Valjani te sikljove bašo Devel

Te šaj te ove paše e Devleja, valjani te sikljove baši leste. Dali te amala džanena to anav hem dali vikjinenatu ko tlo anav? Oja, kjerena odova. O Devel mangela tuda te džane leskoro anav hem te koristinele. E Devleskoro anav tano Jehova (Psalm 83:18; Matej 6:9). Mora, isto agjaar te sikljove so mangela, a so na. Valjani te džane koj tane leskere amala, a koj tane leskere dušmanja. Te pendžare nekas pošukar trebela vakti. I Biblija vakjerela kaj mudro tano te odvojnelpe vakti te sikljove bašo o Jehova (Efešanite 5:15, 16).

Okola so i paše e Devleja kjerena odova so ov mangela. Razmislin te amalenge. Ako sijan lošno lencar hem ako kjereja odova so ola namangena, ka ačhon li te amala? Džangjolape na! Isto agjaar, ako mangea te ove e Devleskoro amal, trebela te kjere okova so mangela ov (Jovan 4:24).

Sa o religije na kjerenatu paše e Devleja. O Isus, kova tano najpaše amal e Devleja, vakjergja bašo duj drumija. Jek drumo tano buvlo hem ki leste džana but manuša. Odova drumo ingarela ko uništuvanje. O javer drumo tano tesno hem hari džene džana ki leste. Odova drumo ingarela ko večno dživdipe. Akava značinela kaj, ako mangea te ove e Devleja paše sar amal, mora te obožavinele ko ispravno način (Matej 7:13, 14).