O Isus irangja pe ko nebo

O Isus arakhlja pe ple sledbenikoncar ki Galileja. Ov dengja len jekh važno zapoved: „Džan hem keren učenikija taro manuša taro sa o phuvja. Sikaven len bašo bukja so me sikavgjum tumen hem krstinen len“. Palo adava vetingja lenge: „Pamtinen, sekogaš ka ovav tumencar“.

Otkeda voskresningja, ko periodi taro 40 dive o Isus pojavingja pe bute učenikonge ki Galileja hem ko Erusalim. Ov vakergja lenge važna pouke hem kergja but čudija. Palo adava, ki Maslinsko Gora, o Isus posledno puti arakhlja pe ple apostolencar.

Angleder adava, džikote sine ko Erusalim, o Isus vakergja lenge: „Ačhoven ki akaja diz. Adžikeren te dobinen adava so vetingja tumenge mo Dad“. Ama, ola na halile so manglja o Isus te vakerel adalea. Adaleske pučle le: „Akana li ka ove cari ko Izrael?“ O Isus odgovoringja lenge: „Panda na alo o vreme so o Jehova odredingja le te ovav cari. Panda hari ka dobinen sila taro sveti duh hem ka oven mange svedokija. Propovedinen ko Erusalim, ki Judeja, ki Samarija hem ko najdur thana ki Phuv“.

Tegani o Isus počmingja te džal upre ko nebo. O učenikija dikhena sine ki leste, hem taro jekh puti jekh oblako učhargja le hem više našti sine te dikhen le.

O učenikija gele peske tari Maslinsko Gora hem gele ko Erusalim. Ola redovno khedena pe sine ko jekh kher, molinena pe sine hem adžikerena sine o Isus te del len neve upatstvija.