Sar o mangipe pomožinela amenge te pobedina i dar?

1. Kola tane nesave voobičaena bukja taro kola so daraja?

RAZMISLIN bašo sledna situacie taro kola so nesave Svedokija nakhena. O Nestor hem leskiri romni i Marija, mangle te služinen ko than kote so isi pobari potreba.b Ama te šaj te keren adava valjani sine te sikljoven te živinen pohari parencar. Ola darana sine kaj šaj nane te oven čače bahtale ako kerena adava. O Biniem živinela ki phuv kote so amare aktivnostija tane zabranime hem sine svesno kaj šaj te ovel progonimo soske tano e Jehovaskoro svedoko. Adava but daravgja le. Ama, panda poviše darala sine taro adava sar ka reagirinel leskiri familija keda ka doznajnel kaj ulo e Jehovaskoro svedoko. Keda i Valeri doznajngja kaj isi la rako kova so sigate napredujnela oj but mučinela pe sine te arakhel doktori kova so ka poštujnel lakoro stavi bašo rat, normalno tano kaj darala sine te na merel.

2. Soske valjani te trudina amen te kontrolirina amari dar?

² Dali tu da darandiljan taro nešto slično? But džene amendar darandile. Ako na sikljovaja te kontrolirina amari dar, najverojatno ka ana lošna odluke kola so negativno ka vlijajnen upro amaro amalipe e Jehovaja. Baš adava mangela o Satana. Ov isto agjaar probinela te koristinel amari dar te šaj te na šuna o zapovedija e Jehovaskere maškar kova soj te propovedina o šukar haberi (Otk. 12:17). O Satana tano zlobno, bizi milost hem mokjno. Ama tu šaj te zaštitine tut lestar. Sar?

3. So ka pomožinel amenge te pobedina amari dar?

³ Keda siem uverime kaj o Jehova mangela amen hem poddržinela amen, o Satana našti te daravkerel amen (Ps. 118:6). Na primer, o pisateli taro 118-to Psalm nakhlja taro but phare situacie. Le sine le but dušmanja, a nesave lendar sine but važna manuša (stihija 9 hem 10). Ponekogaš sine le baro pritisok taro javera (stiho 13). Hem dobingja strogo ukor taro Jehova (stiho 18). Sepak, adava psalmisti sine pottiknimo te vakerel: „Nane te darav“. Soske osetingja pe doborom sigurno? Ov džanlja kaj iako o Jehova ukoringja le, sepak ov but mangela le sine. O psalmisti sine uverimo kaj bizi razlika tari koja situacija nakhela, leskoro Devel so but mangela le sekogaš tano spremno te pomožinel leske (Ps. 118:29).

4. Ako siem uverime kaj o Devel mangela amen, taro so nane te dara?

⁴ Valjani te uverina amen kaj o Jehova mangela sekole jekhe amendar. Akava ka pomožinel amenge te pobedina i dar ko trin situacie: 1) keda daraja kaj našti te grižina amen amare familijake, 2) keda daraja taro manuša hem 3) keda daraja taro meribe. O phralja hem o phenja so sine spomnime ko prvo pasus tari akaja statija, uspejngje te pobedinen pli dar soske sine uverime kaj o Devel mangela len.

KEDA DARAJA KAJ NAŠTI TE GRIŽINA AMEN AMARE FAMILIJAKE

5. Bašo kola bukja šaj but te sekirinel pe jekh poglavari? (Dikh i slika ki naslovno strana.)

⁵ Jekh poglavari dikhela seriozno ki pli odgovornost te grižinel pe materijalno ple familijake (1. Tim. 5:8). Adaleske, šaj baši pandemija sekirinea tut sine dali ka ačhove ki buti ili na. Šaj darandiljan kaj našti te obezbedine hajbaske te familijake hem than živibaske. Šaj isto agjaar sekirinea tut sine kaj ako našavgjan tli buti, nane te arakhe javer. Ili sar o Nestor hem i Marija, tu šaj mislinea tuke sine kaj našti te živinen pohari parencar. O Satana uspejngja te čhinavel bute manušen te služinen e Jehovaske samo adaleske so mislingje agjaar.

