Ov hrabro sar o Sadok

1-2. Koj sine o Sadok? (1. Letopisi 12:22, 26-28).

RAZMISLIN baši akaja situacija. Khedingje pe poviše taro 340.000 murša te šaj te keren e Davide cari upro Izrael. Trin dive tane upre ko planine paše ko Hevron, kote so asana, kerena peske lafi hem radosno giljavena gilja kolencar so falinena e Jehova (1. Let. 12:39). Maškar adala manuša sine hem o terno Sadok. But džene na bi primetinena le sine, ama o Jehova primetingja le hem ov manglja amen da te džana kaj o Sadok sine adathe. (Čitin 1. Letopisi 12:22, 26-28.) Koj sine o Sadok?

² O Sadok sine svešteniko kova so paše sorabotinela sine e prvosveštenikoja e Avijatarea. Isto agjaar, o Devel dengja le bari mudrost hem sposobnost te haljovel leskiri volja (2. Sam. 15:27). Keda e manušenge valjani sine mudro sovet, ola rodena sine adava taro Sadok. Ov isto agjaar sine hrabro manuš. Ki akaja statija ka kera lafi baši akaja leskiri osobina.

3. a) Soske e Jehovaskere sluge valjani te oven hrabra? b) So ka dikha ki akaja statija?

³ Ko akala posledna dive, o Satana sa poviše napadinela e Devleskere narodo (1. Pet. 5:8). Adaleske, valjani te ova hrabra džikote adžikeraja o Jehova te čhivel krajo e Satanaske hem leskere lošno svetoske (Ps. 31:24). Te dikha trin načinija sar šaj te ova hrabra sar o Sadok.

PODDRŽIN E DEVLESKERE CARSTVO

4. Soske e Jehovaskere slugenge valjani hrabrost te šaj te poddržinen e Devleskere Carstvo? (Dikh hem i slika.)

⁴ Sar sluge e Jehovaskere, amen celo dušaja poddržinaja e Devleskere Carstvo. Ama but puti bašo adava valjani amenge hrabrost (Mat. 6:33). Na primer, ko akava lošno sveto, valjani amenge hrabrost te šaj te živina sprema e Devleskere merilija hem te šaj te propovedina o šukar haberi (1. Sol. 2:2). Hem, but puti ko akava sveto koleste so sa poviše hem poviše ovena podelbe, valjani amenge hrabrost te šaj te ačhova neutralna keda kerela pe lafi baši politika (Jovan 18:36). But džene taro e Devleskoro narodo doživingje ekonomska problemija, sine fizički maltretirime ili čhivde ko zatvor adaleske so odbingje te mešinen pe ki politika ili te džan ki vojska.

5. Soske e Sadokeske valjangja hrabrost te šaj te poddržinel e Davide?

⁵ O Sadok na gelo ko Hevron samo te šaj te slavinel adava so o David ulo cari. Ov lelja pea plo oružje hem sine spremno te borinel pe (1. Let. 12:38). Ov sine spremno te džal e Davidea ki borba hem te braninel e Izraelcon taro lengere dušmanja. Šaj falinela leske sine iskustvo sar vojniko, ama sigurno na falinela leske sine hrabrost.

6. Sar o David sine šukar primer baši hrabrost e Sadokeske? (Psalm 138:3).

⁶ So pomožingja jekhe sveštenikoske sar o Sadok te ovel doborom hrabro? Ov pendžarela sine bute manušen kola so sine silna hem hrabra. Sigurno, siklilo but taro lengoro primer. Maškar lende sine hem o David. Adava so o David sine hrabro vodači hem vojniko, pottikningja celo narodo te poddržinel le celo vilea (1. Let. 11:1, 2). O David sekogaš rodela sine pomoš taro Jehova keda borinela pe sine ple dušmanencar. (Ps. 28:7; čitin Psalm 138:3.) O Sadok siklilo hem taro javera hrabra murša, sar so sine o Jodaj hem leskoro čhavo o Venaj, kova so sine vojniko, hem taro 22 zapovednikija kola so sine tari e Davideskiri strana (1. Let. 11:22-25; 12:26-28). Sa akala murša sine odlučna te poddržinen e Davide sar cari hem te zaštitinen le.

