Dali o Devel tano sočuvstvitelno?

SO SIKAVELA AMENGE O NAČIN SAR SIEM STVORIME

Te sikave sočuvstvo značinela te haljove sar osetinena pe o javera ili te haljove taro so nakhena agjaar so ka čhive tut lenge ko than. O doktori Rik Hanson, kova soj psihologo, vakerela kaj o sočuvstvo tano amenge ko rat.

RAZMISLIN: Soske sar manuša isi amen sposobnost te sikava sočuvstvo hem adava but poviše taro životne? I Biblija vakerela kaj o Devel stvoringja e manušen sprema leskoro liko (1. Mojseeva 1:26). Adaleske, dži negde šaj te sikava leskere osobine. Znači, keda o manuša pomožinena e javerenge adaleske so isi len sočuvstvo, tegani sikavena kaj tane sar o Devel o Jehova, kova so stvoringja len (Izreki 14:31).

SO VAKERELA AMENGE I BIBLIJA

O Devel sikavela amenge sočuvstvo hem mrzinela keda dikhela kaj cidaja muke. Na primer, ko purano vreme o Izraelcija sine robija ko Egipet hem palo adava sine len but muke džikote sine 40 berš ki pustina. I Biblija vakerela sar sine tegani e Devleske: „Ko sa o nevolje so sine len ov osetingja dukh“ (Isaija 63:9). Taro akava šaj te dikha kaj o Devel na samo so džanlja kobor lenge pharo, nego isto agjaar osetingja lengiri dukh. Ov vakergja: „Šukar džanava lengere dukha“ (2. Mojseeva 3:7). Isto agjaar, vakergja: „Koj pipinela tumen, pipinela i zenica mle jakhjakiri“ (Zaharija 2:8). Keda o javera dukhavena amen, tegani le da dukhala le.

Šaj mislinaja kaj na vredinaja hem kaj na zaslužinaja o Devel te sikavel amenge sočuvstvo. Ama, i Biblija uverinela amen kaj „o Devel tano pobaro taro amaro vilo hem ov džanela sa“ (1. Jovaneskoro 3:19, 20). O Devel pendžarela amen but pošukar nego amen korkori so džanaja amen. Ov but šukar džanela taro so nakhaja, amare misle hem sar osetinaja amen. Hem ov sikavela amenge sočuvstvo.

I Biblija uverinela amen

• „Tegani, tu ka vikine, a o Jehova ka odgovorinel tuke. Tu ka rode pomoš, a ov ka vakerel tuke: ’Ake sium!‘“ (ISAIJA 58:9).

• „’Soske me but šukar džanava save tane mle namere tumencar‘, vakerela o Jehova, ’mangava te ovel tumen mir, a na nevolja, te dav tumen idnina hem nadež. Tumen ka vikinen man, ka aven ki mande hem ka molinen tumen mange, a me ka šunav tumen‘“ (EREMIJA 29:11, 12).

• „Khede mle asva ko tlo šiši tari koža. Nane li ola pišime ko tlo lil?“ (PSALM 56:8).

O DEVEL PRIMETINELA AMEN, HALJOVELA AMEN HEM SIKAVELA AMENGE SOČUVSTVO

Dali adava so džanaja kaj o Devel sikavela amenge sočuvstvo pomožinela amenge keda isi amen problemija? Razmislin bašo e Marijakoro iskustvo:

„Mo čhavo sine duj berš nasvalo taro rako. Keda sine le 18 berš, mulo. Tegani osetingjum bari dukh hem mislingjum kaj o životo tano pharo hem nane fer. Sium sine holjami e Jehovaske soske na kergja ništo te šaj te sasljarel me čhave.

Palo šov berš, jekh amalin koja so but grižinela pe sine hem sine la sočuvstvo sprema mande, šukar šungja man džikote vakerava lake sine kaj osetinava sar te phene o Jehova na mangela man. Otkeda saatencar šungja man bizo te čhinavel man, vakergja mange o stiho taro 1. Jovaneskoro 3:19, 20 kova so khuvgja mange ko vilo. Adathe vakerela kaj ’o Devel tano pobaro taro amaro vilo hem ov džanela sa‘. Oj objasningja mange kaj o Jehova haljola amare muke.

Ama sepak me panda osetinava sine holi. Palo adava, čitingjum ko Psalm 94:19 kote so pišinela: ’Keda pherdiljum but misle so na dena man mir, tu utešingjan man hem smiringjan man‘. Osetingjum sar ka phene akala stihija sine pišime mange. Sar nakhela sine o vreme, sine mange polokho adaleske so šaj sine te vakerav e Jehovaske bašo adava so mučinela man adaleske so džanava sine kaj ov šunela man hem haljovela man“.

Kobor utešinela amen adava so džanaja kaj o Devel haljovela amen hem sikavela sočuvstvo sprema amende! Ama, ako tano adava agjaar, soske isi but muke? Dali o Devel kazninela amen bašo amare grevija? Dali ka kerel nešto te šaj te čhivel krajo e mukenge? Bašo akava ka kera lafi ko sledna statie.