Dali o Devel primetinela tut?

SO SIKAVELA AMENGE O NAČIN SAR SIEM STVORIME

O prva 60 minutija otkeda o bebe ka bijangjovel tane važna te šaj te prilagodinel pe ko životo avri tari matka e dajakiri. Adaleske tano but važno i daj te ovel paše ple bebea soske adava but ka pomožinel e bebeske te bajrol sar so valjani.a

So pottikninela jekhe daja mangipaja te grižinel pe ple bebeske? Ko jekh spisanie, i profesorka Dženet Krenšo objasninela kaj otkeda jekh džuvli bijanela bajrola o hormoni oksitocin „kova so kerela o čuvstvija e dajakere te oven posilna džikote astarela le, dikhela le hem dela le te piel thud“ (The Journal of Perinatal Education). Jekh javer hormoni so isi ko telo e dajakoro ko akava periodi „pomožinela [lake] te grižinel pe ple bebeske“ hem te osetinel pe radosno keda tani lea. Soske akava tano važno?

Adava so i daj hem i daj tane doborom paše, avela taro amaro manglo Devel o Jehova kova so kergja sa.b O cari o David vakergja kaj o Devel „ikalgja le taro e dajakoro vogi“ hem kaj kergja te osetinel pe sigurno ki angali ple dajakiri. Ov molingja pe: „Taro mlo bijandipe grižinea tut mange, tu više sian mo Devel taro vreme keda sium sine ko mle dajakoro vogi“ (Psalm 22:9, 10).

RAZMISLIN: Ako o Devel kergja mangipaja i daj te grižinel pe ple bebeske, kobor poviše o Devel grižinela pe sekole jekheske amendar sar leskere čhave! (Apostolija 17:29).

SO VAKERELA AMENGE I BIBLIJA

O Isus Hristos, kova so pendžarela e Stvoritele pošukar taro bilo koj javer, vakergja: „Na bikinena pe li duj čiriklja jekhe tikne parake? Sepak ni jekh lendar na perela ki phuv bizo te džanel tumaro Dad. A tumenge čak sekoja bal taro šero tani gejmi. Adaleske, ma daran, tumen vredinena poviše taro but čiriklja“ (Matej 10:29-31).

Hari manuša primetinena sekole tikne čiriklja, a nesave ni na dikhena keda jekh čirikli perela ki phuv. Ama, amaro Dad soj ko nebo primetinela sekole tikne čiriklja. Ni jekh čirikli, pa čak ni but čiriklja, nane leske povredna taro manuš. Znači, taro akava sikljovaja kaj nikogaš na valjani te dara kaj o Devel na primetinela amen. Ustvari, amen siem leske but važna!

I Biblija uverinela amen

• „E Jehovaskere jakhja tane ko sekova than, dikhena hem e lošna hem e šukar manušen“ (IZREKI 15:3).

• „O jakhja e Jehovaskere dikhena e pravednikon hem leskere kana šunena keda ola rodena lestar pomoš“ (PSALM 34:15).

• „Ka radujnav man bašo tlo verno mangipe, adaleske so tu dikhljan mli nevolja. Tu džanea kobor mange pharo“ (PSALM 31:7).

„MISLINAVA SINE KAJ O JEHOVA NA MANGELA MAN“

Dali ka meninel pe amenge nešto ko životo ako džanaja kaj o Devel interesinela pe amenge bašo amaro šukaripe hem kaj mangipaja grižinela pe amenge? Oja, ake jekh primer. I Hanac tari Anglija, vakerela:

„But puti mislinava sine kaj o Jehova na mangela man hem kaj na odgovorinela ko mle molitve. Mislinava sine kaj adava šaj tano agjaar adaleske so nane man dovolno vera. Sine man čuvstvo kaj o Devel kazninela man hem kaj na primetinela man adaleske so na sium leske važno. Mislinava sine kaj e Devleske ednostavno nane gajle baši mange“.

Ama, avdive i Hana na mislinela više agjaar. So meningja pe? Oj vakerela: „Mlo stavi meningja pe hari po hari. Setinava man ko jekh biblisko govor angleder but berša kova so kerela sine lafi baši otkupno žrtva e Isuseskiri. Adava govor but vlijajngja upri mande hem uveringja man kaj o Jehova mangela man. Hem keda ka dobinav sine odgovor ko mle molitve, but puti rovava sine soske haljovava sine kaj o Jehova čače mangela man. Isto agjaar, adava so proučinava sine i Biblija hem džava sine ko hristijanska sostanokija pomožingja mange te sikljovav poviše bašo Jehova, bašo adava savo tano hem bašo adava sar dikhela ki amende. Akana šaj jasno te dikhav kaj o Jehova mangela amen hem poddržinela amen, ama hem kaj grižinela pe sekole jekheske amendar“.

Akala lafija čače ohrabrinena. Ama, sar šaj te ove sigurno kaj o Devel haljola sar osetinea tut hem kaj tle čuvstvija leske važna? O odgovor ko akava pučibe šaj te doznajne le ki sledno statija.