1 | Molitva — „Sa tumare griže frden leske“
I BIBLIJA VAKERELA: „Sa tumare griže frden [e Devleske], soske ov grižinela pe tumenge“ (1. PETROVO 5:7).
So značinela akava
O Jehova mangela te kera lea lafi bašo sa o griže so mučinena amen (Psalm 55:22). Nijekh problemi nane doborom baro, a ni doborom tikno te šaj te molina amen baši leste. Ako tano adava važno amenge, važno tano e Jehovaske da. Jekh važno buti te šaj te ovel amen andruno mir tani te molina amen e Devleske (Filipjanite 4:6, 7).
Sar šaj akava te pomožinel amenge
Keda isi amen problemi e emocionalno sastipaja, šaj osetinaja amen korkori adaleske so o javera našti celosno te haljoven amen taro so nakhaja (Izreki 14:10). Ama, ako ki molitva iskreno vakeraja e Devleske sar osetinaja amen, ov sočuvstvitelno ka šunel amen hem ka haljovel amen. O Jehova dikhela amen, džanela taro so nakhaja hem džanela amari dukh hem mangela te molina amen bašo sa adava so mučinela amen (2. Letopisi 6:29, 30).
Keda molinaja amen e Jehovaske panda poviše bajrola amari doverba kaj ov grižinela pe amenge. Šaj te osetina amen isto sar o psalmisti, kova so molingja pe akale lafencar: „Tu dikhljan mli nevolja. Tu džanea o muke mle dušakere“ (Psalm 31:7). Adava so džanaja kaj o Jehova dikhela so slučinela pe amenge ko životo, šaj but te pomožinel amen keda nakhaja taro pharo periodi. Ama, ov na samo so dikhela taro so sa nakhaja, nego kerela nešto poviše. Ov haljola amen pošukar nego bilo koj javer hem utešinela amen hem ohrabrinela amen tari Biblija.