Dali mora te ova delo tari nesavi religija?

So vakerela i Biblija:

Oja, soske o Devel mangela o manuša te kheden pe te šaj te obožavinen le. I Biblija vakerela: „Te razmislina jekh jekheske te šaj te pottiknina amen te sikava mangipe hem te kera šukaripe, hem ma te mukha amare sostanokija“ (Evreite 10:24, 25).

O Isus vakergja kaj leskere učenikija ka oven delo tari jekh organizirimi grupa keda vakergja: „Taro adava sarine ka džanen kaj sien mle učenikija, ako isi tumen mangipe maškar tumende“ (Jovan 13:35). Te šaj te sikaven kaj mangena pe jekh jekhea, e Hristoseskere učenikija valjani sine zaedno te kheden pe. Isto agjaar, valjani sine te oven delo taro sobranija hem redovno te kheden pe te šaj te obožavinen e Devle (1. Korinkjanite 16:19). Sa o sobranija valjani sine te oven zaedno sar jekh familija soj ko celo sveto (1. Petrovo 2:17).

Nane dovolno te ova samo delo tari nesavi religija

Ki Biblija pišinela kaj valjani zaedno te kheda amen te obožavina e Devle, ama adava na značinela kaj o Devel ka ovel zadovolno amencar ako siem samo delo tari nesavi religija. E Devleske tano važno i religija te vlijajnel ko amaro sekojdnevno životo. Na primer, ki Biblija pišinela: „I religija koja tani čisto hem sveto anglo amaro Devel hem Dad tani akaja: te grižine tut e čhavenge soj bizo roditelija hem e udovicenge ko lengere nevolje hem te arakhe tut taro melalipe akale svetoskoro“ (Jakov 1:27, fusnota).