I romni ko bunari

Pali Pasha, o Isus hem leskere učenikija irangje pe ki Galileja preku i Samarija. Paše uzi diz Sihar, o Isus ačhilo ko bunari e Jakoveskoro. Džikote odmorinela pe sine, leskere učenikija gele ki diz te kinen hajbaske.

Palo nesavo vreme, ko bunari ali jekh romni te pherel pani. O Isus vakergja lake: „De man hari pani“. Oj vakergja leske: „Soske kerea mancar lafi keda džanea kaj me sium Samarjanka? O Evreija na kerena lafi e Samarjanencar“. O Isus phengja lake: „Te džane sine koj sium me, tu ka rode sine mandar pani hem me ka dav tut sine pani so dela životo“. Oj pučlja le: „Sar misline? Nane tut ni kofa te ikale pani“. O Isus vakergja lake: „Sekoj so ka piel taro pani so me dava le nikogaš poviše nane te ovel žedno“. Tegani i romni phengja: „Gospodare, de man taro adava pani“.

O Isus vakergja lake: „Vikin te rome te avel“. Oj phengja: „Nane man rom“. O Isus vakergja lake: „Oja. Pandž puti sian sine ženimi, a akana živinea manušea so na sian ko brako“. I romni vakergja: „Dikhava kaj sian proroko. Mlo narodo verujnela kaj šaj te služina e Devleske ki akaja planina, ama o Evreija vakerena kaj mora te služina leske ko Erusalim. Ama me verujnava keda ka avel o Mesija, ov ka vakerel amenge sar te služina e Devleske“. Tegani o Isus vakergja nešto so na vakergja nikaske: „Me sium o Mesija“.

I romni geli sigate ki diz hem vakergja e Samarjanenge: „Mislinava kaj arakhljum e Mesija. Džanela sa baši mande. Aven te dikhen!“ Ola gele laja ko bunari, hem adari o Isus počmingja te sikavel len.

O Samarjanija vikingje e Isuse te ačhol ki lengiri diz. Ov ačhilo adari duj dive hem poučinela sine e manušen, hem but džene verujngje ki leste. Ola vakergje e Samarjankake: „Akana, keda šungjem so vakerela akava manuš, džanaja kaj ov tano adava so ka spasinel o sveto“.