Sar šaj te ovav e Jehovaskoro svedoko?
Te šaj nekoj te ovel e Jehovaskoro svedoko valjani te kerel adava so vakergja o Isus, a tano pišimo ko Matej 28:19, 20. Sprema e Isuseskere lafija, okova so mangela te ovel leskoro učeniko valjani te kerel lafi, ili te svedočinel bašo Jehova.
Prvo buti: Valjani te džane so sikavela i Biblija. Ple sledbenikonge, o Isus vakergja: „Džan hem keren učenikija... sikaven len“ (Matej 28:19, 20). Ki Biblija, a posebno ko delo kote so pišinela bašo adava so sikavela sine o Isus Hristos, pišime tane korisna sovetija bašo bahtalo hem ispolnimo životo (2. Timotej 3:16, 17). Ako mangea te džane so sikavela i Biblija, ka ovel amenge milo te pomožina tuke ko adava preku besplatno biblisko kursi (Matej 10:7, 8; 1. Solunjanite 2:13).
Dujto buti: Valjani te ikere tut ko adava so sikljovea. O Isus vakergja kaj okola so mangena te oven leskere učenikija mora te ikeren sa so zapovedingja ov (Matej 28:20). Adava značinela kaj na valjani samo te džane informacie tari Biblija nego te ovel tuke najvažno te kere promene ko tlo način sar razmislinea hem sar ponašinea tut (Dela 10:42; Efešanite 4:22-29; Evreite 10:24, 25). Palo adava, adala so šunena e Isuseskere zapovedija odlučinena te džan pali leste agjaar so dena lafi kaj ka služinen celo životo e Devleske, e Jehovaske (Matej 16:24).
Trito buti: Valjani te krstin tut (Matej 28:19). Ki Biblija, o krstibe tano sporedimo parujbaja. (Sporedin Rimjanite 6:2-4.) Otkeda nekoj ka krstinela pe, parunela o purano način sar živinela sine hem počminela nevo životo. Sprema adava, tle krstibaja, javno sikavea kaj kergjan o prva duj bukja kolenge kerela lafi o Isus hem rodea taro Devel te del tut čisto sovest (Evreite 9:14; 1. Petrovo 3:21).
Kotar te džanav kaj sium spremno te krstinav man?
Bašo adava ker lafi e starešinencar taro sobranie. Ola ka keren tuja lafi te šaj te uverinen pe kaj šukar haljovea adava soj tano vklučimo ki tli odluka te ove e Jehovaskoro svedoko, kaj ikerea tut ko adava so sikliljan hem kaj tu korkori odlučingjan te vetine kaj ka služine e Devleske celo životo (Dela 20:28; 1. Petrovo 5:1-3).
Dali akala bukja važinena e čhavenge kolengere roditelija tane e Jehovaskere svedokija?
Oja. Amen vospitinaja amare čhaven sprema „o opomene e Jehovaskere“, sar soj amenge zapovedimo ki Biblija (Efešanite 6:4). Ama, sar so bajrona, o čhave valjani korkori te odlučinen dali ka proučinen, ka prifatinen hem ka ikeren pe ko adava so siklile tari Biblija te šaj palo adava te krstinen pe (Rimjanite 12:2). Sekoj valjani korkori te odlučinel baši pli vera ko Devel (Rimjanite 14:12; Galatite 6:5).