Koj tano krivo bašo muke so cidaja len?

Ako o muke nane kazna taro Devel, tegani soske isi bokhalipe, čorolipe, vojne, nasvalipa hem prirodna katastrofe? E Devleskoro Lafi i Biblija, vakerela amenge trin glavna bukja soske o manuša cidena muke:

1. O manuša mangena samo pes, tane bičale jakhjakere hem mrzinena pe maškar peste. „O manuš vladinela upro manuš ki leskiri šteta“ (Propovednik 8:9). But manuša cidena muke adaleske so upro lende vladinena manuša kola soj tane nesovršena, tane lošna hem mangena samo pes.

2. O vreme hem o bukja so našti te predvidinen pe. O manuša but puti cidena muke adaleske so „o vreme hem o bukja so našti te predvidinen pe arakhena sekole manuše“ (Propovednik 9:11). Adava značinela kaj ednostavno arakhlile ko pogrešno than ko pogrešno vreme, slučingja pe nesrekja, na pazingje ili kergje nesavi greška.

3. O lošno Vladeteli akale svetoskoro. I Biblija jasno vakerela koja tani i najbari pričina soske o manuša cidena muke. Oj vakerela: „Celo sveto tano e Bengeske ko vasta“ (1. Jovaneskoro 5:19). O Beng, o Satana, tano jekh mokjno duhovno suštestvo kova soj lošno. Ko početok ov sine e Devleskoro angeli ama palo adava buningja pe protiv o Devel (Jovan 8:44). Javera da duhovna suštestvija poddržingje e Satana keda buningja pe protiv o Devel te šaj te zadovolinen pumare sebična želbe hem agjaar ule demonija (1. Mojseeva 6:1-5). Ottegani, o Satana hem leskere demonija ko jekh mokjno hem lošno način vlijajnena upro bukja ko akava sveto. Akava posebno dikhjola pe ko amaro vreme. Akana, o Beng tano but holjamo hem „hovavela celo sveto“ hem adaleske o manuša doživinena but lošna bukja (Otkrovenie 12:9, 12). Ov tano lošno vladeteli kova so uživinela te dikhel sar o manuša cidena muke. O Satana tano adava so kerela te oven muke, a na o Devel.

RAZMISLIN: Samo jekh ličnost koja soj lošno hem nane la čuvstvija šaj te kerel o manuša kola so nane kriva te ciden muke. Ama o Devel nane asavko. I Biblija vakerela kaj „o Devel tano mangipe“ (1. Jovaneskoro 4:8). Adaleske so sa so kerela tano taro mangipe, „našti o čačutno Devel te kerel lošnipe, o Semokjno te na ovel pravedno“ (Jov 34:10).

Ama, šaj pučea tut: „Panda kobor vreme o Semokjno Devel ka mukhel e Bengeske te vladinel?“ Sar so dikhlem, o Devel mrzinela o lošnipe hem but dukhala le keda isi amen muke. Isto agjaar, leskoro Lafi vakerela amenge: „Sa tumare sekiracie frden leske, soske ov grižinela pe tumenge“ (1. Petareskoro 5:7). O Devel mangela amen hem isi le mokj te cidel sa o muke hem o nepravde, akava ka dikha ki javer statija.a