O baro Potop — koj šungja e Devle, a koj na?

But manuša ko vreme e Noeskoro kerena sine lošna bukja (1. Mojseeva 6:5)

E Adame hem e Eva sine len čhave, hem i Phuv pherdili manušencar. Sar so nakhela sine o vreme, nesave angelija protivingje pe isto sar o Satana.

Ola ale ki phuv hem lele manušikano telo te šaj te len peske romnja. O romnja bijangje posebna čhave, kola so sine but holjame hem silna.

O sveto pherdilo manušencar so kerena sine lošna bukja. I Biblija vakerela: ,O lošnipa e manušeskoro ki phuv sine baro hem sa o misle taro leskoro vilo sekova puti sine lošna.‘

O Noe šungja e Devle hem kergja i arka (1. Mojseeva 6:13, 14, 18, 19, 22)

O Noe sine šukar manuš. O Jehova vakergja e Noeske kaj ka uništinel e lošna manušen ko jekh baro potop.

O Devel isto agjaar vakergja e Noeske te kerel jekh baro brodi — arka, ki late te khuvel ov pe familijaja hem sa o životne.

O Noe vakerela sine e manušengje kaj ka ovel Potop, ama ola na šungje le. Nesave asandile e Noeske, a javera mrzinena le sine.

Keda kergja i arka, o Noe čhivgja e životnen andre.