Lekcija 8
Familijarno dživdipe kova so mangela o Devel
Kova tano e romeskoro than ki familija? (1)
Sar valjani o rom te dikhel ki pi romni? (2)
Kola bukja mora te kjerel o dat? (3)
So valjani te kjerel i romni ki familija? (4)
So rodela o Devel e roditelendar hem e čhavendar? (5)
So vakjerela i Biblija bašo ulavibe hem o razvod? (6, 7)
1. I Biblija vakjerela kaj o rom tano poglavari ki pi familija (1. Korinkjanite 11:3). O rom mora te ovele samo jek romni. Ola valjani te oven venčime sar so rodela o zakoni e phuvjakoro (1. Timotej 3:2; Tit 3:1).
2. O rom valjani te mangel pe romnja sar korkoro peste. Sar o Isus so sine šukar pe učenikoncar, agjaar o rom valjani te ovel pe romnjaja (Efešanite 5:25, 28, 29). Ov niked na valjani te marol pe romnja hem bilo sar te maltretirinela, sakova puti valjani te sikavel lake kaj but mangelala hem poštunjelala (Kološanite 3:19; 1. Petrovo 3:7).
3. O dat valjani te kjerel but buti te šaj te dikhel pe familija. Ov valjani te dikhel te ovelen hajbaske, urajbaske hem kher kote so ka dživdinen. Mora te odvojnel vakti te ovel pe familijaja, bašo lengjere duhovno potrebe (1. Timotej 5:8). Anglo Devel o dat tano odova kova so mora te pomožinel pe familijake te sikljon bašo Devel hem oleskjere namere (5. Mojseeva 6:4-9; Efešanite 6:4).
4. I romni tani odoja koja so valjani te pomožinel pe romeske (1. Mojseeva 2:18). Oj valjani te pomožinel pe romeske kjeda sikavena hem vospitinena pumare čhaven (Izreki 1:8). O Jehova rodela e romnjatar te grižinelpe pe familijake hem sa odova te kjerel le mangipaja (Izreki 31:10, 15, 26, 27; Tit 2:4, 5). Oj valjani te sikavel pe romeske baro poštovanje (Efešanite 5:22, 23, 33).
5. O Devel rodela e čhavendar te šunen pumare roditelen (Efešanite 6:1-3). Ov taro roditelija adžikjerela te sikaven hem te isprainen pumare čhaven. Ola valjani te nakhaven vakti pumare čhavencar hem te sikavenlen tari Biblija. Agjaar ka sikaven kaj grižinenape bašo lengjere duhovna hem emocionalna potrebe (5. Mojseeva 11:18, 19; Izreki 22:6, 15). O roditelija valjani te den stega pumare čhaven ama odova te kjeren ko ljubezno naćin (Kološanite 3:21).
6. Kjeda o rom hem i romni na složinenape, tegani ola valjani te den sa pestar te kjeren okova so vakjerela i Biblija. Oj vakjerela amengje te sikava mangipe hem te prostina (Kološanite 3:12-14). Ulajbaja na rešinenape o problemija a isto agjaar o Devel namangela odova. Ama jek romni šaj ka mangel te ulavelpe pe romsetar samo kjeda 1) ov namerno na anela khere love te šaj te parvarel ple familija, 2) but marelala hem o dživdipe lakoro tano ko opasnost, ja 3) leskoro baro protivibe na mukhelala nisar te obožavinel e Jehova (1. Korinkjanite 7:12, 13).
7. Okola so i ko brako, mora te oven verna jek jekheske. I preljuba tani grevo anglo Devel hem anglo rom ja i romni (Evreite 13:4). O seksualna vrske avri taro brako tane edinstveno biblisko osnova bašo razvod, koja dozvolinela te khuvelpe palem ko brako (Matej 19:6-9; Rimjanite 7:2, 3). O Jehova mrzinela kjeda nekoj mukhelape bizo biblisko osnova (Malahija 2:14-16).
[Pictures on page 16, 17]
O Devel taro roditelija adžikjerela te sikaven hem te isprainen pumare čhaven
[Picture on page 17]
Dat so mangela pe familija dikhela te ovelen hem ko materijalno hem ko duhovno pogled