Lekcija 7

I molitva kjerelatu popaše e Devleja

Soske valjani redovno te molinaamen? (1)

Kaske valjani te molinaamen hem sar? (2, 3)

Bašo kola bukja šaj te molinaamen? (4)

Kjeda valjani te molinaamen? (5, 6)

Šunela li o Devel sa o molitve? (7)

1. I molitva tani ponizno kjeribe lafi e Devleja. Valjani redovno te molinetu e Devleske. Agjaar ka čuvstvunjetu paše e Devlea sar jek manglo amal. O Jehova i but baro hem mokjno, ama palem šunela amare molitve! Molineali tu e Devleske redovno? (Psalmi 65:2; 1. Solunjanite 5:17).

2. Kjeda obožavinea e Devle jek važno buti tani i molitva. Odoleske valjani te molinaamen samo e Jehovaske. Kjeda o Isus sine ki phuv svako puti molinelape sine samo pe Dadeske. Amenda valjani te kjera odova (Matej 4:10; 6:9). Sa ­amare molitve valjani te vakjeralen preko anav e Isuseskoro. Odova sikavela kaj amen poštunjaja o than so i oleske dindo hem kaj isi­amen vera ko odova so din­gja po dživdipe amengje (Jovan 14:6; 1. Jovanovo 2:1, 2).

3. Kjeda molineatu, valjani te kjere e Devleja lafi taro vilo. Navaljani o molitve te sikljovelen ki godi hem sa isto bu­kja te vakjere (Matej 6:7, 8). Šaj te molinaamen ko sakova vakti hem ko sakova than. Ama kjeda kjeraja odova valjani te sikava baro počit. Kjeda molinajamen ki amende taro vilo, o Devel šunela odolada molitve (1. Samoilova 1:12, 13). Šukar tano te molinaamen kjeda sijam korkoro, te šaj te vakjera leske sa so mučinelamen. A bašo odova valjani amen­gje jek mirno than (Marko 1:35).

4. Bašo kola bukja šaj te molina e Devle? Bašo sa, so kjerela tu te ove popaše olea (Filipjanite 4:6, 7). I pendžardi molitva Očenaš sikavela kaj valjani te molinaamen bašo e Jehovaskoro anav hem i namera. Šaj isto agjaar te molinaamen bašo okova so valjani amengje dživdipaske, te oven amengje prostime o grevija hem isto agjaar mate pera ko iskušenie (Matej ­6:9-13). Kjeda molinajamen, mate roda bukja so amen mangaja a nae e Devleske ki volja (1. Jovanovo 5:14).

5. Molintu e Devleske kjeda mangea te zahvalinetu hem te falinele bašo sa o bukja (1. Letopisi 29:10-13). Valjani te molinetu kjeda isitu problemija hem iskušenija (Psalmi 55:22; 120:1). Šukar i te molinetu pred te ha maro (Matej 14:19). O Jehova vikinela amen te molinaamen oleske ko sakova vakti (Efešanite 6:18).

6. Valjani posebno te molinaamen ­kjeda kjeraja disavo baro grevo. Tegani valjani uporno te molinaamen e Jehovaske te prostinel amengje. Ako vakjeraja oleske amare grevija hem pobuter na kjerajalen, o Devel i spremno te prostinel amengje (Psalmi 86:5; Izreki 28:13).

7. O Jehova šunela o molitve samo e pravedno manušengjere. Ako mangeja o Devel te šunel te molitve, mora te dživdine sar so Ov tutar rodela (Izreki 15:29; 28:9). Valjani te ove ponizno kjeda molineatu (Luka 18:9-14). Mora te de tutar sa, te khere okova bašo so molineatu. Agjaar ka sikave kaj iskreno verujnea ko okova so molineatu. Samo tegani o Jehova ka šunel hem ka odgovorinel ko tle molitve (Evreite 11:6).