6. So mangela o Satana te verujna?

⁶ O Satana mangela te verujna kaj o Jehova na grižinela pe amenge hem kaj ov nane te pomožinel amen te grižina amen amare familijake. Adaleske, šaj ka mislina amenge kaj mora te kera sa so valjani te šaj te zadržina amari buti, šaj čak ka ova spremna te kera nešto kolea so ka rumina amaro amalipe e Jehovaja.

7. Ko so uverinela amen o Isus?

⁷ O Isus džanela pe Dade najšukar taro bilo koj javer. Ov adaleske uverinela amen kaj amaro Devel džanela so valjani amenge panda angleder te roda lestar adava (Mat. 6:8). O Isus isto agjaar džanela kaj o Jehova tano spremno te grižinel pe bašo amare potrebe. Sar hristijanja amen siem delo tari e Devleskiri familija. Šaj te ova sigurna kaj sar poglavari, o Jehova ka ikerel pe ko načelo so dengja le ko 1. Timotej 5:8.

8. a) So ka pomožinel amenge te pobedina i dar kaj našti te grižina amen amare familijake? (Matej 6:31-33). b) Sar soj sikavdo ki slika, so šaj te sikljova taro akava bračno pari kova so delinela plo hajbe jekhe phenjaja?

⁸ Keda siem uverime kaj o Jehova mangela amen hem amare familija, tegani nane amenge pharo te verujna kaj ka oven amen o bukja so valjani amenge. (Čitin Matej 6:31-33.) O Jehova mangela te grižinel pe amenge hem ov darežlivo kerela adava. Keda stvoringja i phuv ov kergja but poviše nego samo o osnovna bukja so valjani amenge te preživina. Ov stvoringja but bukja te šaj te uživina ki lende (1. Moj. 2:9). Čak ako ponekogaš isi amen samo o osnovna bukja hem ništo poviše, ma te bistra kaj adala osnovna bukja isi amen samo adaleske so o Jehova grižingja pe te ovel amen (Mat. 6:11). Na valjani te bistra kaj adava so o Jehova ka del amen tano but povredno tari bilo savi materijalno žrtva so keraja la avdive, a ki idnina ka del amen večno životo. Baš adava halile o Nestor hem i Marija (Isa. 65:21, 22).

9. So šaj te sikljove taro Nestor hem tari Marija?

⁹ E Nestore hem e Marija sine len but šužo kher hem šukar platimi buti ki Kolumbija. Ola vakerena: „Razmislinaja sine te poednostavina amaro životo te šaj te kera poviše ki služba. Ama daraja sine kaj našti te ova bahtale ako živinaja pohari parencar“. So pomožingja lenge te pobedinen i dar? Ola razmislingje bašo adava kobor puti više o Jehova sikavgja kaj mangela len. Adaleske so sine uverime kaj o Jehova sekogaš ka grižinel pe lenge ola mukhle pli šukar platimi buti, bikingje pumaro kher hem selingje pe ko javer delo tari phuv kote so sine pobari potreba bašo propovedibe. So mislinena ola baši pumari odluka so angje la? O Nestor vakerela: „Uveringjem amen kobor tano čače adava so pišinela ko Matej 6:33. Nikogaš na falingja amenge nešto ko materijalno pogled hem akana siem but pobahtale“.

I DAR TARO MANUŠA

10. Soske o manuša darana jekh jekhestar?

¹⁰ Panda taro vreme keda o Adam hem i Eva buningje pe protiv o Jehova o manuša ponašinena pe lošno jekh jekhea (Prop. 8:9). Na primer, okolen so isi len avtoriteti koristinena le te šaj te ponašinen pe lošno e javerencar. O kriminalcija postapinena nasilno, nesave čhave ki škola maltretirinena ple součenikon hem nesave manuša čak ponašinena pe grubo ple familijaja. Adaleske ni hari na iznenadinela amen kaj o manuša darana jekh jekhestar! Sar koristinela o Satana akaja dar te šaj te peravel amen?

11-12. Sar o Satana koristinela i dar taro manuš protiv amende?

¹¹ O Satana koristinela i dar taro manuš te šaj te čhinavel amen te propovedina hem te kera adava so rodela amendar o Jehova. Ov vlijajngja upro but vlade te šaj te zabraninen amare aktivnostija hem te progoninen amen (Luka 21:12; Otk. 2:10). Ko e Satanaskoro sveto but manuša namerno širinena pogrešna informacie hem hovajba bašo e Jehovaskere svedokija. Okola so verujnena ko asavke hovajba šaj te asan amenge ili čak fizički te napadinen amen (Mat. 10:36). Dali valjani te ova iznenadime taro e Satanaskere taktike? Ni hari. Ov kerela sine više o ista bukja ko prvo veko (Dela 5:27, 28, 40).

