Emocionalno sastipe — problemi ko celo sveto
„Sekogaš osetinava man sekirimo, čak keda nane nisavi pričina bašo adava.“
„Keda osetinava man šukar, adava počminela te daravkerel man, soske džanava kaj ako sium srekjno, palo adava ka ovav tažno.“
„Trudinava man te mislinav samo bašo avdisutno dive. Ama, ponekogaš taro jekh puti osetinava man sekirimo bašo but javera bukja.“
Akala tane izjave taro manuša kola so isi len problemija emocionalno sastipaja. Dali tu da osetingjan tut nekogaš agjaar? Ili, šaj džanea nekas so borinela pe asavke problemea?
Ov sigurno kaj na sian korkori. But džene avdive, ili nesave taro lengere pašutne, borinena pe emocionalno nasvalipaja.
Džanaja kaj živinaja ko „but pharo vreme“ kova so anela amenge but problemija (2. Timotej 3:1). Sprema jekh istražuvanje, otprilika sekova oftoto manuš ko sveto, borinela pe nesave psihičko nasvalipaja. Ko 2020 berš, i pandemija KOVID-19, kergja o broj okolengoro so isi len anksioznost te bajrol 26 posto poviše nego so sine ko 2019 berš. A o broj okolengoro so isi len phari depresija, barilo 28 posto.
Iako tano šukar te džanel pe kobor manuša borinena pe asavke problemea, sepak panda pošukar tano te džana so šaj te kera amen hem amare pašutne te šaj te osetina amen kobor so šaj pošukar.
Soj tano emocionalno ili psihičko sastipe?
Keda nekoj tano emocionalno ili psihičko sasto, ov osetinela pe šukar hem šaj te funkcionirinel šukar. Isto agjaar, šaj te ikljovel ko krajo e sekojdnevno stresea, te kerel šukar pli buti hem te osetinel pe zadovolno taro životo.
O emocionalno nasvalipe...
NA AVELA taro lična slabostija.
TANO zdravstveno problemi kova so vlijajnela but jekhe manušeske ko čuvstvija, ko razmislibe hem ko ponašibe.
But puti kerela e manušeske pharo te oven le amala, hem te ikljovel ko krajo e sekojdnevna problemencar.
Na birinela e manušeskere berša, kultura, rasa, religija, kobor bari škola isi le ili ki savi ekonomsko sostojba tano.
Pomoš keda isi problemija e emocionalno sastipaja
Nesavo manuš šaj taro jekh puti te počminel te ponašinel pe pojaver, te sovel pohari ili poviše, te hal but poviše ili pohari taro angleder ili te počminel te osetinel pe voznemirimo ili tažno. Ko asavko slučaj asavko manuš valjani te džal ko doktori te šaj te haljovel koja tani i pričina bašo problemi hem sar šaj te rešinel le.
O najmudro manuš kova so nekogaš živingja, o Isus Hristos, vakergja: „E saste manušenge na valjani doktori, nego e nasvalenge“ (Matej 9:12). Okola so borinena pe asavke nasvalipaja hem so dobinena medicinsko terapija šaj but te tiknjaren o simptomija hem adava šaj te pomožinel lenge te ovel len pošukar hem ispolnimo životo. A ako o simptomija tane seriozna hem trajnena poviše vreme, tegani ka ovel mudro so posigate te rodel pe pomoš.a
Iako i Biblija nane medicinsko priračniko, ki late isi korisna sovetija bašo amaro emocionalno sastipe. Mangaja te ohrabrina tut te dikhe o sledna statie kolende kerela lafi bašo adava sar i Biblija šaj te pomožinel amenge te ikljova ko krajo e problemencar so anela o emocionalno nasvalipe.
a I Stražarsko kula na preporačinela nesavo posebno medicinsko tretmani. Sekoj lično valjani te dikhel save opcie isi le angleder te anel nesavi odluka.