Lekcija 13

Sar šaj te arakha i pravo religija?

Dali o Devel prifatinela sa o religije ja samo jek? (1)

Soske isi but religije so vakjerena kaj tane hristijanja? (2)

Sar šaj te pendžara e pravo hristijanen? (3-7)

1. O Isus čhivgja o temeli e pravo hristijansko religijake. Odoleske avdive mora te ovel samo jek grupa pravo hristijanja so obožavinena e Jehova (Jovan 4:23, 24; Efešanite 4:4, 5). I Biblija va­kje­rela kaj samo hari džene tane ko tesno drumo so ingarela ko dživdipe (Matej 7:13, 14).

2. I Biblija prorekungja kaj palo meribe e apostolengoro, maškaro prava hristijanja ka ikljon manuša so ka va­kje­ren hovavne nauke hem nae te dživdinen sar so rodela o Devel. Disave džene ka hovaven e vernikon te verunjen ko odova so ola vakjerena, a na o Isus (Matej 7:15, 21-23; Dela 20:29, 30). Odoleske dikhaja but religije kola so va­kje­re­na kaj tane hristijanska. Sar šaj te pendžara e pravo hristijanen?

3. Jek najbaro znako te džana ko i o pravo hristijanja tano te mangenpe jek jekheja (Jovan 13:34, 35). Ola na sikljovena te mislinen kaj tane pošukar taro javera rase ja nacije. A ni te mrzinen e manušen taro javera phuv­ja (Dela 10:34, 35). Odoleske ola na lena than ko maribe. O prava hristijanja maškar peste dživdinena sar phralja thaj phenja (1. Jovanovo 4:20, 21).

4. Javer znako e pravo religijake tano odova so isilen baro poštovanje sprema i Biblija. Ola prifatinenala sar Devleskoro lafi, hem verunjena ko odova so vakjerela oj (Jovan 17:17; 2. Timotej 3:16, 17). Ola dikhena ki Biblija sar považno lil taro e manušengere ideje ja adetija (Matej 15:1-3, 7-9). Isto agjaar, dena pestar sa, te dživdinen sar so ­vakjerela i Biblija. Znači, ola na vakjerena jek a kjerena javer (Tit 1:15, 16).

5. O manuša ki pravo religija, isto agjaar, mora te poštunjen e Devleskoro anav (Matej 6:9). O Isus objavingja e Devleskoro anav, Jehova, e manušenge. A isto odova valjani te kjeren o prava hristijanja (Jovan 17:6, 26; Rimjanite 10:13, 14). Kola manuša ki tli okolina vakjerena javerengje bašo e Devleskoro anav?

6. O pravo hristijanja mo­ra te propovedinen bašo e ­Devleskoro Thagaripe. O Isus kjergja odova. Ov sakova puti kjerela sine lafi bašo Thagaripe (Luka 8:1). Ov din­gja ­zapoved pe učenikonge te propovedinen bašo odova ki celo phuv (Matej 24:14; 28:19, 20). O pravo hristijanja verunjena kaj samo e Devleskoro Thagaripe ka anel mir ki celo phuv (Psalmi 146:3-5).

7. E Isuseskere učenikija na valjani te oven delo kotaro akava sumnal (Jovan 17:16). Ola na mešinenape ki politika ja raspravie ko opštestvo. Ola cidenape kotar o bilačhe postapke thaj navike taro akava sumnal (Jakov 1:27; 4:4). Šaj li te pendžare disave religiozno manušen ki tli okolina so sikavena akala znakija tari pravo religija?

[Pictures on page 26, 27]

O prava hristijanja mangenape jek jekheja, poštunjena i Biblija, hem propovedinena e Devleskoro Thagaripe