So ka kerel e Devleskoro Carstvo?

SO VIŠE KERGJA E DEVLESKORO CARSTVO?

Ki angluni statija kergjem lafi bašo znako so vakergja le o Isus. Adava znako tano jasno dokaz kaj e Devleskoro Carstvo, kote soj Cari o Isus, počmingja te vladinel ko nebo.

Tari Biblija sikljovaja kaj keda o Isus počmingja te vladinel, ov prvo frdingja e Satana hem e demonen taro nebo. Akana ola šaj samo te vlijajnen upri Phuv hem adaleske taro 1914 berš i situacija ko sveto ovela sa pološno (Otkrovenie 12:7, 9).

Iako o uslovija ko sveto ovena sekova dive sa pophare, o Isus, sar Cari taro e Devleskoro Carstvo, kergja nesave bukja te šaj te pomožinel e manušen ki celo Phuv. Na primer, i biblisko obrazovno programa, koja so prorokujngja o Isus, pomožinela bute manušenge te sikljoven te primeninen o bibliska sovetija ko plo životo (Isaija 2:2-4). Agjaar milionja manuša siklile sar te ovel len pobahtali familija hem te na dozvolinen i buti ili o materijalna bukja te len o prvo than ko lengoro životo. Akala manuša više avdive živinena jekh pošužo životo hem dena pestar sa te šaj te stekninen osobine kola so mangela o Devel hem agjaar te poddržinen o Carstvo.

SO KA KEREL E DEVLESKORO CARSTVO PANDA HARI?

Iako o Isus više počmingja te vladinel ko nebo, ki Phuv panda vladinena manušikane vlade. Sepak, o Devel vakergja e Isuseske te džal maškar ple dušmanja hem te vladinel upri lende (Psalm 110:2). Panda hari o Isus ka uništinel sa ple protivnikon hem ka anel spasenie okolenge so mangena te oven poslušna e Devleske.

E Devleskoro Carstvo ka kerel akala bukja:

• Ka uništinel i hovavni religija. O religie so širinena hovajba bašo Devel hem so kerena e manušengoro životo pharo ka oven uništime. Ki Biblija i hovavni religija pretstavimi tani sar bludnica. O manuša ka oven šokirime keda ka ovel uništimi (Otkrovenie 17:15, 16).

• Ka uništinel o manušikane vlade. E Devleskoro Carstvo ka anel krajo e manušikane vladenge (Otkrovenie 19:15, 17, 18).

• Ka uništinel e lošna manušen. So ka ovel okolencar so ignoririnena e Devleskere zakonija hem na mangena te meninen pe? I Biblija vakerela kaj o lošna manuša ka oven uništime tari Phuv (Izreki 2:22).

• Ka uništinel e Satana hem e demonen. O Satana hem o demonija nane više te hovaven e manušen (Otkrovenie 20:3, 10).

So značinena sa akala bukja okolenge so poddržinena e Devleskoro Carstvo?

SO KA KEREL E DEVLESKORO CARSTVO E MANUŠENGE?

Sar Cari ko e Devleskoro Carstvo, o Isus ka kerel but poviše taro o manušikane vladetelija. Ama, o Isus nane te vladinel korkori nego zaedno 144.000 carencar kolenge so i Biblija vakerela kaj tane birime tari Phuv (Otkrovenie 5:9, 10; 14:1, 3). O Isus ka grižinel pe e Devleskiri volja te kerel pe akate ki Phuv. Save bukja e Devleskoro Carstvo ka kerel e manušenge?

• Ka cidel o nasvalipa hem o meribe. „Nijekh so živinela ki phuv nane te vakerel: ,Nasvalo sium‘“. Isto agjaar, „o meribe nane te ovel više“ (Isaija 33:24; Otkrovenie 21:4).

• Ka anel čačutno mir hem sigurnost. „Baro mir ka ovel tle čhaven“ hem „sekova jekh ka bešel teli pli drakh hem teli pli smokva hem nijekh nane te daravkerel len“ (Isaija 54:13; Mihej 4:4).

• Ka del amen buti so ispolninela amen. „Adala soj tane birime mandar ka uživinen ki buti so ka keren pe vastencar. Nane te trudinen pe džabe“ (Isaija 65:22, 23).

• Ka rešinel o ekološka problemija. „Ka oven bahtale i pustina hem i šuki phuv hem o pusto than ka ovel pherdo lulugjencar“ (Isaija 35:1).

• Ka sikavel e manušen bašo Devel te šaj te dobinen večno životo. „Te šaj te ovel len večno životo valjani šukar te pendžaren tut, e jekhe čačutne Devle, hem okole so bičhalgjan le, o Isus Hristos“ (Jovan 17:3).

O Devel mangela te dobine akala bereketija (Isaija 48:18). Ki sledno statija ka ovel objasnimo so valjani te kere panda avdive te šaj te živine ko asavke šuže uslovija.