Šukaripe — sar šaj te razvine akaja osobina?

SEKOVA jekh amendar mangela o javera te dikhen ki leste sar šukar manuš. Ama, ko akava sveto tano pharo te ovel pe šukar. But manuša avdive na mangena o šukaripe (2. Tim. 3:3). Lende isi len pumare merilija bašo adava soj šukar, a soj lošno hem ustvari „o šukar kerena le lošno, a o lošno šukar“ (Isa. 5:20). Isto agjaar, šaj te ovel amenge pharo te kera šukaripe adaleske so siem nesovršena ili nešto slučingja pe amenge angleder. Šaj osetinaja amen sar i En,a koja so iako služinela e Jehovaske but berša. Oj vakerela: „Pharo mange te dikhav man sar šukar manuš“.

Sepak, sarine amen šaj te sikava šukaripe. Akaja osobina avela taro e Devleskoro sveti duh. A ov tano posilno taro akava sveto hem tari amari nesovršenost, kola so šaj te keren amenge pharo te ova šukar manuša. Ki akaja statija ka dikha soj tano o šukaripe hem sar šaj panda poviše te sikava akaja osobina.

SOJ TANO O ŠUKARIPE?

Okolen kas so isi akaja osobina isi len uče moralna merilija hem nane lošna hem rumime. O šukar manuš koristinela sekoja prilika te šaj te pomožinel e javerenge hem te kerel lenge nešto šukar.

Verojatno dikhljan kaj nesave manuša kerena šukaripe ple familijake ili ple amalenge. Ama dali akava tano dovolno te šaj te ova šukar anglo e Jehovaskere jakhja? Džangjola pe, nikoj amendar našti sovršeno te sikavel akaja osobina. I Biblija vakerela: „Nane pravedno manuš ki phuv, kova so kerela samo šukaripe hem nikogaš na grešinela“ (Prop. 7:20). O apostol Pavle iskreno priznajngja: „Džanava kaj ki mande, ustvari ko mlo telo, na živinela ništo šukar“ (Rim. 7:18). Adaleske ako mangaja te razvina akaja osobina, valjani te sikljova taro Jehova kastar so avela o šukaripe.

„O JEHOVA TANO ŠUKAR“

O Jehova čhivela o merilo bašo adava soj šukar a soj lošno. Baši leste ki Biblija pišinela: „Tu sian šukar hem kerea šukaripe. Sikav man bašo tle zakonija!“ (Ps. 119:68). Te dikha duj bukja bašo e Jehovaskoro šukaripe soj tane spomnime ko akava stiho.

O Jehova tano šukar. O šukaripe tano delo tari e Jehovaskiri ličnost hem sa o javera osobine so isi le tane povrzime e šukaripaja. Razmislin so slučingja pe keda o Jehova vakergja e Mojseeske: „Ka nakhav angli tute hem tu ka dikhe kobor šukar sium me“. Džikote o Jehova sikavgja pli slava e Mojseeske — kote soj vklučimo leskoro šukaripe da — o Mojsej šungja akala lafija: „Jehova! Jehova! Devel soj milostivo hem sočuvstvitelno, na holjanela sigate, pherdo tano šukaripe hem čačipe, kova so sikavela verno mangipe milje generacienge, prostinela greške, hem grevo, ama na oslobodinela tari kazna“ (2. Moj. 33:19; 34:6, 7). Taro akala lafija haljovaja kaj o šukaripe dikhela pe ko sekova aspekti tari e Jehovaskiri ličnost. Keda sine ki Phuv, o Isus sovršeno sikavgja akaja osobina. Ama, sepak vakergja: „Nikoj nane šukar, osven jekh, o Devel“ (Luka 18:19).

Sa so kerela o Jehova tano šukar. Leskoro šukaripe dikhela pe taro sa o bukja so kergja. „O Jehova tano šukar sprema sarine hem leskiri milost dikhjola pe ko sa so kergja“ (Ps. 145:9). Adaleske so o Jehova tano šukar hem nane pristrasno, ov dengja životo sa e manušenge hem dela lenge sa so valjani te šaj te ačhoven ko životo (Dela 14:17). Leskoro šukaripe dikhjola pe isto agjaar keda prostinela amenge. Jekh psalmisti pišingja: „Tu, Jehova, sian šukar hem spremno sian te prostine“ (Ps. 86:5). Šaj te ova sigurna kaj „o Jehova nane te kratinel nisavo šukaripe okolendar so živinena verno ko sa“ (Ps. 84:11).

„SIKLJOVEN TE KEREN ŠUKARIPE“

Amen siem stvorime sprema e Devleskoro liko, adaleske šaj te sikava šukaripe (1. Moj. 1:27). Ama, akaja osobina našti te razvina la avtomatski. Adaleske e Devleskoro Lafi pottikninela amen te sikljova te kera šukaripe (Isa. 1:17). Te dikha trin bukja so ka pomožinen amenge te sikava akaja šuži osobina.

Prvo, te molina amen bašo sveti duh, kova so šaj te pomožinel amenge te ova šukar anglo e Jehovaskere jakhja (Gal. 5:22). E Devleskoro duho šaj te pomožinel amenge te manga adava soj šukar, a te mrzina adava soj lošno (Rim. 12:9). Ustvari, i Biblija vakerela kaj o Jehova šaj te kerel amen zorale „te šaj sekogaš te kera hem te vakera adava soj šukar“ (2. Sol. 2:16, 17).

Dujto, te čitina e Devleskoro Lafi. Džikote keraja adava, o Jehova šaj te sikavel amen bašo „sa adava soj ko drumo e šukaripaskoro“ hem te spreminel amen „baši sekoja šukar buti“ (Izr. 2:9; 2. Tim. 3:17). Keda čitinaja i Biblija hem hor razmislinaja baši late, pheraja amari riznica, javere lafencar amaro vilo, šukar bukjencar kola so šaj but te pomožinen amenge ki idnina (Luka 6:45; Ef. 5:9).

