Dali isi tut vera?

Te šaj te ugodina e Jehovaske mora te ovel amen vera. Ama, i Biblija vakerela kaj „nane sarinen vera“ (2. Sol. 3:2). Keda o apostol Pavle vakergja akava, ov kerela sine lafi bašo „rumime hem lošna manuša“ kola so progoninena le sine hem kolendar so valjani sine te ovel oslobodimo. Ama, adava so vakergja baši vera važinela hem javere da manušenge. Nesave na mangena te prifatinen o jasna dokazija kaj postojnela Devel kova so stvoringja sa so isi (Rim. 1:20). Javera vakerena kaj verujnena ki nesavi pobari sila. Ama, akaja nane čačutni vera kolaja so šaj te ugodina e Jehovaske.

Valjani te ova uverime kaj o Jehova postojnela hem kaj nagradinela okolen so isi len silno vera (Evr. 11:6). I vera tani jekh taro osobine so avena tari e Devleskiri sila. Te šaj te dobina adaja sila, valjani ki molitva te roda la taro Jehova (Luka 11:9, 10, 13). Javer važno način sar te dobina e Devleskiri sila tano agjaar so ka čitina i Biblija koja so sine vodimi tari leskiri sila te šaj te ovel pišimi. Palo adava, šaj te razmislina bašo adava so čitinaja hem te trudina amen te primenina adava so sikljovaja. Ko asavko način amen dozvolinaja e Jehovaskiri sila te vlijajnel upro amaro životo, a adava pomožinela amen te ovel amen vera kolaja so šaj te ugodina e Devleske.