¹² I dar taro protivibe e vlastengoro nane i edinstveno buti so koristinela la o Satana. Nesave but poviše darana taro adava sar ka reagirinel lengiri familija bašo čačipe nego te oven maltretirime. But mangena pumare familija hem mangena ola da te zapoznajnen e Jehova hem te zamangen le. Nane lenge sa jekh keda lengiri familija kerela lošno lafi bašo Jehova hem bašo leskere sluge. Ama ko nesave slučaija nesave tari familija so ko početok protivinena pe sine pokasno prifatingje o čačipe. Ama so ako amari familija na mangela te ovel la kontakt amencar adaleske so ulem Svedokija? Sar ka reagirina?

13. Sar adava so ka ova uverime ko e Devleskoro mangipe ka pomožinel amen ako amari familija otfrlinela amen? (Psalm 27:10).

¹³ O lafija taro Psalm 27:10 šaj but te utešinen amen. (Čitin.) Ako na bistraja kobor but o Jehova mangela amen nane te dara taro progonstvo. Hem uverime siem kaj ov ka nagradinel amen baši amari istrajnost. O Jehova but pošukar taro bilo koj javer ka grižinel pe bašo amare fizička, emocionalna hem duhovna potrebe. O Biniam kole so spomningjem le angleder baš adava doživingja.

14. So šaj te sikljove taro Biniam?

¹⁴ O Biniam ulo Svedoko iako džanlja kaj ki leskiri phuv e Jehovaskere svedokija tane progonime. Te dikha sar adava so džanlja kaj o Jehova mangela le pomožingja leske te pobedinel i dar taro manuš. Ov vakerela: „O progonstvo sine but pološno taro adava so mislingjum mange, ama but poviše darandiljum taro mle familijakoro protivibe. Darava sine kaj mo dad but ka razočarinel pe keda ka šunel kaj angjum odluka te ovav Svedoko, hem isto agjaar darava sine kaj mli familija nane te poštujnel man više“. Ama o Biniam sine uverimo kaj o Jehova sekogaš grižinela pe okolenge so mangela len. Ov ponadari vakerela: „Razmislinava sine bašo adava sar o Jehova pomožingja e javerenge te istrajnen keda sine len finansiska problemija, keda doživingje predrasude hem nasilstvo. Džanljum kaj ako ačhovava verno e Jehovaske ov ka nagradinel man. Keda sium sine phanlo poviše puti hem čak mučimo, ki mi koža osetingjum sar o Jehova sekogaš pomožinela amenge ako ačhovaja leske verna“. O Jehova ulo Dad e Biniameske, a o phralja hem o phenja ule leske has familija.

I DAR TARO MERIBE

15. Soske tano normalno te dara taro meribe?

¹⁵ I Biblija vakerela kaj o meribe tano dušmani (1. Kor. 15:25, 26). Šaj daraja keda razmislinaja bašo meribe, posebno keda amen ili nekoj taro amare mangle tano but nasvalo. Soske daraja taro meribe? Adaleske so o Jehova stvoringja amen želbaja te živina večno (Prop. 3:11). Ama i uramnoteženo dar taro meribe šaj te pomožinel amenge te arakha amaro sastipe. Na primer, oj pottikninela amen te pazina so haja, te vežbina hem keda tano potrebno te dža ko doktori hem te la iljačija hem isto agjaar te na čhiva amaro životo bizo potreba ki opasnost.

16. Sar probinela o Satana te iskoristinel amari dar taro meribe?

¹⁶ O Satana džanela kaj ceninaja amaro životo. Adaleske ov vakerela kaj ka žrtvujna sa so isi amen pa čak amaro amalipe e Jehovaja samo te šaj te ačhova dživde (Jov 2:4, 5). Ama nane le pravo! Sepak adaleske so ov tano adava so „isi le i mokj te anel dži ko meribe“, o Satana koristinela amari prirodno dar taro meribe te šaj te cida amen taro Jehova (Evr. 2:14, 15). Ko nesave slučaija koristinela manušen te zakaninen pe kaj ka mudaren e Jehovaskere slugen ako na otkažinena pe tari pumari vera. Ili, ponekogaš šaj te iskoristinel nesavi itno medicinsko situacija te šaj te čhivel amen te ana nesavi pogrešno odluka. Šaj nesave doktorija ili nekoj tari familija so nane ko čačipe ka keren amenge pritisok te phaga e Devleskoro zakoni adalea so ka primina rat. Ili nekoj šaj ka mangel te ubedinel amen te prifatina nesave terapie kola soj tane protiv o Bibliska načelija.