Trito, te trudina amen te imitirina o šukar primerija (3. Jov. 11). Ki Biblija isi but primerija so šaj te imitirina len. Džangjola pe, taro Jehova hem taro Isus najviše šaj te sikljova bašo šukaripe. Ama, šaj isto agjaar te sikljova taro javera da so sine pendžarde sar šukar manuša. Na primer, razmislin baši Tavita hem o Varnava (Dela 9:36; 11:22-24). Ako proučinea baši lende, šaj but te sikljove taro lengoro šukar primer. Džikote kerea adava, dikh sar ola pomožingje e javerenge. Palo adava, razmislin sar šaj tu te pomožine nekaske ki tli familija ili ko sobranie. Isto agjaar, razmislin bašo bereketija so dobingje i Tavita hem o Varnava adaleske so kerena sine šukaripe e javerenge. Tu da šaj te dobine bereketija ako trudinea tut te postapine sar lende.

Avdive da isi phralja hem phenja kola soj šukar primer bašo adava sar te sikava šukaripe. Na primer, ko amare sobranija isi amen starešine kola so but trudinena pe hem mangena o šukaripe. Na valjani te bistra isto agjaar amare verna phenjen kola so ple lafencar hem postapkencar „sikavena e javeren bašo adava soj šukar“ (Tit 1:8; 2:3). Jekh phen so vikinela pe Rozlin vakerela: „Jekh mli amalin taro sobranie but trudinela pe te šaj te pomožinel hem te ohrabrinel e phralen hem e phenjen. Oj razmislinela baši lengiri situacija hem but puti dela len tikne poklonija ili kerela nešto konkretno baši lende. Ki late dikhava sar but šukar manušni“.

O Jehova pottikninela amen te roda adava soj šukar (Amos 5:14). Ako primeninaja akava sovet, ka manga leskere načelija hem isto agjaar ka ova poodlučna te kera adava soj šukar.

Na valjani te mislina kaj te šaj te sikava šukaripe valjani te kera bare bukja e javerenge ili te da len skupa poklonija. Razmislin baši akaja sporedba: Te šaj jekh luludi te bajrovel na valjani te čhiva lake but pani taro jekh puti, namesto adava valjani te čhiva lake pohari pani ama poviše puti. Slično tano amencar, ako but puti keraja tikne bukja e javerenge, ka sikava kaj siem šukar.

I Biblija pottikninela amen te ova „spremna“ te kera šukaripe (2. Tim. 2:21; Tit 3:1). Ako razmislinaja bašo e javerengere potrebe, ka arakha načinija sar te pomožina lenge (Rim. 15:2). Akava šaj te vklučinel te delina e javerencar adava so isi amen (Izr. 3:27). Na primer, šaj te kanina nekas ko skromno ručko ili ko družibe. Ako nekoj tano nasvalo, šaj te javina amen leske ili te posetina le. Čače isi but prilike te ohrabrina e javeren amare šukar lafencar (Ef. 4:29).

Isto sar o Jehova, amen da rodaja načinija te kera šukaripe sa e manušenge. Adaleske trudinaja amen te na ova pristrasna. Jekh taro najšukar načinija sar keraja adava tano agjaar so propovedinaja o šukar haberi sa e manušenge. Isto agjaar, trudinaja amen te ikera e Isuseskiri zapoved te kera šukaripe čak okolenge so mrzinena amen (Luka 6:27). Nikogaš nane te grešina ako siem ljubezna hem keraja šukaripe e javerenge, soske „protiv adava nane zakoni“ (Gal. 5:22, 23). Ako keraja šukaripe čak keda protivinena pe amenge ili isi amen nevolje, adalea ka falina amare Devle hem šaj ka privlečina nekas ko čačipe (1. Pet. 3:16, 17).

ISI AMEN KORIST KEDA SIKAVAJA ŠUKARIPE

I Biblija vakerela kaj o šukar manuš khedela „o plodija taro ple postapke“ (Izr. 14:14). Kola tane nesave bereketija so dobinela len o šukar manuš? Ako siem šukar sprema o javera, pobari tani i verojatnost kaj ola da ka oven amencar šukar (Izr. 14:22). Čak keda o javera na ponašinena pe amencar šukar, ako keraja lenge šukaripe, šaj ka meninen plo stavi hem ka ponašinen pe amencar pošukar (Rim. 12:20).

But džene taro lično iskustvo šaj te vakeren sar koristinela lenge adava so na kerena više adava soj lošno, nego adava soj šukar. Te dikha o primer jekhe phenjakoro so vikinela pe Nensi. Oj priznajnela: „Džikote bajrovava sine na sine mange važno ništo, živinava sine nemoralno životo hem nikas na poštujnava sine. Ama keda počmingjum te sikljovav soj šukar anglo e Jehovaskere jakhja hem te primeninav adava, uljum pobahtali. Akana dikhava pošukar ki mande“.

Najvažno pričina soske valjani te razvina šukaripe tani adaja so agjaar keraja e Jehova bahtalo. Čak keda poviše džene na dikhena adava so keraja, o Jehova dikhela. Ov tano svesno baši sekoja amari šukar postapka hem misla (Ef. 6:7, 8). Sar nagradinela amen bašo adava? „O šukar manuš dobinela milost taro Jehova“ (Izr. 12:2). Adaleske, ponadari da te razvina akaja osobina. O Jehova vetinela: „Slava hem čest hem mir adžikerela sekas so kerela šukaripe“ (Rim. 2:10).