So vakerela i Biblija bašo dejbe?
So vakerela i Biblija:
I Biblija ohrabrinela amen te da dobrovolno, taro vilo hem taro ispravna motivija. Oj vakerela amenge kaj solduj džene ka oven bahtale, hem okova so dela hem okova so priminela (Izreki 11:25; Luka 6:38). O Isus vakergja: „Poviše isi bahtalipe keda dela pe nego keda lela pe“ (Dela 20:35).
Keda o dejbe kerela e Devle bahtalo?
O Devel tano bahtalo keda daja dobrovolno hem taro vilo. I Biblija vakerela: „Sekoj neka kerel sar so odlučingja ko plo vilo, na bizi volja, ni silaja, soske o Devel mangela adale soj bahtalo keda dela“ (2. Korinkjanite 9:7).
Ako mangaja te obožavina e Devle sar ov so mangela tegani amen valjani te ova spremna te da taro ispravna motivija (Jakov 1:27, fusnota). Keda nekoj velikodušno pomožinela okolenge so isi len potreba, tegani ugodinela e Devleske hem adalea sar te phene dela e Devleske zaem (Izreki 19:17). I Biblija vakerela kaj ov ka nagradinel asavke manuše (Luka 14:12-14).
Keda o Devel nane zadovolno taro adava so daja?
Ako daja taro neispravna, sebična motivija. Sar na primer:
te sikava amen anglo javera (Matej 6:2).
te ovel amen korist taro adava (Luka 14:12-14).
te „kina“ amenge spasenie (Psalm 49:6, 7).
Ako adava so daja koristinela pe bašo nešto so osudinela o Devel. Na primer, bi ovela sine pogrešno te da pare nesave manušeske so ka khelel komari ili ka trošinel len baši droga ili alkohol (1. Korinkjanite 6:9, 10; 2. Korinkjanite 7:1). Osven adava, nane ispravno te da okolenge so šaj korkori te izdržinen pe ama na mangena te keren buti (2. Solunjanite 3:10).
Ako daja e javerenge, a nane dovolno amare familijake. I Biblija vakerela kaj o poglavari ki familija valjani te grižinel pe bašo o potrebe ple kherutnengere (1. Timotej 5:8). Na bi ovela sine šukar te del doborom but e javerenge a ple familijake te na ačhol ništo. O Isus osudingja e manušen kola so dena sine „poklonija e Devleske“ ama na grižinena pe sine pumare phure roditelenge (Marko 7:9-13).