Neka ovel tut doverba ko Jehova keda isi tut stres

1. Soske mora te šuna o predupreduvanje so dengja le o Isus?

KO PLO proroštvo bašo posledna dive, o Isus vakergja: „Pazinen tumare vile te na oven optovarime... e sekiraciencar taro životo“ (Luka 21:34). Soske valjani te šuna akava predupreduvanje? Adaleske so sarine amen avdive mora te borina amen ista problemencar.

2. Save phare problemija isi amare phralen hem phenjen?

² Ponekogaš mora te soočina amen nekobore problemencar ko isto vreme. Razmislin bašo akala primerija. Jekh phral so vikinela pe Džonb, kole so isi multipleks skleroza, sine but razočarimo keda mukhlja le leskiri romni palo 19 berš brako. Palo adava, leskere duj čhaja čhinavgje te služinen e Jehovaske. Jekh javer bračno pari, o Bob hem i Linda, sine len javera problemija. O solduj džene našavgje pli buti, a palo adava mora sine te selinen pe taro pumaro kher soske na sine len dovolno pare te živinen ki leste. Osven akala problemija, o doktorija otkrijngje kaj e Linda isi la seriozno nasvalipe ko srce hem pharo artritis.

3. Sprema Filipjanite 4:6, 7, ko so šaj te ova sigurna?

³ Šaj te ova sigurna kaj amaro Stvoriteli hem Dad so grižinela pe amenge, o Jehova, haljovela sar osetinaja amen keda isi amen stres. Osven adava, ov mangela te pomožinel amenge te borina amen e problemencar. (Čitin Filipjanite 4:6, 7.) Ki Biblija isi but izveštaija kolende so pišinela save problemija sine e Devleskere slugen. Isto agjaar, ki late tano objasnimo sar o Jehova pomožingja lenge te ikljoven ko krajo adale stresna situaciencar. Te dikha nekobor primerija.

O ILIJA — MANUŠ SO SINE LE SAR AMARE ČUVSTVIJA

4. Save problemencar mora sine te soočinel pe o Ilija hem ko so uveringja pe?

⁴ O Ilija služingja e Jehovaske ko jekh pharo vreme hem mora sine te soočinel pe bare problemencar. O cari o Ahav, jekh taro izraelska carija so na sine verna e Jehovaske, ženingja pe e Jezavelaja — jekh zlobno džuvli koja so obožavinela sine e Vaale. O Ahav hem i Jezavela pottikninena sine e narodo te služinel e Vaaleske hem mudargje bute Jehovaskere prorokon. O Ilija uspejngja te našel. Isto agjaar, adaleske so sine le doverba ko Jehova, uspejngja te ačhovel dživdo keda sine baro bokhalipe (1. Car. 17:2-4, 14-16). Osven adava, e Ilija sine le doverba ko Jehova keda protivingja pe e Vaaleskere prorokonge hem slugenge. Ov pottikningja e Izraelcon te služinen e Jehovaske (1. Car. 18:21-24, 36-38). E Ilija sine le but dokazija kaj o Jehova pomožinela leske sine ko adava pharo periodi taro leskoro životo.

5-6. a) Sprema 1. Carevite 19:1-4, sar osetinela pe sine o Ilija? b) Sar o Jehova sikavgja e Ilijaske kaj mangela le?

⁵ Čitin 1. Carevite 19:1-4. Iako sine le dokazija kaj o Jehova pomožinela leske, o Ilija darandilo keda i carica Jezavela zakaningja pe leske kaj ka mudarel le. Adaleske našlja ki okolina tari Virsaveja. Doborom but obeshrabringja pe so čak manglja te merel. Soske osetinela pe sine agjaar? O Ilija sine nesovršeno manuš so sine le ista čuvstvija sar amende (Jak. 5:17, fus.). Verojatno sine le baro stres hem fizički sine but umorno. Šaj mislingja kaj tano džabe sa so trudingja pe te šaj te pomožinel e manušenge te služinen e Jehovaske, kaj i situacija ko Izrael na uli pošukar hem kaj samo ov služinela e Jehovaske (1. Car. 18:3, 4, 13; 19:10, 14). Šaj siem iznenadime so reagiringja agjaar akava verno proroko. Ama o Jehova halilo sar osetinela pe.

⁶ O Jehova na ukoringja e Ilija bašo adava so vakergja sar osetinela pe. Namesto adava, ov pomožingja leske te iranel pli sila (1. Car. 19:5-7). Palo adava, ko jekh ljubezno način pomožingja e Ilijaske te isprajnel plo razmislibe agjaar so sikavgja leske pli bari sila. Tegani, o Jehova phengja leske kaj ko Izrael isi panda 7.000 manuša so odbingje te služinen e Vaaleske (1. Car. 19:11-18). Agjaar, o Jehova sikavgja e Ilijaske kaj mangela le.