7. a) Taro kola sovremena primerija baši hrabrost šaj te sikljova? b) So sikljovea taro primer e phraleskoro Nsilu sar soj sikavdo ko videoklipi?

⁷ Keda razmislinaja sar o javera sikavgje hrabrost te šaj te ačhoven verna e Jehovaske hem leskere Carstvoske, amen da siem pottiknime te ova hrabra. Amaro Cari, o Isus Hristos, odlučno odbingja te ovel delo taro političko sistem ko e Satanaskoro sveto (Mat. 4:8-11; Jovan 6:14, 15). Ov sekogaš molinela sine e Jehova te del le i hrabrost so valjani leske. Ko amaro vreme, isto agjaar isi but primerija taro terne phralja kola so odbingje te džan ki vojska ili te učestvujnen ko politička aktivnostija. Ki jw.org šaj te čitine nesave taro lengere iskustvija.a

POMOŽIN TLE PHRALENGE

8. Keda šaj ka valjani hrabrost e starešinenge te šaj te pomožinen e phralenge hem e phenjenge?

⁸ E Jehovaskere sluge mangena te pomožinen peske jekh jekhea (2. Kor. 8:4). Ama, ponekogaš bašo adava valjani hrabrost. Na primer, keda ka počminel nesavi vojna, o starešine taro adava than haljovena kaj e phralenge hem e phenjenge valjani ohrabruvanje hem poddrška. Osven adava, haljovena kaj šaj ka valjani te organizirinen e phralen hem e phenjen te oven len Biblie hem bibliska publikacie hem te ovel len hajbaske, šeja hem than kote so ka bešen. Adaleske so mangena pumare phralen, o starešine grižinena pe lenge čak keda adava tano but opasno (Jovan 15:12, 13). Keda kerena akava, ola džana palo e Sadokeskoro primer kova so sine hrabro.

9. Sprema 2. Samoilova 15:27-29, so vakergja o David e Sadokeske te kerel? (Dikh hem i slika.)

⁹ Razmislin bašo adava sar o Sadok pomožingja ple phralenge ko jekh opasno periodi. O Avesalom manglja te mudarel pe dade e Davide te šaj te lel leskoro prestol (2. Sam. 15:12, 13). O David mora sine odma te našel taro Erusalim. Adaleske, ov vakergja ple slugenge: „Ušten, te naša, soske nikoj amendar ka našti te spasinel pe taro Avesalom!“ (2. Sam. 15:14). Džikote o sluge džana peske sine, o David halilo kaj nekoj ka valjani te ačhol ko Erusalim te šaj te vakerel leske so planirinela ponadari o Avesalom. Adaleske, bičhalgja e Sadoke zaedno javere sveštenikoncar te iranen pe ki diz. (Čitin 2. Samoilova 15:27-29.) Ola valjani sine but te pazinen. Adava so o David vakergja akale sveštenikonge te keren, sine but rizično, čak lengoro životo sine ki opasnost. O Avesalom sine nasilno hem sebično manuš kova so sine spremno čak pe dade te mudarel. Zamislin so bi kerela sine e Sadokeske hem e javere sveštenikonge ako otkrinela sine kaj ola špionirinena le te šaj te zaštitinen e Davide!

10. Sar o Sadok hem okola so sine lea zaštitingje e Davide?

¹⁰ O David kergja jekh plani kote so sine vklučime o Sadok hem o Husaj, jekh javer verno amal e Davideskoro (2. Sam. 15:32-37). O Husaj valjani sine te kerel pe kaj poddržinela e Avesalome hem te del le sovet sar te napadinel e Davide. Agjaar, e Davide ka ovel le sine vreme te spreminel pe bašo napad. Palo adava, o Husaj vakergja e Sadokeske hem e Avijatareske so planirinela te kerel o Avesalom (2. Sam. 17:8-16). A ola o duj vakergje adava e Davideske (2. Sam. 17:17). Adaleske so o Jehova pomožingja e Sadokeske hem e javere sveštenikonge, ola kergje but te šaj te zaštitinel pe e Davideskoro životo (2. Sam. 17:21, 22).