17. Sprema Rimjanite 8:37-39, soske na valjani te dara taro meribe?

¹⁷ Iako na mangaja te mera amen džanaja kaj o Jehova ponadari da ka mangel amen, čak hem te slučinel pe adava. (Čitin Rimjanite 8:37-39.) Keda e Jehovaskere amala merena ov na bistrela len soske leske sar te phene panda tane dživde (Luka 20:37, 38). Ov edvaj adžikerela te iranel len palem ko životo (Jov 14:15). O Jehova platingja bari cena te šaj te ovel amen večno životo (Jovan 3:16). Amen džanaja kaj o Jehova but mangela amen hem kaj grižinela pe amenge. Adaleske, namesto te cida amen taro Jehova keda siem nasvale ili šaj čak ka mera, amen valjani te roda lestar uteha, mudrost hem sila. Baš adava kergja i Valeri hem lakoro rom (Ps. 41:3).

18. So šaj te sikljove tari Valeri?

¹⁸ Keda sine la 35 berš, i Valeri otkringja kaj tani nasvali tari retko vrsta rako kova so sigate napredujnela. Te dikha sar o mangipe taro Jehova pomožingja lake te pobedinel i dar taro meribe. Oj vakerela: „Keda doznajngjem kaj isi man rako, amaro životo meningja pe taro jekh puti. Valjani sine te keren man bari operacija te šaj te ačhovav ko životo. Kergjum lafi bute doktorencar ama sarine odbingje te keren man operacija bizo rat. Ama bašo e Devleskoro zakoni na mangljum te prifatinav rat! Celo mlo životo o Jehova sikavgja mange kobor mangela man, a akana man isi man prilika te sikavav leske kobor mangava le. Sekova puti keda ka šunav sine nešto lošno taro doktorija sium sine panda poodlučno te kerav e Jehova bahtalo hem te na mukhav o Satana te pobedinel. Ko krajo kergje man operacija bizo rat hem adava uspešno! Iako me ponadari da sium nasvali, o Jehova sekogaš dengja man adava so valjani mange. Na primer ko jekh taro amare sostanokija, o vikend angleder te doznajnav kaj isi man rako, proučingjem i statija ’Hrabro da se soočime so denešnite problemi‘.c Akaja statija but utešingja amen, hem često čitinaja la. Asavke statie hem i šukar duhovno rutina pomožingje te ovel man hem mle rome andruno mir, te ačhova uramnotežena hem te ana šukar odluke“.

TE POBEDINA AMARI DAR

19. So ka slučinel pe panda hari?

¹⁹ Adaleske so o Jehova pomožingja lenge, but phralja taro celo sveto izdržingje ko phare situacie hem uspešno protivingje pe e Satanaske (1. Pet. 5:8, 9). Tu da šaj te kere adava! Panda hari o Jehova ka vakerel e Isuseske hem okolenge so vladinena lea „te uništinen o bukja so kergja o Beng“ (1. Jov. 3:8). Panda hari e Devleskere sluge ki phuv nane „nikastar te daran“ hem nane te ovel len pričina sostar te daran (Isa. 54:14; Mih. 4:4). Ama dži tegani valjani but te trudina amen te šaj te pobedina i dar.

20. So ka pomožinel amenge te pobedina amari dar?

²⁰ Mora ponadari da te uverina amen kaj o Jehova mangela hem zaštitinela ple slugen. Ko adava but ka pomožinel amenge ako hor razmislinaja hem keraja lafi bašo adava sar o Jehova zaštitingja ple slugen angleder. Hem na valjani te bistra sar o Jehova pomožingja amenge lično keda siem sine ko phare situacie. Keda o Jehova pomožinela amen tegani šaj te pobedina amari dar! (Ps. 34:4).