Neka ovel tut doverba ko Jehova džikote avela o krajo e svetoskoro

Panda hari o Jehova ka anel krajo akale svetoske. I hovavni religija ka ovel uništimi, jekh koalicija taro narodija ka napadinel e Devleskere narodo hem o Jehova ka uništinel e lošna manušen ko Armagedon. Amen edvaj adžikeraja te slučinen pe akala važna nastanija.

Džangjola pe, amen na džanaja sa o detalija baši bari nevolja. Na primer, na džanaja keda točno ka počminel. Na džanaja kola pričine ka vakeren o politička sile te šaj te opravdinen pe keda ka napadinen i religija. Na džanaja kobor ka trajnel o napad upro e Devleskoro narodo hem so ka ovel vklučimo ki leste. Isto agjaar, na džanaja so točno ka koristinel o Jehova te šaj te uništinel e lošna manušen ko Armagedon.

Sepak, i Biblija dela amen sa o informacie so valjani amenge te šaj te ovel amen doverba hem hrabrost. Na primer, džanaja kaj živinaja ko krajo taro „posledna dive“ (2Ti 3:1). Džanaja kaj o napad upri religija ka ovel „kratimo“ te šaj te na ovel uništimi i čačutni religija (Mt 24:22). Džanaja kaj o Jehova ka spasinel ple narodo (2Pe 2:9). Hem džanaja kaj o Jehova biringja jekhe soj tano pravedno hem mokjno so ka uništinel e lošna manušen, a ka spasinel jekhe bare mnoštvo ko Armagedon (Ot 19:11, 15, 16).

O nastanija so ka aven sigurno but ka daraven e manušen. Ama, adava so ka čitina hem ka razmislina sar o Jehova spasingja ple narodo ko purano vreme hem sar otkringja lenge so ka ovel ki idnina, ka pomožinel amenge te ovel amen doverba kaj amaro spasenie tano paše (Lk 21:26, 28).