SAR KA POMOŽINEL AMEN O JEHOVA

7. Ko so uverinela amen o način sar o Jehova pomožingja e Ilijaske?

⁷ Dali nakhea tari nesavi phari situacija? But utešinela amen adava so džanaja kaj o Jehova halilo sar osetinela pe sine o Ilija! Adava uverinela amen kaj ov haljovela sar osetinaja amen keda isi amen problemija hem keda amenge pharo. Ov džanela so šaj te kera a so na, hem džanela čak so razmislinaja hem so osetinaja (Ps. 103:14; 139:3, 4). Ako amen da sar o Ilija isi amen doverba ko Jehova, ov ka pomožinel amenge te ikljova ko krajo e problemencar kola so kerena amenge stres (Ps. 55:22).

8. Sar ka pomožinel tuke o Jehova keda isi tut stres?

⁸ O stres šaj te kerel te mislina kaj i situacija nikogaš nane te ovel pošukar, a adava panda poviše ka obeshrabrinel amen. Ako slučinela pe tuke nešto asavko, ma bistre kaj o Jehova ka pomožinel tuke te izdržine. Sar kerela adava? Ov pottikninela tut te vakere leske so mučinela tut hem ka odgovorinel ko tle molitve baši pomoš (Ps. 5:3; 1. Pet. 5:7). Adaleske, često molin tut e Jehovaske bašo tle problemija. Ov nane te kerel tuja lafi direktno sar so kergja e Ilijaja, ama ka kerel adava preku plo Lafi, i Biblija, hem preku pli organizacija. O izveštaija so čitinea len ki Biblija šaj te den tut uteha hem nadež. Isto agjaar, tle duhovna phralja hem phenja šaj te ohrabrinen tut (Rim. 15:4; Evr. 10:24, 25).

9. Sar šaj te pomožinel amen nesavo paše amal?

⁹ O Jehova vakergja e Ilijaske te del delo taro ple zadače e Eliseeske. Agjaar o Jehova dengja e Ilijaske jekh šukar amal kova so sigurno pomožingja leske te ikljol ko krajo e pharipaja so osetinela sine. Slično agjaar, ako vakeraja nesave paše amaleske sar osetinaja amen, ov šaj te pomožinel amen te izdržina keda amenge pharo (2. Car. 2:2; Izr. 17:17). Ako mislinea kaj nane kaske te vakere tle problemija hem griže, molin e Jehova te pomožinel tuke te arakhe nesave zrelo phrale ili phenja so šaj te ohrabrinel tut.

10. Savi nadež dela amen e Ilijaskoro iskustvo, hem sar šaj te pomožinel amenge o vetuvanje soj pišimo ko Isaija 40:28, 29?

¹⁰ O Jehova pomožingja e Ilijaske te ikljovel ko krajo e stresea hem beršencar verno te služinel leske. O iskustvo e Ilijaskoro dela amen nadež. Šaj amenge pharo soske nakhaja taro stresno periodi kova so but umorinela amen fizički hem emocionalno. Sepak, ako isi amen doverba ko Jehova, ov ka del amen i sila koja so valjanela amenge te šaj ponadari da te služina leske. (Čitin Isaija 40:28, 29.)

JAVERA SLUGE E DEVLESKERE SO SINE LEN DOVERBA KI LESTE

11-13. Sar vlijajngja o stres upro trin Devleskere sluge taro purano vreme?

¹¹ Javera da sluge e Devleskere soj spomnime ki Biblija mora sine te borinen pe stresna situaciencar. Na primer, adaleske so našti sine te oven la čhave, i Ana but ladžala sine hem mora sine te trpinel ple romeskere dujto romnja koja so but vredžinela la sine (1. Sam. 1:2, 6). I Ana sine doborom but razočarimi taro baro stres so čak rovela sine hem na hala sine maro (1. Sam. 1:7, 10).

¹² Ponekogaš, e care e Davide sine le baro stres. Razmislin bašo problemija so sine le. Ov osetinela pe sine but krivo bašo greške so kergja len angleder (Ps. 40:12). Leskoro manglo čhavo o Avesalom buningja pe protiv leste hem ko krajo mulo (2. Sam. 15:13, 14; 18:33). Osven adava, jekh taro leskere najpaše amala izdajngja le (2. Sam. 16:23—17:2; Ps. 55:12-14). Ko but psalmija so pišingja len o David dikhjola kobor sine obeshrabrimo, ama isto agjaar kobor bari vera sine le ko Jehova (Ps. 38:5-10; 94:17-19).

