Sar šaj te koristinel amenge o mangipe hem i griža e Devleskiri
O Devel kergja amaro telo doborom šukar so šaj korkori te sasljol. Keda čhinaja amen, grebinaja amen ili posavaja amen, tegani amaro telo sigate reagirinela te šaj te čhinavel te thavdel rat, te sasljarel i rana hem te phandel o mas.
RAZMISLIN: Ako o Devel kergja amaro telo korkori te sasljarel o rane, zarem našti te ovel amen doverba ko leskoro vetuvanje hem kaj ka sasljarel amari dukh andre ko vilo? Bašo Devel, o psalmisti pišingja: „Ov sasljarela adalen soj phage vilea hem pakjarela lengere rane“ (Psalm 147:3). Ako isi tut panda dukh adaleske so nakhljan nešto lošno, sar šaj te uverine tut kaj o Jehova ka sasljarel tle rane kola so isi tut akana hem kola so šaj ka oven tut?
SO VAKERELA AMENGE I BIBLIJA
O Devel vetinela amenge: „Ma dara, soske me sium tuja! Ma ov sekirimo, soske me sium tlo Devel! Me ka kerav tut zoralo hem ka pomožinav tuke. Ka ikerav tut mle desno pravedno vastea“ (Isaija 41:10). Keda džanaja kaj o Jehova grižinela pe amenge, tegani isi amen mir hem sila koja so pomožinela amen te nakhava o pharipa. O apostol Pavle bašo asavko mir vakergja kaj tano „o mir taro Devel, kova soj upreder taro adava so šaj o manuš šaj te haljol“. Ov pišingja: „Sa šaj te kerav, soske pomožinela mange okova so dela man sila“ (Filipjanja 4:4-7, 9, 13).
I Biblija pomožinela amen te ovel amen vera ko e Jehovaskere vetuvanja baši idnina. Na primer, ko Otkrovenie 21:4, 5 (kova soj citirimo ki sledno strana) pišinela so ka kerel o Devel hem soske šaj te verujna kaj adava čače ka ovel:
„Ov ka kosel sekoja asvin“ taro jakhja e manušengere. O Jehova ka cidel sa amare muke hem sekiracie, čak adala so e javerenge dikhjona but tikne.
„Okova so bešela ko prestol“ ki nebesno slava, o Semokjno Cari kova so kergja sa so postojnela, ka koristinel pli mokj hem vlast te šaj cidel o muke hem te pomožinel amen.
O Jehova uverinela amen kaj ko leskere lafija „šaj te verujnel pe hem tane čačutne!“ E Devleskoro anav hem adava savi ličnost tano ov, sikavela amenge kaj sa so vakergja ka ovel čače.
O Devel ka kosel sekoja asvin taro lengere jakhja, hem meribe nane te ovel više, ni žalibe, ni rojbe, ni dukha. Sa so sine angle, nakhlja. Hem okova so bešela ko prestol vakergja: „Ake! Kerava sa o bukja neve!“ Isto agjaar vakergja: „Pišin, soske ko akala lafija šaj te verujnel pe hem tane čače!“ (Otkrovenie 21:4, 5).
O stvorime bukja hem i Biblija sikavena amenge save osobine isi amare nebesno Dade. O stvorime bukja bizo te keren lafi pottikninena amen te manga te pendžara e Devle hem te ova popaše lea, a i Biblija jasno vakerela amenge te kera adava. Ki late pišinela: „Oven paše e Devlea, hem ov ka ovel paše tumencar“ (Jakov 4:8). Ko Apostolija 17:27 bašo Devel vakerela kaj „ov nane dur nikastar amendar“.
Ako odvojnea vreme te pendžare e Devle, tegani panda poviše ka ove uverimo kaj „ov grižinela pe [tuke]“ (1. Petareskoro 5:7). Sar ka koristinel tuke adava so ka džanea kaj o Jehova grižinela pe tuke?
Te dikha e Toruskoro primer tari Japonija. Iako i daj taro tiknipe sikavela le sine bašo Devel, ov ulo delo tari japonsko mafija koja so vikinela pe jakuza. Ov vakerela: „Mislingjum kaj o Devel mrzinela man hem kaj kazninela man agjaar so merena o manuša kola so sine mange paše hem okolen kas so mangava sine“. O Toru vakerela kaj i nasilno okolina hem o način sar razmislinela sine kergje le te ovel „manuš bizo vilo“. O Toru vakerela so sine leskiri cel ko životo: „Mangljum te kerav nešto kolea so o manuša ka pamtinen man — te merav terno otkeda ka mudarav nekas soj tano popendžardo mandar“.
Ama, keda o Toru hem leskiri romni i Hana počmingje te proučinen i Biblija, o Toru kergja bare promene ko plo životo hem ko način sar dikhela sine ko bukja. I Hana vakerela: „Mle jakhencar dikhava sine sar promeninela pe“. O Toru vakerela ko so tano akana uverimo: „Čače isi Devel kova so grižinela pe sekole jekheske amendar. Ov na mangela nikoj te merel hem spremno tano te prostinel sarinenge so kainena pe bašo pumare greške. Ov šunela amen keda vakeraja leske bukja kola so našti te vakera e javerenge hem kola so o javera našti te haljon len. Panda hari, o Jehova ka cidel sa o problemija, o muke hem o dukha. Ov panda avdive pomožinela amenge ko but načinija kola so ni na avena amenge ki godi. Mangela amen hem pomožinela amenge keda i amenge but pharo“ (Psalm 113:7).
E Toruskoro primer sikavela amenge kobor tano šukar adava so džanaja kaj e Devle isi le mokj te cidel sa o pharipa hem te kosel sekoja asvin. Hem adava so džanaja kaj panda hari ka kerel adava, dela amen sigurno nadež baši idnina hem pomožinela amenge te ovel amen pošukar životo panda avdive. Iako avdive ko sveto isi pherdo muke, amen šaj čače te verujna kaj o Devel mangela amen hem grižinela pe amenge.