1925 — angleder šel berš

E DEVLESKORO NARODO PANDA VALJANI SINE TE ADŽIKEREL

But Istražuvačija e Biblijakere očekujngje te ovel raj ki phuv ko 1925 berš. Soske? O phral Albert Šreder, kova so pokasno ulo členi ko Vodečko telo, objasningja: „Mislingjem kaj ko 1925 berš o pomazanikija ka džan ko nebo, a o verna murša taro purano vreme, sar soj o Avraam hem o David, ka voskresninen ki phuv hem ka služinen sar princija“. Ama, adaleske so adava na ulo nesave phralja hem phenja razočaringje pe (Izr. 13:12).

Iako sine razočarime, poviše džene taro Istražuvačija e Biblijakere ačhile zafatime ko propovedibe hem ule sa posvesna kaj najvažno nešto so valjani te keren tano te svedočinen bašo Jehova. Te dikha sar koristingje o radio te šaj te propovedinen poviše manušenge.

PHRAVGJONA NEVE RADIOSTANICE

Adaleske so sine but baro uspeh e radiostanicaja WBBR ko berš so nakhlja, o Istražuvačija e Biblijakere gradingje javer radiostanica, akava puti paše uzo Čikago (Ilinois). Adale radiostanicake čhivgje o anav WORD. O Ralf Lefler, o radioinženeri kova so pomožingja te gradinel pe i radiostanica, vakergja akava: „Ko šudre evendaskere rakja, o WORD šungjola sine ko but dur thana“. Na primer, jekh familija koja so sine dur poviše taro 5.000 kilometrija ki tikni diz Pajlt Stejšn (Aljaska), šungja jekh taro prva radioemisie. Pali emisija akaja familija pišingja pismo okolenge so kerena sine buti ki radiostanica te šaj te zablagodarinel pe lenge baši ohrabruvačko duhovno programa.

Ki Stražarsko kula taro 1 dekemvri 1925 berš, sine objasnimo soske šaj sine te šunel pe i radiostanica ko but thana. Athe pišinela sine: „I WORD tani jekh taro super radiostanice ki Amerika koja so isi la sila taro 5.000 vatija. O signali tari akaja radiostanica šukar šungjola taro istočno dži ko zapadno brego ki Amerika hem tari Kuba pa sa dži ko krajo taro sever ki Aljaska. But džene kola so angleder nikogaš na šungje bašo čačipe mangena te doznajnen poviše adaleske so šunena akaja radiostanica“.

Ko isto vreme, o Istražuvačija e Biblijakere mangle te počminen te koristinen radiostanica ki Kanada da te šaj te propovedinen o šukar haberi. Ko 1924 berš i radiostanica CHUC sine gradimi ko Saskatun (Saskačiven). Oj sine jekh taro prva radiostanice ki Kanada kolate so šaj sine te šunen pe emisie baši religija. Ko 1925 berš, adaja tikni stanica valjani sine te preselinel pe adaleske o Watch Tower Society ulo sopstveniko e radiostanicakoro hem selingja o studija ko jekh purano teatar ko Saskatun, pendžardo sar Ridžent Bilding, baš baši adaja cel sine kindo adava teatar hem renovirimo.

Adaja radiostanica pomožingja but manuša kola so živinena sine ko thana kote so na sine but manuša ko Saskačiven, te šunen o šukar haberi prvo puti. Na primer, jekh džuvli, i gospogja Gream, koja so živinela sine ki jekh diz so sine dur, pišingja pismo ko kova so rodingja biblisko literatura otkeda šungja jekh taro emisie. O phral Džordž Neš, vakergja: „Lakiri molba ’Sikaven amen‘ sine doborom jasno hem glasno so bičhalgjem lake celo kompleti Studie taro Sveto pismo“. Kratko palo adava, i gospogja Gream, počmingja te širinel o haberi bašo Carstvo panda ko podur thana.

AMARE VERUVANJA OVENA SA POJASNA

Ki Stražarsko kula taro 1 mart 1925 berš, iklili jekh but važno statija e naslovea „O bijanibe e narodoskoro“. Soske akaja statija sine doborom važno? Više nesavo vreme, o Istražuvačija e Biblijakere džanena sine kaj e Satana isi le organizacija hem kaj tani sostavimi taro demonija ko nebo, taro hovavne religie, taro vlade hem taro ekonomsko sistem akate ki phuv. Ama akale statijaja „o verno hem o mudro robo“ pomožingja e phralenge hem e phenjenge te haljon kaj e Jehova da isi le organizacija koja so celosno razlikujnela pe tari organizacija e Satanaskiri hem oj tani protiv o Satana hem adala so poddržinena le (Mat. 24:45). Osven adava, o verno hem o mudro robo objasningja kaj e Devleskoro Carstvo sine vospostavimo ko 1914 berš hem kaj adava berš, adaleske so uli vojna ko nebo, o Satana hem leskere demonija sine frdime taro nebo hem ottegani isi len vlijanie samo ki phuv (Otk. 12:7-9).

Nesavenge sine pharo te prifatinen akava nevo haljojbe. Adaleske ki statija pišinela sine: „Ako nesave taro adala so čitinena i Stražarsko kula na složinena pe akale neve haljojbaja ohrabrinaja len te oven strpliva hem te ovel len doverba ko Gospodari džikote ponadari da služinena leske čisto vilea“.