¹³ Jekh psalmisti počmingja te ovel ljubomorno e lošna manušenge. Ov šaj avela sine taro leviti o Asaf hem služinela sine ko „veličestveno svetilište e Devleskoro“. Akale psalmiste sine le baro emocionalno stres hem adaleske na sine više bahtalo hem na sine zadovolno. Čak počmingja te mislinen kaj na vredinela te služinel pe e Devleske (Ps. 73:2-5, 7, 12-14, 16, 17, 21).

14-15. So sikljovaja taro trin bibliska primerija?

¹⁴ O trin sluge e Devleskere so spomningjem len sine len doverba kaj o Jehova ka pomožinel lenge. Ola ki molitva vakerena sine e Jehovaske ple griže. Iskreno vakergje e Jehovaske soske sine lenge doborom pharo. Isto agjaar, ola ponadari da džana sine ko e Jehovaskoro kher (1. Sam. 1:9, 10; Ps. 55:22; 73:17; 122:1).

¹⁵ O Jehova sočuvstvitelno odgovoringja ko lengere molitve. I Ana osetingja andruno mir (1. Sam. 1:18). O David pišingja: „But nevolje isi e pravedniko, ama o Jehova spasinela le tari sekoja lendar“ (Ps. 34:19). A o psalmisti pokasno halilo kaj o Jehova mangipaja vodinela le ple sovetencar. Ov pišingja: „Mange tano šukar te ovav paše uzo Devel. O Najbaro Gospodari o Jehova tano o than kote so garavava man“ (Ps. 73:23, 24, 28). So sikljovaja taro akala primerija? Ponekogaš ka oven amen but problemija kola so ka anen amenge stres. Ama, šaj te ikljova ko krajo e stresea ako razmislinaja bašo adava sar o Jehova pomožingja e javerenge, ako rodaja lestar pomoš ki molitva hem ako poslušno keraja adava so rodela amendar (Ps. 143:1, 4-8).

NEKA OVEL TUT DOVERBA KO JEHOVA HEM KA USPEJNE

16-17. a) Soske na valjani te cida amen taro Jehova hem taro leskoro narodo? b) Sar šaj te irana amari sila?

¹⁶ Taro trin primerija so dikhlem len sikljovaja panda jekh važno buti — na valjani te cida amen taro Jehova hem taro leskoro narodo (Izr. 18:1). I Nensi, kola so sine la baro stres keda mukhlja la lakoro rom, vakerela: „Sine but dive keda na mangava sine ni te dikhav a ni te kerav nekasaja lafi. Ama, so poviše cidava man sine doborom potažno ovava sine“. O bukja meningje pe keda i Nensi počmingja te razmislinel sar te pomožinel e javerenge so sine len problemija. Oj vakerela: „Šunava sine e javeren keda vakerena mange sine ple problemija. Primetingjum kaj kobor poviše sikavava sočuvstvo e javerenge doborom pohari žalinava sine korkori man“.

¹⁷ Adava so redovno ka dža ko sostanokija ka pomožinel amenge te irana amari sila. Keda siem ko sostanokija, daja e Jehovaske panda jekh prilika te pomožinel amenge hem te utešinel amen (Ps. 86:17). Adari ov kerela amen posilna preku plo sveti duh, plo Lafi hem ple sluge. Ko sostanokija isi amen prilika te ohrabrina amen amare phralencar hem phenjencar (Rim. 1:11, 12). Jekh phen so vikinela pe Sofija vakergja: „O Jehova, o phralja hem o phenja pomožingje mange te istrajnav. O sostanokija sine mange najvažna. Haliljum kaj kobor poviše trudinava man ko sostanokija hem ki služba doborom polokhe ikljovava ko krajo e stresna situaciencar hem e sekiraciencar“.

18. So šaj te del amen o Jehova keda siem obeshrabrime?

¹⁸ Keda siem obeshrabrime, te na bistra e Jehovaskoro vetuvanje kaj ki idnina ov ka cidel amare problemija zasekogaš. Osven adava, o Jehova panda avdive mangela te pomožinel amenge te ikljova ko krajo e stresea. Ov dela amen sila hem motivacija te šaj uspešno te borina amen keda siem obeshrabrime hem keda osetinaja amen bizi nadež (Fil. 2:13).

19. Ko so uverinena amen o lafija taro Rimjanite 8:37-39?

¹⁹ Čitin Rimjanite 8:37-39. O apostol Pavle uverinela amen kaj ništo našti te odvojnel amen taro e Devleskoro mangipe. A sar šaj te pomožina e phralen hem e phenjen kola so trudinena pe te ikljoven ko krajo e stresea? Ki naredno statija ka dikha sar šaj te dža palo e Jehovaskoro primer adalea so ka sikava sočuvstvo e phralenge hem e phenjenge keda isi len stres.