O Devel panda hari ka cidel sa o muke

„Dži keda, Jehova, ka rodav pomoš, a tu nane te šune man? Dži keda ka rodav tutar pomoš adaleske so isi nasilstvo, a tu nane te kere ništo?“ (Avakum 1:2, 3). Akala lafija vakergja len o Avakum, jekh šukar manuš kova so sine manglo taro Devel. Dali akala lafija sikavena kaj le na sine le dovolno vera? Na. O Devel uveringja e Avakume kaj ov odredingja dive keda ka čhivel krajo e mukenge (Avakum 2:2, 3).

Keda tu ili nekoj taro tle paše cidela muke, tegani šaj pučea tut soske e Devleske valjani doborom but vreme te šaj te anel krajo e mukenge hem soske na kergja ništo dži akana. Ama i Biblija uverinela amen: „O Jehova na kasninela te kerel adava so vetingja, sar so nesave mislinena kaj kasninela, nego ov tano strplivo tumencar, soske na mangela nikoj te ovel uništimo, nego mangela sarinen te ovel len prilika te kainen pe“ (2. Petareskoro 3:9).

KEDA O DEVEL KA KEREL NEŠTO TE ŠAJ TE ČHINAVEL O MUKE?

Panda hari! O Isus vakergja kaj ka ovel jekh generacija koja so ka dikhel nekobor bukja so ka slučinen pe ko isto vreme hem adava ka sikavel lake kaj tano paše o „krajo akale svetoskoro“ (Matej 24:3-42). Adava so ko amaro vreme ispolninena pe e Isuseske lafija, sikavela kaj o Devel panda hari ka promeninel o bukja ko sveto.a

Ama, sar o Devel ka čhivel krajo e mukenge? Keda sine ki phuv, o Isus sikavgja kaj e Devle isi le mokj te čhivel krajo e mukenge kola so mučinen sine e manušen. Te dikha nesave primerija.

Prirodna katastrofe: Džikote o Isus hem leskere apostolija sine ko Galilejsko More, počmingja bari bura kote so šaj sine o čamco te batinel ko pani. Ama o Isus sikavgja kaj le hem leskere Dade isi len mokj upro bršim, upri bavlal hem upro javera prirodna sile (Kološanja 1:15, 16). O Isus vakergja: „Čhinav! Smirin tut!“ So ulo palo adava? „I bavlal ačhili hem uli bari tišina“ (Marko 4:35-39).

Nasvalipa: O Isus sine pendžardo palo adava so sasljarela sine e korolen, e sakaten, okolen so sine len epilepsija, lepra ili nesavo javer nasvalipe. I Biblija vakerela kaj ov „sasljarela sine e manušen taro sekova nasvalipe“ (Matej 4:23, 24; 8:16; 11:2-5).

Bokhalipe: Džikote sine ki phuv, o Isus koristingja i mokj so dengja le leskoro Dad te šaj te kerel taro hari hajbe te ovel dovolno hajbe bašo milja manuša. Ki Biblija tane pišime duj asavke situacie (Matej 14:14-21; 15:32-38).

Meribe: Ki Biblija pišinela kaj o Isus vazdingja trine dženen taro meribe. Adalea sikavgja kaj e Jehova isi le mokj te cidel o meribe. Jekh taro adala manuša so vazdingja le taro meribe sine mulo štar dive (Marko 5:35-42; Luka 7:11-16; Jovan 11:3-44).