Sar šaj te bajrara amaro mangipe sprema o Devel hem sprema amare paše?

Iako sar hristijanja na ikeraja amen ko e Mojseeskoro zakoni, o duj najbare zapovedija, te manga e Devle hem amare paše, panda važinena (Mt 22:37-39). O mangipe na avela korkori pestar, valjani te bajrara le. Sar te kera adava? Valjani te čitina i Biblija sekova dive. Keda čitinaja bašo šuže osobine e Devleskere, tegani šaj te dikha „kobor tano šukar o Jehova“ (Ps 27:4). Ko asavko način, amaro mangipe sprema leste bajrola hem počminaja te razmislina sar leste. Akava ka pottikninel amen te ikera e Devleskere zapovedija a jekh lendar tani i zapoved te sikava samopožrtvuvano mangipe e javerenge (Jvn 13:34, 35; 1Jo 5:3). Ake nekobor predlogija sar o čitibe e Biblijakoro te ovel amenge pointeresno:

• Zamislin tuke o nastanija hem vklučin tle čuvstvija. Zamislin kaj sian ko adava than. Dikh, šun, khande. Probin te šaj te haljove o čuvstvija e manušengere soj ko adava nastan.

  

• Menin tlo pristap. Ake nekobor idee: Čitin ko glaso ili sledin ki Biblija džikote šunea i audiosnimka. Čitin bašo nesavo liko ili tema tari Biblija namesto te čitine la redoja. Na primer, šaj te čitine bašo životo e Isuseskoro agjaar so ka koristine i brošurka Da ja istražuvame Božjata Reč, 4 hem 16 delo. Čitin celo poglavje kotar soj lendo o dnevno stiho. Čitin o bibliska lila sprema hronološko redo — sprema o vreme keda tane pišime.

  

• Čitin te haljove. But pošukar tano te čitine jekh poglavje, te haljove le hem te razmisline baši leste nego te čitine but poglavja kobor te nakhave poviše materijali. Dikh o kontekst. Probin te dikhe o detalija. Koristin o karte hem o margine. Istražin barem jekh misla so na haljovea la šukar. Ako šaj, trudin tut te razmisline bašo materijali isto vreme kobor so valjangja tuke te čitine o materijali.