Jekh taro kolporterija (akana vikinena pe pionerija) tari Britanija, so vikinela pe Tom Ejr, vakergja so sepak mislinena sine poviše taro Istražuvačija e Biblijakere povrzimo akale statijaja: „O phralja sine but srekjna bašo akava objasnuvanje taro Otkrovenie poglavje 12. Keda doznajngjem kaj o Carstvo više vladinela ko nebo, edvaj adžikergjem te vakera akava šukar haberi e javerenge. Adava pottikningja amen te propovedina panda ki pobari mera hem pomožingja amen te dikha sar o Jehova preku plo narodo ka kerel panda pobare bukja ki idnina“.

TE SVEDOČINEL PE BAŠO JEHOVA

Avdive, e Jehovaskere svedokija but šukar džanena o lafija taro Isaija 43:10: „’Tumen sien mle svedokija‘, vakerela o Jehova, ’hem mlo sluga so biringjum le‘“. Ama, dži ko 1925 berš, akava stiho sine but retko sine obrabotimo ko amare publikacie. Ama bašo kratko vreme adava meningja pe. Ko 1925 berš ko 11 izdanija tari Stražarsko kula diskutiringja pe bašo stihija taro Isaija 43:10, 12!

Ko krajo taro avgust 1925 berš, o Istražuvačija e Biblijakere khedingje pe ko jekh kongres ki Indijanapolis (Indijana). O phral Raterford pišingja jekh poraka, kolaja so šukar dodžakergja adalen so ale ko kongres. Adaja poraka sine pečatimi ki programa bašo kongres. Ki late pišinela sine: „Alem ko akava kongres te šaj te ova... ohrabrime taro Gospodari te šaj te kheda neve sile hem te irana amen ko podračje hem te ova leskere svedokija“. Ko adala ofto dive ko kongres, o prisutna sine ohrabrime te svedočinen bašo Jehova ki sekoja prilika.

Sabota ko 29 avgust o phral Raterford ikergja govor e temaja „Povik baši akcija“. Ko govor istakningja kobor tano važno te svedočinel pe, ov vakergja: „O Jehova vakerela ple narodoske: ’Tumen sien mle svedokija a me sium o Devel‘. Palo adava dela jasno zapoved akale silno lafencar: ’Vazden znako te šaj o manuša te dikhen le!‘ Nane nikoj javer ki phuv kova so ka vazdel znako e manušenge osven [leskoro narodo], okola so isi len o duho e Gospodareskoro adaleske soj leskere svedokija“ (Isa. 43:12; 62:10).

Palo govor e phraleskoro Raterford, o prisutna složno glasingje i rezolucija e naslovea „Poraka baši nadež“. Ki late sine istaknimo kaj e Devleskoro Carstvo tani i edinstveno nadež bašo „mir, udobno životo, sastipe, večno životo, sloboda hem večno srekja“. Pokasno akaja rezolucija sine prevedimi ko poviše čhibja hem sine pečatimi sar traktati. Sine delime okolu 40 milionja primerokija taro traktatija.

Iako o Istražuvačija e Biblijakere čak palo nekobor berš oficijalno prifatingje o anav Jehovaskere svedokija, sepak ovena sine sa posvesna baši lengiri odgovornost te svedočinen bašo Jehova.

PALEM TE POSETINEN PE ADALA SO SIKAVGJE INTERES

Sar so o broj taro Istražuvačija e Biblijakere ko sveto bajrola sine, i organizacija pottikninela sine e phralen palem te posetinen okolen kola so angleder sikavgje interes bašo šukar haberi. Pali akcija ki koja so delingja pe o traktati Poraka baši nadež, ko Biltenia sine dendo akava upatstvo: „Palem iranen tumen ko okola khera kote so sine mukhlo o traktati Poraka baši nadež, iako adari na sine mukhli javer literatura“.

Ko Bilteni taro januari 1925 sine pišimi akaja izjava taro jekh Istražuvači e Biblijakoro, taro Plano (Teksas): „Amen but iznenadingja amen adava so ko podračja kola so sine obrabotime poviše puti sine pošukar rezultatija nego ko neve podračja. Jekh tikni diz ko amaro podračje sine obrabotimi pandž puti ko posledna deš berš. Sigende i phen Hendriks hem mi daj palem propovedingje adari hem dengje poviše lila taro bilo keda angleder“.

Jekh kolporteri tari Panama pišingja: „But džene kola so prvo puti brkingje man taro lengoro udar sine len skroz javer stavi keda posetingjum len o dujto ili o trito puti. Pobaro delo taro vreme akava berš, posetingjum okolen kolenge so više propovedingjum hem nesavencar sine man but šužo iskustvo“.

KONCETRIRIME KI IDNINA

Ko krajo taro 1925 berš, o phral Raterford pišingja pismo dži ko sa o kolporterija hem objasningja so sa kergja pe ki služba adava berš hem so valjani sine te keren ponadari. Ov vakergja: „Ko berš so nakhlja sine tumen prilika te utešinen adalen soj razočarime. Akava delo angja tumenge bari radost... O javer berš ka ovel tumen but prilike te svedočinen bašo Devel hem bašo leskoro Carstvo hem te sikaven koj tane leskere čačutne sluge. Sarine zaedno ponadari da celo glasoja te slavina amare Devle hem amare Care“.

Ko krajo taro 1925 berš, o phralja počmingje te keren planija te šaj te širinen o objektija ko Bruklin. O javer berš, ko 1926, počmingja te gradinel pe o najbaro gradežno proekti ki amari organizacija so sine dži tegani.