11. Sar šaj te ova hrabra sar o Sadok keda pomožinaja amare phralenge?

¹¹ Ako siem zamolime te pomožina amare phralenge keda tane ki opasnost, sar šaj te sikava hrabrost sar o Sadok? 1) Šun o upatstvija. Ko asavke okolnostija važno tano te ačhova ko jekhipe. Spremno šun o upatstvija tari tli podružnica (Evr. 13:17). O starešine valjani redovno te razgledinen o lokalna upatstvija bašo adava sar te spreminen pe baši katastrofa hem o upatstvija tari organizacija bašo adava so te keren keda isi nesavi katastrofa (1. Kor. 14:33, 40). 2) Ov hrabro, ama pazin (Izr. 22:3). Razmislin angleder te kere nešto. Ma čhiv tut ko rizik bizi potreba. 3) Rode pomoš taro Jehova. Ma bistre kaj o Jehova mangela tu hem te phralja te oven bezbedna. Ov šaj te pomožinel tuke te de i pomoš so valjani tle phralenge ko jekh bezbedno način.

12-13. So sikljovea taro Viktor hem taro Vitalij? (Dikh hem i slika.)

¹² Razmislin bašo Viktor hem o Vitalij, duj starešine kola so ingarena sine hajbaske hem pani e phralenge hem e phenjenge ki Ukraina. O Viktor vakerela: „Rodaja sine segde kote so sine hajbe. But puti šaj sine te šuna sar pukajnena okolu amende. Jekhe phrale so sine le poviše hrana garavdi ki strana, dengja la e phralenge. Taro adava hajbe, but objavitelija dobingje adava so valjangja lenge te šaj te preživinen nesavo vreme. Džikote čhivaja sine o bukja ko amaro kamioni, samo 20 metre amendar peli jekh bomba. Ko celo adava dive molinava sine e Jehova te del man i hrabrost so valjangja mange te šaj te prodolžinav te pomožinav e phralenge hem e phenjenge“.

¹³ O Vitalij vakerela: „Valjangja amenge bari hrabrost. O prvo puti valjangja mange 12 saatija te patujnav. Celo vreme molinava man sine e Jehovaske“. O Vitalij sine hrabro, ama isto agjaar but pazinela sine. Ov ponadari vakerela: „Celo vreme molinava sine e Jehova te pomožinel mange te ovav mudro hem skromno. Vozinava sine samo taro drumija kotar so sine dozvolimo. Mli vera but barili keda dikhljum sar o phralja hem o phenja sorabotinena zaedno. Ola rasčistinena sine o drumo te šaj amen te nakha, khedena sine hem tovarinena sine i humanitarno pomoš hem grižinena pe sine man hem e Viktore te ovel amen hajbaske hem than odmoribaske“.

AČHOV VERNO E JEHOVASKE

14. Sar šaj te vlijajnel upri amende ako nekoj kas so mangaja mukhela e Jehova?

¹⁴ Jekh taro najphare bukja so šaj te slučinel pe amenge tano ako nekoj tari amari familija ili nesavo paše amal mukhela e Jehova (Ps. 78:40; Izr. 24:10). Kobor popaše siem lea, doborom popharo šaj te ovel amenge te istrajna ki adaja situacija. Ako tu da doživingjan asavko pharo iskustvo, o primer e verno Sadokeskoro šaj te kerel tut pozoralo.

