So sikljovaja taro odova so sine poangle

O Jehova nae te dozvolinel o lošna manuša te uništinen o Raj. Samo okola so i paše lea ka oven odothe. So ka ovel e lošno manušencar? Te dikha jek čačutni paramisi bašo Noe. O Noe dživdinela sine anglo nekobor milja berša. Ov sine but šukar manuš soske sakova puti kjerela sine odova so mangela o Jehova. Ama o javera manuša ki Phuv kjerena sine but lošno bukja. Odoleske o Jehova vakjergja e Noeske kaj ka kjerel potop te uništinel sa e lošne manušen. Vakjergja leske te kjerel arka ili baro brodi te šaj ov hem leskiri familija te spasinenpe taro potop (1. Mojseeva 6:9-18).

O Noe hem leskiri familija kjegje i arka. O Noe vakjergja e narodoske kaj ka ovel potop, ama ola na šungjele. I poodori kjerena sine lošno bukja. Kjeda i arka sine završimi, o Noe čhivgja e životnen ki late, a isto agjaar khuvgje ov hem leskiri familija. Palo odova o Jehova mukhlja baro biršim, 40 dive hem 40 rakja. O pani poplavingja celo Phuv (1. Mojseeva 7:7-12).

O bilačhe manuša mule, ama o Noe hem leskiri familija sine spasime. Palo potop ola dživdinena sine ki phuv kote so nasine lošnipe (1. Mojseeva 7:22, 23). I Biblija vakjerela kaj o Jehova panda jek puti ka uništinel okolen so nae te kjeren odova so mangela o Devel. O šukar manuša nae te oven uništime. Ola večno ka dživdinen ki rajsko Phuv (2. Petrovo 2:5, 6, 9).

Avdive but manuša kjerena lošno bukja. O sumnal tano pherdo problemencar. O Jehova sakova puti bičhaljela ple manušen te vakjeren so ka ovel, ama but manuša namangena te šunen e Jehovaskere lafija. Namangena te promeninenpe. Na mangena te kjeren odova so o Devel vakjerela so i šukar, a so na. So ka ovel akale manušencar? Dali jek dive ka promeninenpe? But džene na. Panda hari o bilačhe manuša ka oven uništime zasekogaš (Psalm 92:7).

I Phuv nae te ovel uništimi; ka ovel raj. Okola so ka oven paše e Devleja ka dživdinen zasekogaš ko Raj (Psalm 37:29).