„Kaj sine o Devel?“

KEDA OVENA LOŠNA BUKJA, DALI PUČEA TUT: „KAJ SINE O DEVEL?“ ILI AKO TU DOŽIVINGJAN NESAVO PHARIPE KO ŽIVOTO ŠAJ PUČEA TUT: „DALI E DEVLESKE TANO GAJLE BAŠI MANDE?“

Šaj osetinea tut sar i Šila, koja so živinela ki Amerika. Oj barili ki familija koja so but verujnela sine ko Devel. I Šila vakerela: „Panda sar čhavo verujnava sine kaj postojnela Devel hem kaj ov stvoringja amen. Sepak, nikogaš na osetingjum man paše lea. Mislinava mange sine kaj ov primetinela man, ama kaj nane leske gajle baši mande. Na mislinava sine kaj mrzinela man, ama ni na mislinava sine kaj mangela man“. Soske i Šila sumninela pe sine kaj o Devel mangela la? Oj vakerela: „Sar familija slučingje pe amenge but lošna bukja hem izgledinela sine sar te phene o Devel ni hari na pomožinela amen“.

Šaj tu da verujnea kaj postojnela Devel. Sepak šaj pučea tut dali ov čače grižinela pe baši tuke. O pravedno manuš da o Jov sumningja pe iako verujnela sine kaj e Devle isi le mokj hem mudrost (Jov 2:3; 9:4). Otkeda slučingje pe leske nekobor tragedie jekh palo jekh hem mislinela sine kaj nane nisavo rešenie baši leskiri situacija, o Jov pučlja e Devle: „Soske iranea tlo muj mandar hem ki mande dikhea sar tlo dušmani?“ (Jov 13:24).

Sprema i Biblija dali o Devel tano krivo bašo lošna bukja so slučinena pe? Isi li dokazija kaj o Devel grižinela pe sa e manušenge, ama hem sekole jekheske lično? Sar šaj te džane dali o Devel primetinela tut, haljola tut, sikavela tuke sočuvstvo hem pomožinela tut te ikljove ko krajo e problemencar?

Ko sledna statie ka dikha sar o način sar stvoringja amen o Devel sikavela kaj ov grižinela pe amenge (Rimjanja 1:20). Isto agjaar ka dikha nesave bukja tari Biblija kola so sikavena kaj o Devel interesinela pe e manušenge. Kobor pošukar zapoznajnea e Devle preku leskere stvorime bukja hem preku leskoro Lafi, doborom pouverimo ka ove kaj ov grižinela pe tuke (1. Jovaneskoro 2:3; 1. Petareskoro 5:7).