Soj šukar a soj lošno: I Biblija dela najšukar sovetija

Našti te ova sigurna dali amare odluke ka oven šukar ako anaja len sprema adava sar mislinaja amen ili o javera. I Biblija vakerela amenge soske tano adava agjaar. Ama na vakerela amenge samo adava, nego pomožinela amen te džana soj tano šukar, a soj lošno, a adava kerela amen srekjna.

VALJANI AMENGE POMOŠ TARO DEVEL

Ki Biblija o Jehova,a o Devel, objasninela soske e manušenge valjani leskiri pomoš hem kaj našti te keren sa korkori (Eremija 10:23). Adaleske dengja amen i Biblija kolate so isi moralna merilija. Ov mangela amen hem na mangela te ana lošna odluke kola so ka dukhaven amen hem ka keren popharo amaro životo (5. Mojseeva 5:29; 1. Jovaneskoro 4:8). Isto agjaar, sar amaro Stvoriteli, isi le mudrost hem džanela te del amen o najšukar sovetija so valjani amenge (Psalm 100:3; 104:24). Ama, ov na čhivela nikogaš silaja e manušen te živinen sprema leskere merilija.

O Jehova dengja e prvo manušenge, e Adameske hem e Evake, sa so valjangja lenge te šaj te oven čače srekjna (1. Mojseeva 1:28, 29; 2:8, 15). Isto agjaar, ov dengja len ednostavna upatstvija hem adžikergja te ikeren pe ki lende. Sepak, mukhlja korkori te birinen dali ka šunen adala upatstvija ili na (1. Mojseeva 2:9, 16, 17). Žalno tano so o Adam hem i Eva biringje te živinen sprema ple merilija, namesto sprema e Devleskere (1. Mojseeva 3:6). Savo sine o rezultati? Dali o manuša tane posrekjna adaleske so korkori odlučinena soj šukar, a soj lošno? Na! Taro sa akala berša so nakhle dikhela pe kaj adava so o manuša na ikerena e Devleskere merilija na anela lenge trajno mir hem srekja (Propovednik 8:9).

I Biblija vodinela amen te šaj te ana mudra odluke bizi razlika kote živinaja hem tari savi familija avaja (2. Timotej 3:16, 17; dikh i ramka „Lil sa e manušenge“). Te dikha sar kerela adava i Biblija.

Doznajn nešto poviše bašo adava soske baši Biblija vakerela pe kaj tani e Devleskoro lafi (1. Solunjanja 2:13). Dikh o videoklipi Kastar tani i Biblija? ki jw.org.

SOSKE NESAVE MANUŠA MISLINENA KAJ I BIBLIJA NAŠTI TE POMOŽINEL LEN

Nesave manuša vakerena kaj i Biblija našti te vodinel amen šukar ko životo. Ake nesave bukja so vakerena o manuša.

Nesave šaj vakerena: „I Biblija ko jekh than vakerela jekh buti, a ko javer than nešto javer“.

O čačipe tano: Ko početok šaj te dikhjol kaj nesave delija tari Biblija na vakerena o isto so pišinela ko javer delo latar. Ama keda ka sikljove nešto poviše bašo adava sar hem keda sine pišime, ka dikhe kaj ustvari vakerena i isto buti.

Čitin nesave primerija tari statija „Dali nekoi delovi na Biblijata se protivrečni?“ ki jw.org

Nesave šaj vakerena: „O manuša so vakerena kaj živinena agjaar sar so vakerela i Biblija kerena lošna bukja. Adava značinela kaj ki late nane šukar moralna merilija“.

O čačipe tano: Našti te krivina e Biblija bašo adava so nesave manuša na ponašinena pe šukar hem na kerena o bukja so sikavela len oj. Ustvari ki late sine prorokujmo kaj but manuša, sar soj o religiozna vodačija, ka vakeren kaj živinena sprema adava so vakerela i Biblija, ama nane te keren adava so pišinela ki late. Isto agjaar, ki late pišinela kaj bašo adava ka kerel pe lošno lafi bašo bibliska sikljojba (2. Petareskoro 2:1, 2).

Jekh primer bašo adava sar but religiozna vodačija na kerena adava so čače vakerela i Biblija šaj te arakhe ki statija „Dali religijata e samo ušte eden golem biznis?“ ki jw.org.

Nesave šaj vakerena: „I Biblija sikavela te na poštujnel pe e manušen soj porazlična“.

O čačipe tano: I Biblija pottikninela amen te poštujna e javere manušen. Sprema i Biblija nane prifatliva o stavija sar soj...

te mislina kaj siem pošukar e javerendar (Filipjanja 2:3).
te na poštujna e manušen so dikhena pojaver ki nesavi buti ili isi len pojaver veruvanje taro amaro (1. Petareskoro 2:17).
silaja te čhiva e javeren te dikhen ko bukja sar amen so dikhaja(Matej 10:14).

Tari Biblija doznajnaja kaj o Devel sekogaš ponašinela pe e manušencar ljubezno hem fer hem kaj ov mangela amen da te kera o isto (Rimjanja 9:14).

Bašo poviše informacie čitin i statija „So vakerela i Biblija baši tolerancija?“ ki jw.org.

I BIBLIJA VAKERELA AMENGE SO MANGELA O DEVEL TE KERA

I Biblija vakerela amenge sar o Devel postapinela e manušencar panda taro početok. Adava so pišinela ki late pomožinela amen te haljova soj tano e Devleske šukar, a soj lošno, soj korisno, a soj štetno (Psalm 19:7, 11). O načelija so sikljovaja latar nikogaš na purangjona hem pomožinena amen te ana mudra odluke sekova dive ko amaro životo.

Na primer, razmislin bašo sovet kova soj pišimo ko Izreki 13:20: „Koj džala mudra manušencar, mudro ka ovel, a kas isi buti okolencar so nane gogjaver, lošno ka nakhel“. Akava načelo važinela avdive da isto kobor so važinela sine angleder. I Biblija tani pherdi asavke korisna načeloncar so pomožinena amen. (Dikh i ramka: „E Biblijakiri mudrost koja so na purangjola“.)

Ama šaj pučea tut: Sar šaj te ovav sigurno kaj o sovetija tari Biblija šaj te pomožinen mange avdive? Ki sledno statija ka dikha iskustvija taro nesave manuša.

a Jehova tano e Devleskoro anav (Psalm 83:18).

E BIBLIJAKIRI MUDROST KOJA SO NA PURANGJOLA

Iako i Biblija sine pišimi skoro angleder 2.000 berša, oj avdive da tani korisno amenge. O manuša sekogaš mangle te oven srekjna hem te ovel len šukar životo (Propovednik 1:9). E Biblijakiri mudrost so na purangjola šaj te pomožinel amen te kera adava.

Sar te ove česno

„Mangaja ko sa o bukja te ova česna“ (Evreija 13:18).
„Koj čorgja, te na čorel više, nego vredno te kerel buti“(Efešanja 4:28).

Sar te nakhe e javerencar

„Nikoj te na rodel pli korist, nego i korist e javereskiri“ (1. Korinkjanja 10:24).
„Trpinen tumen jekh jekhea hem celo vilea prostinen tumenge“(Kološanja 3:13).

Sar te ane odluke

„O naivno manuš verujnela ko sekova lafi, a o pametno pazinela ko sekova plo čekori“ (Izreki 14:15).
„O gogjaver manuš dikhela o lošnipe hem cidela pe, a o glupava džana ponadari hem trpinena posledice“ (Izreki 22:3).