O SVETO KO HAOS

3 | Ačhov paše okolencar so mangea len

SOSKE TANO VAŽNO

Sebepi o haos so isi ko sveto, but manuša tane sa posekirime hem bizo te oven svesna cidena pe taro okola so mangena len.

O manuša mangena poviše te oven korkori nego ple amalencar.
O bračna parija sa poviše akošena pe.
O roditelija skoro ič na dikhena so mučinela lengere čhaven.

So valjani te džane

O amala tane važna adaleske so ola pomožinena amen te ačhova saste ko fizičko hem ko emocionalno pogled, posebno ko phare vremija.
O stres taro haos so isi ko sveto šaj te anel amenge problemija ki familija so na očekujnaja len.
Keda o čhave šunena bašo lošna bukja adava šaj but te daraven len.

So šaj te kere panda akana

Ki Biblija pišinela: „O čačutno amal sikavela mangipe ko sekova vreme hem phral ovela ko phare dive“ (Izreki 17:17).

Razmislin nekaste so šaj te pomožinel tut hem so šaj te del tut šukar sovetija. Adava so džanea kaj nekoj grižinela pe tuke šaj te del tut sila te ikljove ko krajo e sekojdnevno pharipaja.

SO ŠAJ TE KERE — Korisna sovetija

Akala sovetija šaj te pomožinen tut te ačhove paše okolencar so mangea len

KER POZORALO TLO BRAKO

Ker pozoralo tlo brako

Ki Biblija pišinela: „Dujenge tano pošukar nego jekheske... Soske, ako jekh perela, o dujto ka pomožinel ple amaleske te uštel“ (Propovednik 4:9, 10). O bračna parija valjani te oven sar igračija taro isto timi kolen so isi len isto cel, te pobedinen, a na sar igračija taro različna timija kola soj protiv jekh jekheste.

Oven odlučna te na ikalen i nervoza jekh jekheske. Oven strpliva.
Barem jekh puti ko kurko, keren lafi bašo nesavo problemi so šaj isi tumen. Hem ma bistren, i cel na valjani te ovel te napadinen jekh jekhe, nego valjani te napadinen o problemi.
Odvojnen tumenge vreme te keren nešto koleste so o solduj ka uživinen.
Setinen tumen ko šuže momentija so nakhlen len agjaar so ka dikhen slike tari tumari venčavka ili taro javera šuže nastanija.

„O rom hem i romni šaj nane te soglasinen pe bašo sa, ama adava na značinela kaj našti te sorabotinen sar timi. Šaj te anen zaedno nesavi odluka, a palo adava te keren buti ki late te šaj te ostvarinen la“ (Dejvid).

AČHOV PAŠE TLE AMALENCAR

Ačhov paše tle amalencar

Šukar tano keda dobinea poddrška tle amalendar, ama razmislin sar šaj tu da te de len poddrška. Keda ohrabrinea e javeren, ohrabrinea tute da.
Javin tut ili pišin nekobore amalenge sekova dive te šaj te dikhe sar tane.
Puč tle amalen sar ikljona ko krajo e problemencar so isi len slična sar tle.

„O phare periodija tane sporedime sar jekh bura. Keda o bršim hem i bavlal kerena amenge phare te dikha, tegani o amala šaj te pomožinen amen te dikha kaj siem hem kaj valjani te dža. Adava šaj te keren le agjaar so ka setinkeren tut ko bukja so više šaj džanea len. Tle amala mangena tut hem džanena kaj tu da len mangea“ (Nikol).

POMOŽIN TLE ČHAVENGE

Pomožin tle čhavenge

Ki Biblija pišinela: „Sekova manuš valjani te ovel spremno sigate te šunel, a pohari te kerel lafi“ (Jakov 1:19). Ko početok te čhavenge šaj te ovel pharo te vakeren sostar darana hem so mučinela len, ama ako strplivo šunea len ka pomožine lenge otvoreno te keren tuja lafi.

Pomožin tle čhavenge slobodno te keren tuja lafi bašo sa. Nesave čhavenge polokho tano te keren lafi ki opuštimi situacija, nego samo formalno te keren lafi ple roditelencar. Šaj te čhavenge ka ovel polokho te keren tuja lafi džikote vozinea ili džikote phirena.
Trudin tut te čhave te na šunen but bukja so ka voznemirinen len.
Vaker te čhavenge so kergjan te šaj i familija te ovel bezbedno.
Planirinen sar ka postapinen ko itna situacie hem vežbinen adava e čhavencar.

„Keren lafi e čhavencar hem mukhen len ola da te vakeren so mučinela len. Šaj garavena ki peste dar, holi ili nešto javer. Vaker kaj tute da ponekogaš mučinena tumen asavke bukja hem vaker so pomožinela tut te ikljove ko krajo lencar“ (Betani).