15. Soske e Sadokeske valjangja hrabrost te šaj te ačhol verno e Jehovaske? (1. Carevite 1:5-8).

¹⁵ O Sadok ačhilo verno e Jehovaske keda leskoro paše amal o Avijatar odlučingja te na ovel više verno e Devleske. Akava slučingja pe ko krajo taro e Davideskoro vladibe. Keda o David sine but phuro hem adžikerela pe sine te merel, leskoro čhavo o Adonija manglja te ovel cari, iako o Jehova više odlučingja o Solomon te ovel cari (1. Let. 22:9, 10). O Avijatar odlučingja te poddržinel e Adonija. (Čitin 1. Carevite 1:5-8.) Adale postapkaja, o Avijatar na samo so na sine verno e Davideske, nego hem e Jehovaske. Šaj li te zamisline tuke kobor sine tažno hem razočarimo o Sadok? Ov hem o Avijatar sorabotingje zaedno sar sveštenikija poviše taro 40 berš (2. Sam. 8:17). Ola zaedno grižinena pe sine bašo „kovčeg e čačutne Devleskoro“ (2. Sam. 15:29). Ko početok, o solduj poddržinena sine e Davide sar cari hem kerena sine but javer bukja ki služba e Jehovaske (2. Sam. 19:11-14).

16. So šaj pomožingja e Sadokeske te ačhol verno?

¹⁶ O Sadok ačhilo verno e Jehovaske iako o Avijatar angja pojaver odluka. O David džanlja kaj sekogaš šaj te ovel le doverba ko Sadok. Keda šundilo so manglja te kerel o Adonija, o David dengja zadača e Sadokeske, e Nataneske hem e Venajeske, te čhiven e Solomone te ovel cari (1. Car. 1:32-34). O Sadok sigurno sine but ohrabrimo taro primer e javere verna slugengoro, sar so sine o Natan kova so isto agjaar sine verno e Jehovaske hem poddržinela sine e care e Davide (1. Car. 1:38, 39). Keda o Solomon ulo cari, ko than e Avijatareske sine čhivdo o svešteniko o Sadok (1. Car. 2:35).

17. Sar šaj te dža palo e Sadokeskoro primer ako nekoj kas so mangea mukhela e Jehova?

¹⁷ Sar šaj te dža palo primer e Sadokeskoro? Ako nekoj kas so mangea odlučingja te mukhel e Jehova, sikav kaj tu sian odlučno te ačhove verno e Devleske (Is. Nav. 24:15). O Jehova ka del tut i sila hem i hrabrost so valjanena tuke. Neka ovel tut doverba ko Jehova agjaar so ka moline tut leske hem ka ačhove paše okolencar so verno služinena leske. O Jehova but ceninela tli vernost hem ka nagradinel tut bašo adava (2. Sam. 22:26).

18. So sikljovea taro Marko hem tari Sidse?

¹⁸ Razmislin bašo Marko hem baši leskiri romni i Sidse, kolengere solduj vozrasna čhaja odlučingje te mukhen o čačipa. O Marko vakerela: „Panda taro prvo dive keda bijangjovena te čhave, tu but mangea len. Ka kere sa te šaj te zaštitine len. Adaleske, tli duša dukhala tut ako ola odlučinena te mukhen e Jehova“. Ponadari ov vakerela: „Ama o Jehova sekogaš tano uzi amende. Ov dela sila me romnjake keda me sium slabo, a dela sila mange keda oj tani slabo“. I Sidse vakerela: „Nane sine te istrajna ako o Jehova na dela amen sine i sila so valjangja amenge. Mučinela man sine i misla kaj me sium krivo hem adaleske vakerava sine e Jehovaske sar osetinava man. Palo kratko vreme, jekh phen kolaja so beršencar na dikhlem amen, ali uzi mande, astargja man ko pikje, dikhlja man ko jakhja hem vakergja mange: ’Ma bistre Sidse, na sian tu krivo!‘ Adaleske so o Jehova pomožingja man, uspejngjum te ačhovav radosno džikote služinava leske“.

19. So sian odlučno te kere?

¹⁹ O Jehova mangela sa leskere sluge te oven hrabra sar o Sadok (2. Tim. 1:7). Sepak, ov na mangela te ovel amen doverba ki amari sila, nego mangela te ovel amen doverba ki leste. Adaleske, keda ka arakhljove ki situacija kote so ka valjanel tuke hrabrost, rode pomoš taro Jehova. Šaj te ove sigurno kaj ov ka pomožinel tuke te ove hrabro isto sar so sine o Sadok (1. Pet. 5:10).