Dali o muke tane kazna taro Devel?

I LUZIA LANGALA PE LEVO PREA. Sar tikni dobingja detsko paraliza, but zarazno nasvalipe kova so napadinela o nerven sistem. Keda e Luiza sine la 16 berš, jekh romni ki koja so kerela sine buti vakergja lake: „O Devel kazningja tut te ove paralizirimi adaleske so na ponašinea tut sine šukar te dajaja hem na šunea la sine“. Iako ottegani nakhle but berša, i Luzia panda setinela pe kobor dukhavgje la akala lafija.

KEDA I DAMARIS DOZNAJNGJA KAJ ISI LA RAKO KI GODI, lakoro dad pučlja la: „So kergjan pa so slučinela pe tuke akava? Sigurno kergjan nešto but lošno. Adaleske o Devel kazninela tut“. O lafija lakere dadeskere but dukhavgje la.

O manuša više beršencar verujnena kaj o nasvalipa tano kazna taro Devel. Ko jekh lil ko kova so kerela pe lafi bašo običaija ko bibliska phuvja, pišinela kaj but manuša ko vreme e Isus Hristoseskoro verujnena sine kaj „keda nekoj ka nasvaljovel adava sine kazna bašo leskere grevija ili o grevija leskere familijakere“ (Manners and Customs of Bi­ble Lands). Ko jekh javer lil vakerela kaj ko sredno veko „nesave manuša verujnena sine kaj o Devel mukhlja zarazno nasvalipe te šaj te kazninel len bašo lengere grevija“ (Medieval Medicine and the Plague). Ama keda ko 14 veko milionja manuša ki Evropa mule taro adava zarazno nasvalipe, dali o Devel agjaar kazningja e lošna manušen ili adava zarazno nasvalipe alo adaleske so sine bakterisko infekcija, sar so pokasno hem dokažingja i medicina? Avdive da nesave manuša pučena pe dali o Devel koristinela o nasvalipa te šaj te kazninel e manušen bašo lengere grevija.a

RAZMISLIN: Soske o Isus bi sasljarela sine nasvalen ako o Devel kazninela e manušen nasvalipaja hem mukencar? Dali adalea bi sikavela sine kaj o Devel nane pravedno? (Matej 4:23, 24). O Isus nikogaš na bi džala sine protiv e Devleskiri volja. Ov vakergja: „Me sekogaš kerava adava soj sprema leskiri volja hem kerava agjaar sar so zapovedingja mange o Dad“ (Jovan 8:29; 14:31).

I Biblija jasno vakerela amenge. O Jehova o Devel „nane nepravedno“ (5. Mojseeva 32:4). Na primer, o Devel nikogaš na bi kerela te perel avioni hem te meren but manuša kola so nane kriva samo adaleske so mangela te kazninel nekas soj ko adava avioni. O verno sluga e Devleskoro, o Avraam, sine uverimo kaj o Devel tano pravedno. Ov vakergja kaj o Devel nikogaš nane te mudarel „e pravedniko zaedno okolea soj lošno“ (1. Mojseeva 18:23, 25). Isto agjaar, i Biblija vakerela kaj „našti o čačutno Devel te kerel lošnipe, o Semokjno te na ovel pravedno“ (Jov 34:10-12).

SO VAKERELA AMENGE I BIBLIJA

O muke so cidaja len nane kazna taro Devel bašo nesave amare grevija. Korkori o Isus jasno vakergja akava keda ov hem leskere učenikija dikhle jekhe manuše kova so bijandilo korolo. Ki Biblija pišinela: „Leskere učenikija pučle le: ’Rabi, koj grešingja pa so akava manuš bijandilo korolo, ov ili leskere roditelija?‘ A o Isus odgovoringja lenge: ’Na grešingja ni ov, a ni leskere roditelija‘“ (Jovan 9:1-3).

Adaleske so ko adava vreme but manuša dikhena sine pogrešno ko bukja, e Isuseskere učenikija sine iznenadime keda o Isus vakergja kaj o manuš na sine korolo adaleske so ov ili leskoro dad hem i daj grešingje. O Isus na samo so sasljargja e korole manuše, nego hem ov sikavgja kaj o Devel na kazninela e manušen nasvalipaja, sar so pogrešno verujnela pe (Jovan 9:6, 7). Sa okolenge so avdive isi len phare nasvalipa, šaj te lokhjol lenge keda ka džanen kaj o Devel na anela lenge adala muke.

I Biblija uverinela amen

• „Nijekh našti iskušinela e Devle lošnipaja, a ov da na iskušinela nikas lošnipaja“ (JAKOV 1:13). Čače, o lošna bukja sar soj o nasvalipe, o muke hem o meribe vekoncar mučinena e manušen, ama panda hari o Devel ka cidel len zasekogaš.

• O Isus Hristos „sasljargja sa okolen so sine nasvale“ (MATEJ 8:16). Adalea so sasljargja sarinen so avena sine ki leste, e Devleskoro Čhavo sikavgja so ka kerel e Devleskoro Carstvo ki celi phuv.

• „[O Devel] ka kosel sekoja asvin taro lengere jakhja, hem meribe nane te ovel više, ni žalibe, ni rojbe, ni dukha. Sa so sine angle nakhlja“ (OTKROVENIE 21:3-5).

KOJ TANO KRIVO BAŠO MUKE SO CIDAJA LEN?

Soske tegani e manušen isi len doborom muke hem dukha? Akava pučibe mučinela e manušen vekoncar. Ako o Devel nane krivo bašo muke so cidaja len, tegani koj tano krivo? Ki sledno statija ka dikha o odgovorija ko akala pučiba.