Pučiba taro čitatelija
So mislingja o Isus keda vakergja: „Ma mislinen kaj aljum te anav mir“?
O Isus sikavela sine e manušen te oven ko mir e javerencar. Ama ki jekh prilika vakergja ple apostolenge: „Ma mislinen kaj aljum te anav mir ki phuv. Na aljum te anav mir nego mači. Aljum te odvojnav e čhave taro plo dad, e čhaja tari pli daj hem e bojra tari pli sasuj“ (Mat. 10:34, 35). So mislingja o Isus adalea?
O Isus na manglja te odvojnel e familija, ama ov džanlja kaj bašo leskere sikajba nesave familie ka odvojnen pe. Adaleske, okola so mangena te oven e Hristoseskere sledbenikija hem te krstinen pe, valjani te oven svesna kaj šaj te ovel len problemija e familijaja. Šaj te ovel lenge pharo te ačhoven verna e Hristoseske, ako lengoro bračno partneri ili nekoj tari familija protivinela pe lenge.
I Biblija pottikninela e hristijanen te „oven ko mir sa e manušencar“ (Rim. 12:18). Ama ko nesave familie e Isuseskere sikljojba šaj te oven sar „mači“. Adava obično slučinela pe keda nekoj tari familija prifatinela e Isuseskere sikljojba, a javera otfrlinena adala sikljojba ili tane protiv. Ko asavko slučaj asavke členija tari familija ovena „dušmanja“ okoleske so prifatinela o čačipe (Mat. 10:36).
O hristijanja kola so živinena ki asavki familija ponekogaš tane ko ispit te sikaven dali tane poslušna e Jehovaske hem e Isuseske ili pumare familijake. Na primer, i familija šaj te kerel lenge pritisok te slavinen nesave praznikija. Tegani ola valjani te odlučinen kaske ka oven poslušna. O Isus vakergja: „Koj mangela ple dade ili ple daja poviše mandar, ov na zaslužinela te ovel mlo učeniko“ (Mat. 10:37). Džangjola pe, o Isus na manglja te vakerel kaj ako nekoj mangela te ovel leskoro učeniko na valjani but te mangel ple roditelen. Namesto adava, ov manglja te sikavel lenge kola bukja valjani te oven lenge najvažna ko životo. Ako amari familija koja so nane ko čačipe kerela amenge pritisok te na služina e Jehovaske, amen ponadari da mangaja len, ama džanaja kaj najviše valjani te manga e Devle.
Sigurno, o protivibe tari familija šaj but te dukhal. Sepak, e Isuseskere učenikija na valjani te bistren leskere lafija: „Koj na prifatinela plo stubo mučibaske hem na džala pali mande, na zaslužinela te ovel mlo učeniko“ (Mat. 10:38). Javere lafencar, keda o hristijanja doživinena protivibe tari familija, ko adava dikhena sar nevolje kola so spremno prifatinena len. A ko isto vreme, nadinena pe kaj pumare šukar postapkencar ka pottikninen e familija te meninel plo stavi hem te sikljovel nešto poviše baši Biblija (1. Pet. 3:1, 2).