbaja hem pijbaja alkohol soske akala bukja šaj te keren šteta amare sastipaske pa čak te mudaren amen (Izr. 23:20). O Jehova očekujnela amendar te sikava samokontrola keda odlučinaja so haja hem kobor haja hem pijaja (1. Kor. 9:25). Šaj te ana odluke kola so sikavena kaj but ceninaja amaro životo sar poklon taro Devel agjaar so ka ova pronikliva (Ps. 119:99, 100; Izr. 2:11). Na primer, šukar ka razmislina bašo adava so haja. Ako mangaja jekh hajbe, a džanaja kaj tano štetno amenge, tegani ka izbegina le. Isto agjaar sikavaja proniklivost agjaar so dovolno sovaja, redovno vežbinaja, isi amen šukar navike baši lično higiena hem ikeraja amaro kher čisto (w23.02 21, pas. 6-7).

Sar šaj te arakhe skapocena pouke džikote čitinea i Biblija? Razmislin bašo adava so pišinela ko 2. Timotej 3:16, 17: „Celo Lil... korisno tano“ 1) te del pouke, 2) te sikavel amenge soj tano pogrešno, 3) te isprajnel sa o bukja hem 4) te sikavel sar te živinel pe pravedno. Šaj te ovel tut korist taro akala štar bukja čak taro bibliska lila so na čitinea len često. Proučin o izveštaj te šaj te dikhe save pouke šaj te del tut bašo Jehova, baši leskiri namera ili bašo bibliska načelija. Razmislin sar pomožinela tuke te otkrine kola bukja tane pogrešna. Akava šaj te kere agjaar so ka primetine sar o stihija pomožinena tuke te otkrine hem te otfrline pogrešna želbe ili stavija hem te ačhove verno e Jehovaske. Ispitin sar šaj te koristine o stiho te šaj te isprajne o pogrešna stavija, na primer te isprajne nesavo stavi so šungjan le ki služba. Hem dikh sar o stihija pomožinena tuke te živine pravedno sar so mangela o Jehova. Ako ikerea tut ko akala štar bukja ka arakhe skapocena pouke kola so ka keren tlo čitibe i Biblija panda pokorisno (w23.02 11, pas. 11).

Jekh proroštvo taro lil Daniel vakerela kaj o Isus ka počminel te vladinel ko Carstvo keda ka završinel o periodi so vikinela pe efta vremija. Dali šaj te džana keda slučingja pe adava? (Dan. 4:10-17). O „efta vremija“ pretstavinena periodi taro 2.520 berša. Adava periodi počmingja ko 607 berš a.a.e., keda o Vaviloncija cidingje e posledno care taro e Jehovaskoro prestol ko Erusalim. A završingja ko 1914 berš a.e., keda o Jehova čhivgja e Isuse — okova so isi le zakonsko pravo — te ovel Cari ko e Devleskoro Carstvo (Ezek. 21:25-27). Sar koristinela amenge akava proroštvo? Ako haljovaja o proroštvo bašo „efta vremija“, ka ova uverime kaj o Jehova ispolninela ple vetuvanja točno ko vreme. O Jehova odredingja vreme keda ka kerel e Isuse Cari ko e Devleskoro Carstvo. Hem keda alo adava vreme, o Jehova kergja adava. Adaleske šaj te ova sigurna kaj o javera da proroštvija ka ispolninen pe ko vreme kova so odredingja le. Šaj te ova uverime kaj e Jehovaskoro dive „nane te kasninel“! (Avak. 2:3; w22.07 3, pas. 3-5).