Dali o Devel haljola tut?

SO SIKAVELA AMENGE O NAČIN SAR SIEM STVORIME

Razmislin bašo adava kobor tane paše o manuša soj identična bliznakija. Ola tane povrzime ko jekh posebno način. I Nensi Segal, koja soj tani direktorka ko Centar bašo istražibe e bliznakon hem kola so late da isi la bliznačka, vakerela kaj nesave bliznakija čak „džanena sar i te vakeren peske nešto hem skroz te haljon pe bizo but te keren lafi“. Jekh romni objasningja kobor tane paše oj hem lakiri identično bliznačka akale lafencar: „Amen ednostavno džanaja sa jekh jekhake“.

Soske šaj o bliznakija doborom šukar te haljon pe? O istražuvanja sikavena kaj o than kote so barile hem sar sine vospitime vlijajnela upri lende, ama najviše vlijajnela adava so o identična bliznakija isi len but slična genija.

RAZMISLIN: O Devel kova so kergja akaja čudesno genetika, sigurno najšukar pendžarela sekole manuše. O psalmisti o David pišingja: „Arakhljan man džikote sium sine me dajake ko vogi. Mle kokala na sine tuke garavde džikote bajrovava sine ko than kote so nikoj našti sine te dikhel man... Tle jakhja dikhle man ko vogi mle dajakoro, ko tlo lil sine pišime sa o delija taro mlo telo“ (Psalm 139:13, 15, 16). Samo o Devel celosno džanela hem haljola amari genetika. Osven adava, ov džanela so doživingjem hem sar sa adava vlijajngja upri amende. Adava so o Devel doborom šukar pendžarela amen hem amari genetika, uverinela amen kaj ov celosno haljola amen.

SO VAKERELA AMENGE I BIBLIJA

O David molingja pe: „Jehova, tu dikhljan hor ki mande hem tu pendžarea man. Tu džanea keda bešava hem keda uštava, hem tu čak dural džanea so isi man ki godi. Panda angleder te vakerav nešto, tu Jehova, više džanea so mangava te vakerav“ (Psalm 139:1, 2, 4). Isto agjaar, o Jehova džanela so isi amen hor ko vilo, pa čak džanela sa amare misle hem želbe (1. Letopisi 28:9; 1. Samoilova 16:6, 7). So sikavena amenge akala stihija bašo Devel?

Čak hem keda na vakeraja ki molitva e Devleske adava so mislinaja hem so osetinaja, ov dikhela so keraja ama hem haljola soske keraja nešto. Isto agjaar, ov dikhela kola šukar bukja bi mangaja te kera len, čak keda baši amari nesovršenost našti te kera adava so bi mangaja te kera. Hem adaleske so o Devel stvoringja amen agjaar te šaj te osetina mangipe, ov mangela te džanel amare misle hem amare motivija hem radujnela pe keda keraja sa taro mangipe (1. Jovaneskoro 4:7-10).

I Biblija uverinela amen

• „E Jehovaskere jakhja dikhena okolen soj pravedna hem leskere kana šunena lengere molitve vakerde taro vilo“ (1. PETARESKORO 3:12).

• O Devel vetinela: „Ka pomožinav tut te haljove o bukja hem ka sikavav tut bašo drumo palo kova so valjani te dža. Ka dav tut sovet, mli jakh ka ovel upri tute“ (PSALM 32:8).

O DEVEL BUT ŠUKAR DŽANELA SAR I AMENGE

Dali adava so džanaja kaj o Devel haljola ki savi situacija siem hem sar osetinaja amen, šaj te pomožinel amenge polokheste te ikljova ko krajo amare problemencar? Razmislin bašo adava so ulo e Anake tari Nigerija. Oj vakerela: „Adaleske so arakhljovava sine ki phari situacija, pučava man sine dali voopšto vredinela te živinav. Sium sine udovica hem grižinava man sine me čhajake koja so sine ki bolnica adaleske so sine la hidrocefalus (odviše pani ki godi). Ko adava periodi arakhle mange rako ki godi hem valjani sine te džav ki operacija, hemoterapija hem radioterapija. Sine mange but pharo so mora sine te ovav ki bolnica ko isto vreme keda sine mi čhaj da“.

So pomožingja e Anake te nakhel sa akala pharipa? Oj phenela: „Razmislingjum bašo stihija taro Filipjanja 4:6, 7 kote so pišinela kaj ’o mir taro Devel, kova soj upreder taro adava so šaj o manuš te haljol, ka arakhel tumare vile hem tumare misle‘. Sekova puti keda ka setinav man sine ko akava stiho, osetinava man sine but paše e Jehovaja hem džanava sine kaj ov haljola man pošukar nego me korkori man. But ohrabringje man mle mangle phralja hem phenja taro hristijansko sobranie.

Iako ponadari da borinava man mle sastipaja, hem me hem mi čhaj akana siem pošukar. Adaleske so o Jehova tano amencar, siklilem te na razmislina negativno keda ka oven amen problemija. O stiho taro Jakov 5:11 uverinela amen: „Bašo okola so istrajngje vakeraja kaj tane srekjna. Šungjen kobor istrajngja o Jov hem džanena sar o Jehova blagoslovingja le ko krajo — džanena kaj o Jehova tano pherdo sočuvstvo hem milost.‘“ O Jehova celosno halilo ki savi situacija sine o Jov, a šaj te ova uverime kaj ov haljola taro so nakhela sekova jekh amendar.